IL FERÂL. L’Italie raziste, o ben: l’ore dai conts

Aromai no passe zornade che la television e ducj i mieçs di informazion o disinformazion dal Stât no vegnin fûr cun câs di intolerance, di malinfidence, di asse cuintri dai “forescj”. E par forescj si intint prin di dut chei ch’a vegnin di fûr da l’Italie, par passâ, planchin planchin, a chei ch’a vegnin di fûr de regjon. E stant che la puritât dai vignadiçs e je di riunde meridionâl (no si à mai sintût a fevelâ di un flus che di ca sù al ledi par in jù), ve che a un cert pont une buine part da l’Italie si cjate cuntune brute pice. E, grate che ti grate, e je une pice che i benpensants le clamin razisim.
A part la grande confusion, la imprecision, la deformazion dai fats, che di un câs a fasin un cjiscjel, o pensìn che e sedi une buine ocasion par lassâ di bande la retoriche, che cun chê no si cumbine nuie, e di cjalâ in muse la realtât, cirint di no spaçâ par carognis chei che a palesin un mâl che al è. In câs, a saran carognis chei che·chest malstâ lu àn inviât, promovût, judât, e che no fasin nuie par meti rimiedi.
Se dopo cent e passe agns di Italie unitarie, prime risorgjmentâl, po fassiste, po antifassiste, si cjatìn denant di dôs Italiis e di un Nord che nol pò plui digjerî la invasion dal Sud, al è clâr che no si trate plui dome di une matetât.
UNITÂ REPEÇADE_ Al è alc che nol cuadre tal mût che cheste Italie e je stade repeçade. Cjalant i fats, tocje che la unitât de spice des Alps fin ae ultime ponte di tiereferme e jere plui une sflocje o une ilusion o une prepotence che no une realtât. Si tratave di un disen politic che nol tignive cont des realtâts culturâls, storichis e etnichis. Come meti adun plui cualitâts di fasûi e po scjassâ dut tun tamês sperant ch’al salti fûr il fasuli standart. Al sarès stat un delit, parcè che si varès staronzade dute la diviersitât e la ricjece par fâ vignî fûr une robe bastarde e sterpe.
Cumò; tune clime plui libare o plui slavrade, cualchidun al tache a dî “Vonde!”
E al passe par trist dome parcè che al vise la comunitât statâl dal malstâ che al è, che si lu sint in ducj e che si à pôre a pandilu. O pôre de religjon o pôre de politiche o pôre de publiche impinion. Salacor al è rivât il moment di tornâ a clarî la cuistion
Che l’Italie e sedi fate di int di diferente no je une invenzion di chel o di chel altri. E je une constatazion confermade de legjslazion statâl che no jere tant cjalde pai particolarisims. Parcè ano fatis lis regjons? Parcè certis regjons sono a statût speciâl? E cualis sono a statût speciâl: chês plui vualivadis o chês là che la diference e je plui marcade, adiriture etniche, di gjernazie, di cocje?
Cuant che si tratave di fâ l’Italie, tant de bande catoliche che de bande laiche, si fevelave di federalisim. Une idee che no si pò no cjatâle juste, par ducj, ancje se la reson dal Stât o la prepotence dal plui fuart no le àn lassade madressi.
SALVÂ LA DIVIERSITÂT_ L’Italie e à une sô ricjece te diviersitât e dome salvant la diviersitât tune unitât plui largje si pues dî che la convivence e je positive. Se par jessi talians, ch’al è un fat prin di dut politic-ministratîf o vin di staronzâ il cjâf ai todescs e ai furlans e scurtâur lis ongulis e i pîts ai meridionâi, si capìs che une Italie dal gjenar e sarès une disgracie. Cjalade di ogni bande, ancje par ledrôs. Duncje la division in regjons e va tignude, e va rinfuarçade, cumò che no ’nd è plui pericui di fuarcis centrifughis. Ancje par chel decentrament ministratîif ch’al sares spieli di modernitât, di maturitât e di sintiment.
La diviersitât e salte cuant che si scomence, a pueste, a meti adun in forme disordinade, prepotente e ricatatorie, fuarcis diferentis. Al sarès come cumbinâ un matrimoni fra int che no si vûl o che no je ancjemò preparade a vivi insieme.
Il miscliçâju par fuarce al jude a odeâsi no a volêsi plui ben. Parcè che il vivi insieme al è un ben cuant che al è cirût e bramât no cuant che al è imponût.
DISLIDRISAMENT_Duncje un Stât al à di fâ il pussibil par che ogni talian al puedi vê la pussibilitât di vivi a cjase sô, te sô clime fisiche e culturâl. Al da di plui parcè che al è in armonie cun dute la sô storie e al sa di lavorâ par un doman ch’al è so e dai siei fîs. Lassant la sô tiere, si cjatarà dislidrisât e al varà simpri ce pierdi. Se al tornarà cjase al varà pierdûts i agns de “profugance”. Se al restarà lontan al varà pierdûts i valôrs e i peams de sô tiere di riunde. L’emigrazion no je mancul dure fasint mancul chilometris o passant mancul frontieris. Chest esodo dai meridionâi viers il Nord, chest “viaç de sperance” come che lu àn clamât, in realtât al à servît dome a sfurnî i pâis là jù e a ingrumâ ca sù int disadatade, che si è cjatade cence lidrîs e cence pomis, distacade de sô risultive e no preparade a supâ 1’aghe de tiere che si jere sistemade.
Cussì o vin viodûts paîs a deventâ citâts, là che plui che convivence e jere grande confusion culturâl. Si lassave cori dome parcè che i bassarûi a puartavin mandopare e a consumavin i bêçs tal lûc di emigrazion. Cumò che no si à plui dibisugne di lôr, a Milan, a Torin e tes zonis industriâls dal Nord si scomence a berlâ cuintri di lôr. Ma lôr no puedin tornâ jù, parcè che ur son nassûts i fîs e i nevôts, che si cjataressin mâl ancje tornant tes tieris dal soreli.
Chest par chel ch’al rivuarde il “triangul industriâl”, là che i meridionâi a son vignûts a rimpolpâ la culumie adatantsi a dutis lis voris e a dutis lis umiliazions.
NISSUN RIVUART_Diferent il câs di altris tieris, come par esempli il Friûl, là che no son rivâts cu·la valîs di carton, ma cun tant di lauree o di diplome o di gjachete cu lis steletis. Nojere une int disperade che e rivave a domandâ un toc di pan adatantsi a fâ robis che chei dal puest ur puçave di fâ. Chi di nô i furlans a àn continuât a fâ i contadins, i muradôrs, i operaris, e lôr a àn cjapade in man la scuele, la ministrazion, lis puestis, l’esercit, la polizie, i tribunâi e vie; in pratiche i puescj di comant. La leç ur dave dirit e par chel plui di un si à sintût in dirit di alçâ la vôs, di sbeleâ i furlans, di tratânus di biadaçs e di indurmidîts. Soredut si son sintûts fuarts de fuarce dal Stât, che ur dave titui e timbris, e no àn vût pêl di rivuart par chê realtât plui vecje e plui vere de leç, che e je la int, cul a sô storie, cu la sô lenghe, cul so mût di fâ di sigûr diferent dal lôr. Gjavant cualchi ecezion, si pò dî che no àn fate cuissà ce fadie par adatâsi. Parcè che si sintivin legjitimâts dal podê centrâl. E nissune istituzion, ni statâl ni gleseastiche no ur à mai domandât, in cambi dal pan che a cjatavin, un tic di sensibilitât e di rispiet pe gnove realtât.
PRECEDENCE A LA NESTRE INT?_Cumò che il contest sociâl e economic al è gambiât, ancje i furlans a àn tacât a domandâsi se, par câs, nol sarès plui just, a paritât, dâi la precedence a la nestre int, in non di chê diviersitât che o vin dit prime. Nissun furlan nol disarà che nô o sin miôr di lôr, ma dome un prevignût o un vendût nol viodarà la diference, e grande, fra nô e lôr. Chest al è sucedût soredut par dôs resons: che i furlans a àn tacât a studiâ di plui e duncje il materiâl uman pai uficis e pe publiche ministrazion al è; che i puescj di lavôr si ridusin simpri di plui e duncje ogni om di sintiment al dîs che, a cjase sô, la cjadree i tocje prime a lui. No si pò pretindi il contrar. Al sarès catolic, ma no uman.
Ce si puedial fâ, denant di chest malstâ che di sigûr al cjaparà simpri plui pît?
Batisi par che la riforme de publiche ministrazion e cjapi simpri di plui la dimension regjonâl in dut. Al rint di plui, al è plui onest e al è plui rispietôs di chei valôrs che a vegnin prime de unitât d’Italie.
Pretindi che la int che si è riplantade chenti e capissi che culì e je un’altre tiere, un’altre int, un’altre culture. E come che lôr, a cjase sô, a van indenant tes lôr tradizions sbombantsi de unitât taliane, cussì a àn di permeti che ancje i furlans, in Friûl, a puedin vivi di furlans, cence jessi obleâts a jessi i unics in Italie a sacrificâsi par une ideologjie. Che a cirin di adatâsi, di cognossinus, di insedâsi in chest nestri ambient culturâl e religjôs cun creance e cun delicatece. I furlans no ju pararan fûr istès, ancje parcè che a son bogns di bruntulâ dome cuant che nissun no ju sint. Se invezit a ciraran di deventâ dai nestris, a cjataran ancje un bon stâ. No par nuie nol torne jù nissun. Se podopo a cjatin scrit su cualchi mûr cualchi peraulate, al è il minim che un popul invadût e umiliât in ogni forme al puedi fâ. O din dut, si lassìn puartâ vie dut; no vino propit nancje di rugnâ? Alore copaitnus daurman! Ma par podâ da un judizi obietîf, si varès di disledrosâ la situazion. Tant a dî fâ une leç là che i furlans a puedin invadi ducj i ufizis dal Sud. Par cumò, stant che al è ver il contrâr, nus tocje di cjapâ il dam e lis colpis; stupits e triscj. E il Stât che al è il prin responsabil di cheste porcarie, al à il coragjo di fânus ancje la predicje.
La Patrie dal Friûl, n 6 Jugn 1988 ❚
pre Antoni Beline