Il belanç de Setemane de culture furlane. Vicario: «Une rêt nassude dal bas par promovi il teritori e il nestri patrimoni culturâl»

“O vin lavorât une vore par creâ e consolidâ cheste rêt de culture furlane al servizi dal nestri teritori, e dut cul volontariât: cumò si spietìn il ricognossiment di chest grant lavôr, si spietìn di vê la juste valutazion e che i sorestants a judichin cun favôr cheste grande operazion di unitât e di condivision dai valôrs de storie, de tradizion e de identitât dal Friûl”.
Il president de Societât Filologjiche Furlane, Federico Vicario, al tire cussì i conts de seconde edizion de Setemane de culture furlane, cun plene sodisfazion di chescj dîs dîs di grande ferbince ator par dut il Friûl.
UN FRIÛL POLICENTRIC
Passe cent apontaments tra conferencis, presentazions di volums, visitis naturalistichis, screis di mostris e chest par une rêt che e à mobilitât dusinte sogjets, comprendudis istituzions, associazions, scuelis, grups di culture. Sul sît internet de Filologjiche, la cjartine gjeografiche dal Friûl – che ogni dì e mostrave cui bolins narançon dulà che si tignivin i apontaments – e dave subit une imagjin clare di cheste Setemane: e à fat jessi il Friûl pardabon policentric, come che e je la sô nature. Di Gurize ae provincie di Pordenon, passant pe Basse, pe Cjargne e pal Friûl di Mieç si podarès cuasi dî che nol è paîs che nol vedi in cualchi forme contribuît a cheste seconde edizion.
“La Setemane di chest an nus à confermade une grande voie di colaborazion”, al rimarche il president Vicario che le à volude subit dopo vê cjapât in man la socie. “O vin regjistrade une plene disponibilitât di dut il mont culturâl furlan a condividi cheste idee di une rêt largje e inclusive, vierte a istituzions e operadôrs culturâi – al dîs -. Si trate di une rêt nassude dal bas par promovi il teritori e il nestri patrimoni culturâl tes sôs variis declinazions”.
Tra l’altri, il diari bilengâl Olmis (20 mil copiis) pai fruts des elementârs e des mediis chest an, dopo jessi stât presentât alì de Fondazion Crup, al è stât presentât par altris dîs voltis in ancjetantis scuelis, chês che a àn contribuît a realizâlu cui dissens dai fruts.
LIS PRESENTAZIONS
La Setemane, al zonte ancjemò Vicario, “e à un so grant valôr tal fat di jessi une iniziative popolâr, tal sens di espressions di une comunitât che e sa meti adun lis fuarcis e dâ cualitât a ce che e fâs”. Di chest pont di viste, dilunc lis zornadis a son stadis presentadis diferentis publicazions che, come che al dîs Vicario, a restin “a capitâl” di culture pal Friûl. Si trate dai doi volums su Lignan, par todesc e par inglês (Zwischen Himmel und Meer, al è il titul “Tra cîl e mâr”), par promovi la localitât cui ospits che a vegnin di fûr; la publicazion dal secont inventari dai archivis Degrazia di Gurize, par cure di Lucia Pillon; la edizion de opare di Marc’Antonio Gattinon di Tisane, par cure di Gabriele Zanello, di chest autôr di comediis pluridialetâls dal Cinccent. A Cjarlins, dulà che la Setemane si è sierade cu la Fraie de Vierte, a son stâts presentâts ancje  i Ats de Setemane de culture furlane dal an passât, duncje dal 2014.
Esemplis che a mostrin cemût che la Setemane e sedi une ocasion dulà che “ducj cuancj cu lis lôr esperiencis e competencis a vedin la ocasion di presentâsi e di confrontâsi. Chest al è un dai compits plui impuartants des istituzions culturâls de nestre comunitât”. Vicario al insist sul fat che “condivision e colaborazion a son pardabon fondamentâls par cressi e resonâ insiemi. Chest al è ce che nus domandin ducj: i nestri socis, i amîs des istituzions e ancje la Regjon che plui voltis e à dimostrât di preseâ e di tignî cont di azions che a puartin a creâ une polifonie di vôs, plui che a cjantâ di bessôi”.
CIRINT LA VALORIZAZION
L’an passât, dopo la Setemane de culture, la Filologjiche e à regjistrât 400 gnovis iscrizions, che si son zontadis a siei 4mil iscrits. Chest an si viodarà. “Cumò o vin di fâ une analisi di dut e po o scomençarin a pensâ ae prossime edizion”, al dîs Vicario, che cualchi idee le à bielzà: “O pensìn di promovi une riflession coletive e su cheste riflession o domandarìn la colaborazion de Regjon, par valorizâ la Setemane ancjemò di plui pai siei aspiets culturâi, ma ancje pe promozion dal teritori dal pont di viste economic e turistic”. ❚
Antonella Lanfrit