Riformis istituzionâls, autonomie simpri plui roseade: ve parcè. Nestre interviste a Elena D’Orlando

Ce sucedaraial ae nestre autonomie? Tancj sal domandin, intun moment dulà che il centralisim roman al rosee competencis e risorsis, e di chê altre bande a vegnin indevant riformis istituzionâls che a cirin di peâ il destin des Regjons a un Senât che nol varà podê efetîf. Par capî ce che al bol inte cite dai “mâcs des riformis” che a somein viodi in ducj i nivei periferics dal Stât, dai Comuns aes Regjons, un straçarie e une penalizazion pai Ministeris talians, al è util fevelâ cuntune esperte juriste tant che Elena D’Orlando, docente di Dirit public comparât ae Universitât di Udin e componente di nomine governative de Comission Paritetiche jenfri Stât e Regjon pal Friûl Vignesie Julie.
LA OCASION PIERDUDE
“Il superament dal bicameralisim paritari – e dîs – al podeve jessi une buine oportunitât par rivâ a istituî une Cjamare Alte di rapresentance teritoriâl. Ma e je une ocasion pierdude, parcè che l’organisim dal gnûf Senât al varà funzions ambiguis e nissun al à capît cemût mai che la sô composizion e je stade pensade in maniere cussì fûr di norme, cu la presince di sindics e membris designâts dal President de Republiche. Chest nol à nuie a ce fâ cul spirt di rapresentance regjonâl”. E duncje, “e sarà une istituzion che e replicarà lis stessis logjichis de Cjamare dai Deputâts, soredut se nol sarà introdusût il vincul di mandât che al darès la pussibilitât aes comunitâts di riferiment di indreçâ la azion dai lôr rapresentants”. Rispiet ai modei europeans, “chest Senât al veve di someâ al Bundesrat todesc, ma al somee a chel austriac: cu la piçule diference che no sin in Austrie, ma in Italie” e scherce la D’Orlando, pensant al trasformisim tipic de politiche taliane.
SPAZIS DECISIONÂI SIMPRI PLUI PIÇUI
Ma chest gnûf model istituzionâl ridusial la nestre specialitât? “Par sigûr no le valorize” e spieghe, stant che il conflit di competencis jenfri Stât e Regjons al è destinât a restâ simpri compagn, se no a complicâsi simpri di plui. Cu la riforme dal Titul V si pensave di vuadagnâ in autonomie: la clausule che e regolave i rapuarts jenfri la nestre Regjon e la Italie e someave di facile leture e invezit a son sclopâts plusôrs conflits di interpretazion e di competence”. Colpe di cui? Nestre che no savìn scrivi lis leçs o dai Ministeris romans che a àn simpri di savêle plui lungje? Chest nol impuarte, parcè che il concet al è che “zaromai di fat o sin stâts abituâts a dibati materie par materie cuale che e je la sostance de nestre autonomie. E vuê il flagjel des normativis sul coordenament de finance publiche, che a deventin decisivis e a stricin dutis lis prerogativis dai Comuns e des Regjons tal non dai sparagns intal belanç, al sacrifiche ancjemò di plui i spazis decisionâi che o vin”.
GNOVE CLAUSULE
Cun cheste gnove configurazion istituzionâl dut câs i rapuarts jenfri Stât e Regjon a saran regolâts di une gnove clausule. Fin cuant che no jentrarà in vore la revision dal Statût, la gnove formule e varès di jessi chê de intese, de concertazion: nuie plui di scontât pe nestre autonomie, ma nancje di pierdût par cumò intal contest di une riforme che e penalize lis Regjons a statût ordenari. “Cumò o sin nô che o varìn di jessi bogns di justificâ, contratâ, dimostrâ lis resons che o sin bogns di esercitâ ogni singule competence miôr dal Stât centrâl”.
SBURTÂ LA MULTICULTURALITÂT
Pe nestre autonomie e sarà une gnove stagjon, duncje. “La specialitât e je coventade di 50 agns incà a fâ ciment de nestre identitât, ma soredut a riecuilibrâ une situazion di svantaç che o vevin rispiet ai teritoris dongje, ancje par jessi stâts aree di confin. Le vin doprade a lunc in maniere inovative ma cumò di un pieç la nestre situazion gjeopolitiche e je cambiade. E la nestre specialitât e va tornade a interpretâ. Par cont gno, la vocazion multiculturâl di cheste Regjon e larès valorizade cetant di plui. O vin dut par jessi une Regjon puint inte gnove Europe, ma no podìn plui spietâ. Jo o insegni dispès intes universitâts de Euregio Tirôl: alì al è normâl che i students di Trent a seguissin i cors ae Universitât di Innsbruck. Parcè no podaressino fâ il stes nô cui Ateneus di Clanfurt e di Lubiane?”. ❚
Walter Tomada