I indipendentiscj dal “Parlament Furlan” a vierzin lis puartis ai autonomiscj. E Anzil al jentre…

Novitât par i indipendentiscj dal Parlament Furlan, la auto proclamade assemblee par rapresentâ i furlans “fûr des istituzions e des segretariis dai partîts, fondade su la partecipazion di ducj”. Nassude cun intenzions dome indipendentistis, cumò, cuntune modifiche dal sô statût, si vierç ae partecipazion dai autonomiscj.
Il Parlament al jere nassût daûr dal sburt dal referendum on line pe indipendence dal Friûl dal Otubar passât: vie par chê votazion, a son stâts elets ancje i 11 “parlamentârs” che cumò a sentin idealmentri te assemblee. Il risultât dal referendum nol è stât un numaron: a àn rispuindût sù par jù 7.000 personis, ma ai “referendaris” ur interesse vê rivât a partî cuntune “piere miliâr”. Cun di plui, vie pe consultazion a àn tesserât ae associazion 1.200 di lôr.
Par fevelâ de svolte o ai incuintrât Adriano Biason, “ideolic” e fra i fondadôrs di Parlament Furlan.
–––
Adrian,  o jeris partîts a brene vierte cul indipendentisim,  e cumò o vês za frenât cjapant , dentri chei che a disin di jessi “dome” autonomiscj. Cemût mai?
No vin frenât,  ma o vin semplicementri invidât chei furlans che a crodin te autonomie. Il nestri  obietîf al è simpri un Stât furlan,  ma il Parlament al à di jessi viert a ducj chei che i tegnin al Friûl.
–––
O vevin capît che il Parlament al veve chê di puartâ ae indipendence dal Friûl. Parcè un autonomist varessial di iscrivisi?
Cumò la maiorance dentri dal Parlament e je indipendentiste, se tal futûr e sarà autonomiste si fasarà cussì. Il Parlament al à di jessi la cjase dai furlaniscj.
–––
A chest pont ti domandi ce che al è un furlanist…
Chel che al vûl che il Friûl al vadi indevant a esisti come popul, identitât e teritori. Su cemût fâlu a puedin jessi rispuestis diviersis, apont.
–––
Ma alore se a jentraran i tancj autonomiscj che a son, il Parlament al deventarà autonomist…
No crôt. Atenzion: autonomiscj a son i partîts, autonomiscj a son i gjornâi, parcè che a son tancj interès ator. Il nestri Parlament al è fat di int, di citadins, e par me la int libare e je pe indipendence.
–––
O sês critics su la Assemblee des Comunitâts Linguistichis, parcè che e je fate di sindics, ma dopo o invidais sindics tant che Navarria e Anzil (che al à aderît) a partecipâ al vuestri Parlament…
La cuistion no je la Assemblee ma i gjornâi: a fevelin di jê tant che un Parlament furlan. Bisugne invezit jessi corets: “Parlament Furlan” al è il nestri non, e daûr al è un progjet ben definît. In cont de Assemblee, no vin nuie cuintri però e je fate di sindics che par une buine part a fasin riferiment a partîts talians. Viodarìn ce che a fasaran.
–––
Pal futûr o stais preparant lis gnovis elezions pal Parlament, in Otubar. Cuntune novitât: no sarà dome une consultazion digjitâl…
Sì, chest an o pontìn a vê bussulots pal vôt in ogni Comun furlan, in ambients publics, di mût di fâ la votazion ancje cussì. Chest an no si votarà pe indipendence ma pal Parlament: ducj a puedin candidâsi. Po dopo, te schede e sarà ancje une domande su la indipendence, ma chest colp in secont plan.
–––
Par jessi un moviment in pratiche “natîf digjitâl” tes vuestris pagjinis Facebook no baline tante int…
Tu tu pensis ai “mi piace” di une pagjine cualsisei. La nestre e je une pagjine politiche (Republiche dal Friûl – Repubblica del Friuli) e lis robis a son plui dificilis. Se si fâs il confront cun chês dai partîts politics regjonâi, dome il M5S al à sucès plui di nô.
LA ADESION DI ANZIL_Vie pe interviste o vin fevelât de adesion di Mario Anzil, sindic di Rivignan-Teor, che al à inviât il moviment Tutti per il Friuli par fâ une Regjon Friûl-Triest sul model di Trent e Bolzan.
Sindic Anzil, lui isal autonomist o indipendentist?
Jo no soi indipendentist (al plui mi plasaressin i “Stâts Unîts di Italie”) e forsit nancje autonomist. Jo o soi pe sovranitât dal popul, che plui si esercite di dongje, miôr al è. In chest sens, il Comun par me e je la istituzion ideâl.
Parcè aial aderît a Parlament Furlan?
Parcè che e je une associazion che i ten ae identitât dal Friûl e jo o aderìs a dutis chês cun chel intent. Par me no esistin biei o bruts, impuartants o mancul impuartants. Bisugne superâ lis divisions che a impedissin e a impediran il disvilup dal Friûl. La uniche sperance e je dâsi dongje. ❚
Dree Venier