Holaluna, une gnove forme di asîl a Cjasegnove di Tumieç

✽ Al è za di cualchi an che al numar civic 5 di Cjasegnove di Tumieç la cjase di Elisa Cacitti e je vierte a ducj i fruts che a àn dai 6 ai 36 mês di vite. Holaluna e je une alternative al asîl nît: in Cjargne al è l’unic asîl di famee (il plui dongje al è a Puartis di Vençon).
“Mi soi laureade tant che educadore professionâl e o ai tacât a lavorâ cun cooperativis tal ambit de disabilitazion, in particolâr cui fruts autistics. Dopo o ai vût i fîs, e cuant che il gno al veve 8 mês, o ai tacât a viodi ce che o podevi fâ: un tic parcè che o viodevi che ocupâsi dut il dì de cjase, de famee, dal mangjâ mi plaseve. Robe che prin e jere un grum lontane: la cjase par me e jere dome un passâ a fâ la doce, a cjoli ce che mi coventave e tornâ a lâ. In chel periodi, mê mari mi veve fat viodi un articul che però si riferive a un asîl intal Trentin, une realtât diferente de nestre. Di li, mi à tacât a balinâ tal cjâf il fat che a esistevin chestis realtâts. O ai scomençât a cirî plui informazions pussibilis, o vevi sintût di une dotore che e puartave i siei fîs e cussì o soi rivade ae associazion ‘La Gerla’ che i fâs part. Dut chest 6 agns fa: o soi lade a viodi cemût che e funzionave e mi è plasude tant come realtât. La associazion si ocupe de part burocratiche e mi à dade une grande man.
Dopo, la cjase no jere pronte e par di plui o spietavi un altri frut e mi soi fermade inmò un moment. Cuant che la seconde fie e jere grandute, la cjase e jere pronte, o soi restade a pît cul lavôr, e duncje o ai decidût di provâ cheste gnove esperience, sburtade dal fat che no vevi di fâ nissun invistiment. E cussì o ai scomençât tal 2012.
UNE REALTÂT CHE E FUNZIONE_ No mi pari di lavôr, e je une realtât che e funzione e se a vierzessin altris no si fasaressin concorence, anzit! E deventarès plui une rêt e une colaborazion. Lavôr a ‘nd è: dut al sta te disponibilitât che tu âs: jo o soi fortunade, o ai i miei gjenitôrs dongje che tal moment de necessitât a son pronts a judâmi. Fâ rêt al è impuartant ancje par scambiâsi lis esperiencis, par cressi e – parcè no – jessi sostituîts (jo o ai sierât in trê agns dome une dì).
Pai fruts, l’ideâl al sarès che al fos un passaç jenfri la cengle strente de famee e la scuele materne (indulà che a son tancj fruts che a àn un rapuart tra di lôr un pôc limitât. Intune scuele di 20 di lôr il frut intune zornade nol pues rapuartâsi cun ducj). Intun contest come chest, indulà che a son in 5, chei e simpri chei, si cognossin benon. Jo lu ai fat ancje parcè che mi soi cjatade che no savevi indulà puartâ gno fi par che al zuiàs cun altris fruts (la realtât tai nestris paîs e je che a son simpri mancul fruts). E alore, o ai pensât di fâlu jo il puest indulà che gno fi al podès cjatâsi cun altris fruts e te maniere che jo o stimi miôr.”
LA ATIVITÂT E JE FACILE DI VIERZI_ In dì di vuê, cheste ativitât si pues vierzile cence dipendi di cooperativis, baste dome vê un titul di studi adeguât (in tal cjamp di educadôr, sience de educazion, umanistic) o pûr si pues fâ une scuele serâl a Glemone o i cors di formazion che ogni tant a vegnin fats in Friûl.
“Par me al è un lavorâ rilassant. La sodisfazion plui grande e je chê di viodi i gjenitôrs che a van a cjase contents. Il frut che al ven achì al è seguît in dut: dal cambi dal panzit, al durmî, al mangjâ. O fâs ativitâts soredut cuant che a son un pôc granduts: colorâ, lavorâ cu lis farinis. Ogni tant e ven une mê amie a fâ ceramiche, nancje tant par creâ une robe di puartâ a cjase ma propit par zuiâ. O fâs cors di musiche e o lin a fâ cjaminadis par viodi lis robis ator ator di nô. Achì si cjamine discolçs inte jerbe, si sporcjisi e si pues zuiâ intun spazi cence pericui. Tal fâ chestis robis e regne la calme. Magari i fruts a tornin a cjase sporcs ma contents di vê fate une esperience divierse.”
E cussì Elisa si è inventade un lavôr, e à decidût di meti a disposizion la sô cjase e la sô esperience di mari par dâ, cun grande passion e cun tante semplicitât, un servizi in dì di vuê un grum domandât, cence trascurâ la sô famee. ❚
Marta Vezzi