Miluçs furlans, un tesaur di biodiversitât di recuperâ. Anìn ae discuvierte di cui che si impegne a fâlu

Al è un teritori, te part setentrionâl de provincie di Pordenon, li che il plan al va sù scuasit cence visâsi, fondintsi cul alçâsi dai prins çucui de pedemontane cun formis ancjemò onduladis, cuvierts di boscs, pontizâts di paîs e di borcs: ulì a son i “Puescj dai miluçs”, patrimoni e part de nestre storie furlane.
Si, parcè i nestris vons a usavin, cuant che a tornavin in Patrie, puartâ cun se semencis dai pomârs dal oltran, fasint deventâ di fat il nestri teritori un tesaur di biodiversitât.
E cheste ultime e je cumò simpri plui impuartante, se si pense che vuê il 90% dai miluçs in cumierç a son mancul di dîs varietâts. Cussì le pense ancje la Associazion Amadôrs dai Antîcs Miluçârs, che e sosten e e pant dutis lis iniziativis che a supuartin il recupar des vieris varietâts autoctonis di miluçârs.
La associazion, costituide fûr par fûr di volontaris, e nas tai prins agns Doi mil (uficialmentri tal 2005) e, di in chê volte, dutun cui comuns di Andreis, Cjavàs, Fane, Frisanc, Manià e Midun, e lavore di continui par slargjâ cheste realtât e fâle cognossi tra la int.
Tant al è stât fat dai fondadôrs, in particolâr la ex presidente Raffaella Vallar, par rivâ ai obietîfs de AAMA: tra chescj, la tutele dai esemplârs plui impuartants di miluçârs, la produzion e la difusion tra i interessâts di plantutis di varietâts antighis, lezions di cerpidure e di incalms organizadis cul jutori di esperts, e tant altri.
La plui part des iniziativis no saressin realizabilis cence il Cjamp Scuele, une cente metude a disposizion dal comun di Fane e de cimentarie Zillo. Li si inmanein une vore di incuintris di divulgazion, ancje cun scuelis primariis di dut il teritori: al è tant impuartant tirâ sù i fruts fin di piçui passantji lis nestris tradizions, di mût di rindiju sensibii al ambient.
Cence dubi però, la manifestazion plui impuartante e je la Mostre dai miluçs antîcs, li che ogni an un dai sîs comuns che a fasin part dal progjet al ospite la AAMA e lis sô iniziativis, fasint in mût che cheste e altris sociis dal puest a puedin informâ la int sui prodots tradizionâls. Dome par dâ une idee di cetant che al è grant chest event, baste pensâ che l’an passât, a Andreis, a son stâts plui di cuatri mil visitadôrs.
L’interès in incressite nol pues che jessi un dât positîf, e se di une bande si è daûr a riscuvierzi i prodots tipics dal Friûl, di chê altre al podarès jessi il principi par fondâ un futûr marcjât sostignibil a chilometri zero.
Par chest an, dopo de Mostre dai miluçs antîcs fate domenie ai 12 di Otubar, i prins events a son stâts la prime domenie di Març cun la lezion di cerpidure, e la tierce, cun la lezion di incalms, ducj doi tal Cjamp Scuele in vie Maniago, a Fane.
Contats: aameleantiche@gmail.it, meleantiche.blogspot.com/ Facebook: Mele Antiche ❚
Zuan Marc Sartor