Simpri dongje de int: la specificitât de Glesie furlane intun libri

Il mês stât al è stât presentât a Vençon il libri di Mauro Della Schiava «Restâ cu la int – La esperience di Glesie Furlane». Il volum al conte la storie de storiche associazion dai predis furlans e des sôs lidrîs che a vegnin di lontan. O vin domandât a Mauro di contânus alc dal contignût (Redazion)
«Restâ cu la int » al è un test sedi storiografic che revisionist.
Storiografic parcè che al conte la storie tune cierte maniere, ven a stâi partint di un test come la «Cuintri Storie» di pre Marchet e pre Placerean. La vision cronologjiche de Storie viodude de bande de int furlane. Al bastarès ripuartâ il toc indulà che pre Placerean si domandave cemût mai, secont la storie insegnade tes nestris scuelis, chei che nus àn invadût a son simpri rivâts di soreli jevât e chei che nus liberin simpri de bande contrarie, vâl a dî di soreli a mont. Se i otomans nus invadevin tal 1499, parcè no sino stâts invadûts ancje tal 1866? – par fâ dome doi esemplis -. La dinamiche no je stade tant diferente, nissun al à domandât permès ma ancjemò vuê, te storie insegnade tes scuelis, no si pon la cuistion. Sot il profîl storiografic si podarès doprâ la peraule inglese di Nation building, ven a stâi une storie che e contribuìs a meti dongje un paîs, un stât/nazion. Discors che si pues insuazâ, ma che nol insegne a scrupulâ che par meti adun un procès di chê fate si scugne cancelâ come un diserbant culturâl dut il rest, soredut se al è piçul.
Di bant zontâ che chê storie achì no cjate “place” chenti. La domande e pararès banâl, ma no la rispueste. Parcè? Parcè no si insegne ancje cheste? La prospetive e reste chê cristalizade di agns, no si è zontât nuie. E pûr i timps a somein cambiâts, la globalizazion cualchi volte e somee che e gjavi i confins. Internet al coleghe il mont, e pûr al somee che al mancji un toc. Ancje par chel, chest libri al è une conte revisioniste, tal sens che e zonte un pont di viste, il nestri, indulà che la int e devente la protagoniste e par conseguence si cambie prospetive o, miôr, si zonte une prospetive al orizont de storie.
Un percors che al pee lis azions di chest trop di predis bogns – tal lôr provâ a jessi dongje de lôr int – di fâ sù la storie. Une storie, la lôr, pôc pandude e cognossude, ma daûr di lôr si cjatin la rivendicazion tal 1966 de Universitât dal Friûl, il Moviment Friûl, la Mozion dal Cleri, la Assemblee dal Cleri dal 1975, la nassite dal grup uficiâl in Cjargne tal 1974, la ricostruzion dal dopo taramot, il confront cul procès de globalizazion, la traduzion de Bibie par furlan… Mi pararès vonde par podê sintî la urgjence di meti dongje un libri che al feveli di lôr, di ce che al jere prin di lôr e ce che a son stâts bogns di fâ. Un libri che o speri che al deventi semence di culture e di vite, in lôr onôr e te sperance di une nestre dignitât di oms furlans di chescj agns 2000. La storie no contade no esist, lu ai dit cetantis voltis, ma se e je contade no pues plui jessi ignorade e in chel moment e devente la gnove fonde par fâ sù cuntune cussience pui profonde che no si ferme dome tal nestri cjâf. ❚
Mauro Della Schiava
***
Dulà cjatâ il libri
Il libri si lu pues cjatâ cun dutis lis publicazions di Glesie Furlane a Udin, li di Friulibris, in vie Piave 27, in bande de prefeture; ancje a Visepente, te edicule dal paîs su la s.s. 13 in bande de glesie; o ancjemò, si pues domandâ daurman a Glesie Furlane vie telefon: 0432.956010, o vie e-mail: info@glesiefurlane.org ❚ M.D.S.
***
I incuintris di Vençon: ocasion culturâl siore
Glesie Furlane e lavore su pui plans: chel liturgjic peât ae nestre lenghe; chel culturâl cu lis publicazions di lavôrs che a àn relazion cu la storie dal Friûl e ancje organizant incuintris cun personis di culture che a puedin vierzi prospetivis passadis e platadis, e futuris leint il mont di vuê.
Chescj incuintris si tegnin par solit te sale Bertrant di Vençon, in bande dal Domo. Tancj i ospits di valôr, dal professôr Remo Cacit a Gabriêl Pellizzari cu lis sôs leturis dai mosaics di Acuilee; dal pro retôr de Universitât dal Friûl Agnul Vianello al professôr e ricercjadôr Agnul Floramo, responsabil de biblioteche Guarneriane.
Une schirie di esperiencis a alt nivel par stiçâ resonaments di pari nivel, partint di chenti.
Dutis lis datis si puedin cjatâ sul sît web de associazion e si pues ancje domandâ di jessi metûts dentri intune mailing list (liste di direzions di pueste eletroniche), in mût di jessi visâts di volte in volte par timp. Ogni apontament si davuelç te domenie dopomisdì. ❚ M.D.S.