LInt AUTONOMISTE. Elezions europeanis, nissune acuile?

«Nol è mai un mâl che nol sedi ancje un ben». E pues someâ ciniche une massime dal gjenar, invezit propit partint di une concezion de vite cussì impensade, tantis voltis i furlans si son tirâts fûr de vuate. Duncje, dal taramot dal Abruç a son doi i dâts che – doprâts pardabon – a puedin tornâ di cont in maniere positive. Il prin al è par ducj: il modon al va daûr de speculazion edilizie e cheste e puarte muarts. Il secont al sune pai furlans: l’orcolat dal 1976 nol è stât l’ultin e no sin vacinâts cuintri di lui. Convivi cul taramot al varès di jessi tal nestri Dna. Capî cheste filosofie di vite al vûl dî ancje un rapuart cu la nature difarent di chel che fin cumò o vin vût. Jessi furlans al è dal sigûr un don di Diu, ma ancje la tiere, la aghe, l’aiar, la ploie e il soreli a àn metût man al telâr dal mût di pensâ dal nestri popul.
La politiche no va daûr di chest resonament, dome un pinsîr autonomist al rive, e no simpri, a stramudâlu in program, organizazion e vision gjenerâl dai problemis: intune strategjie di guvier de robe publiche e di definizion dal destin di un popul tal mont.
Un esempli significatîf al ven de situazion di crisi che si è daûr a vivi ancje in Friûl, tes fabrichis, tai cantîrs, tes buteghis.
La zonte regjonâl in cualchi maniere e pense di fâ front al moment dant fûr plui bêçs pe casse integrazion, pai amortizadôrs sociâi, come che ju clamin. Tondo al pense dal sigûr di fâ ben cussì, dal rest la çampe e i sindacâts a sburtin in chê direzion.
A nissun che i vegni tal cjâf di doprâ la crisi par meti man a un resonament su la produzion di doman, par domandâsi se e covente plui energjie o se la Tav nol è miôr molâle.
Tancj a crodin che e sedi une fufigne ideologjiche, ma alore metìnle jù cussì: l’unic setôr no in dificoltât al è chel dai cjamps, dulà che par altri il contadin al vuadagne mancul di prime. Pensaiso che il guvier regjonâl al stedi pensant a chest? A son plui impuartantis lis rondis o i contribûts ai profucs julians e dalmatis, par contentâ la Leghe di une bande e i triestins di An di chê altre.
E cussì ancje lis elezions europeanis e comunâls dal prossim mês non disaran nuie di gnûf. Par altri, cu lis listis blocadis il Friûl si cjatarà une volte di plui sacrificât aes regjons plui grandis e cun plui vôts. Nancje chel che al è stât l’ «efiet Serracchiani» pal Pd nol à puartât nuie a noaltris furlans, viodût il cidinôr di Debora su lis cuistions autonomistichis.
E a proposit di autonomiscj: pal moment no mi risultin acuilots di nissune bande, forsit cualchidun che si crôt furlanist al sarà ancje in liste. Auguris. Ma visaitsi: «Nol è mai un mâl…».
La detule dal principi nus vise che piês di cussì no pues lâ e che si à di meti man a alc.
Dree Valcic