Storie dal taramot platade, Igor Londero: “La storiografie e varès di jessi une arme par dreçâ tuarts”

Une Storie locâl e esist e no je minôr parcè che e je la vôs di un cjanton di mont. Igor Londero al è un di chei che a àn provât a meti adun un di chei mosaics che i plui no cognossin, no par colpe lôr ma parcè che un sisteme “culturâl” nol à volontât di fâ cognossi. Il sô libri “ Pe sopravivence, no pe anarchie” al conte cemût che la int dal borc di Gôt di Glemone e vedi, prin dai sorestants di chenti e di difûr, cjapât in man la situazion dal dopo taramot dal 1976. Cussì o scuvierzìn il mont des tendopolis e dai grups di coordenament, indulà che la int e provave a dâ vite a une forme gnove di democrazie dal bas.
Il lavôr di Igor al è stât includût dal Istitût Treccani tant che element rapresentatîf di chel timp pe nestre tiere. Stant che a Setembar al è l’inovâl de seconde scjassade dal Orcolat dai 15, e l’an che al ven si fasin i 40 agns dal taramot, o vin volût sintîlu.
–––
Intant, cui sêstu in pocjis peraulis…
O soi nassût un an e une dì prime dal taramot, in Gôt, a Glemone. Dopo il liceu classic a Tumieç o soi lât a Triest a studiâ storie. E cuant che o ai scrite la tesi che e fevelave de esperience dal taramot in Gôt, o vevi tal cjâf che no sarès stade dome un tesi di lauree, ma che l’argoment al meretave plui timp e lavôr. La tesi e je stade premiade de Regjon come miôr tesi di caratar locâl dal 2004-05, ma intant o ai lavorât trê agns in fabriche. Giorgio Ferigo che le à vude tes mans mi à segnalât ae Forum di Udin e o ai cjatât un editôr. Lis primis telefonadis cun lôr lis ai fatis tes polsis di vore tal Prosciuttificio Sandanielese. Mi sieravi tal bagn par podê stâ cuiet e o telefonavi ae bravissime Norma Zamparo, che o pues dome che ringraciâle.
Intal Mai dal 2008 al è jessût il libri «Pa sopravivence, no pa l’anarchie». La facende e je partide planc ma dopo al è stât comprât di tante int che lu cjatave dal gjornalâr, ma al vignive let ancje tes academiis, ancje in gracie de biele prefazion di Remo Cacit. In Avost mi soi dit che o o murivi in fabriche o o tentavi alc di gnûf. Cussì o ai molât un contrat a timp indeterminât e une rate di coleghis che ur volevi ben e o ai tentât la vie dal dotorât. Ben o mâl, tra dotorât e co.co.pro., a son 6 agns che o tiri indevant cussì, organizant ricercjis e cunvignis.
La storie locâl e reste la mê passion e o varès voie di lavorâi ancjemò. Il moment però al è trement.
–––
Parcè âstu tacât a scrivi il libri/tesi “Pa sopravivence, no pa l’anarchie”?
Cuant che o ai dit ae professore Anna Vinci l’argoment che o vevi tal cjâf mi à dât dal mat. “Ce vuelistu cjatâ?” e soredut “A cui vuelistu che i interessi?”. Ma stant che e je une professore tant brave mi à dade fiducie. Jo o soi partît de intuizion di un vueit storiografic tra la memorie de tragjedie e la celebrazion de ricostruzion. L’intuizion che tai pôcs mês tra i doi taramots a fossin vignudis fûr robis che a contâlis si rivave a cjacarâ di lidrîs che a rivavin fintremai tal plui atavic substrât da nestre culture, e tal stes timp dal mût che chestis lidrîs si messedavin cu la contemporaneitât (dal Vatican II al ’68 libertari e socialist, de emigrazion al “Modello Friuli”). Culture nestre che po e je la culture internazionâl leade ae tiere: nol è un câs che la citazion che e à il puest di onôr tal libri e je cjapade di “Cristo si è fermato a Eboli”, un libri che come chei di Carlo Ginzburg al à profondementri ispirât il gno lavôr.
Jo o soi dentri te prime gjenerazion che no à memorie direte dal taramot. Duncje la prime che si pues svicinâ a chest argoment cu la juste distance. Tal stes timp, si pues dî che ciertis robis ti jentrin dentri tal lat de mari. Al è un pôc come se cheste storie e fos simpri stade dentri di me.
Ciert che un lavôr impuartant al è stât il riordin dal Archivi Gubian fat di Matteo Ermacora. Cence di chel, no crôt che o varès cumbinât nuie.
–––
Ise une storie cognossude, pandude?
La int e conte simpri des oris, dai minûts, ancje dai seconts subit dopo la scosse di taramot e lis istituzions a contin soredut de ricostruzion. Tes tendopolis invezit al è sucedût alc dal dut estrani a lis istituzions e paradossalmentri dal dut “normâl” pe int. E duncje al è stât un pôc dismenteât. Jo a ai fat soredut intervistis ae int de borgade e, come che spes al capite, e je la domande che e gjenere il procès dal ricuardâ. E il mecanisim al partìs a lavine. No dome lis intervistis a finivin in cantine dopo vê studât il regjistradôr, ma a insedavin un mecanisim di memorie che al lave indevant par mês in cjase dai testemonis, tes ostariis o pe strade. O ai te sachete un puarte clâfs di arint che mi àn regalât doi dal borc, cualchi mês dopo la lôr interviste. O crôt che lis mês domandis ur vedin tornât indaûr ricuarts maraveôs che però in chê volte no àn vût il timp di capî, di rielaborâ.
Dopo che al è jessût il libri, al à vût un grande difusion, cun recensions tai gjornâi e intervistis pe radio. A Glemone a son stâts vendûts centenâr di libris ae int comun: insome, al è jentrât tes cjasis di tancj di lôr.
Dopo al à tacât a zirâ ancje tes academiis. Mi àn clamât a cjacarâ a Rome plui voltis, a Napoli, a L’Aquila. Il motîf dal interès al jere sedi leât al ûs che o ai fat de storiografie orâl, sedi al teme in se che al è un grum sintût e pôc studiât.
–––
Parcè sêstu stât sielzût dal Istitût de enciclopedie taliane?
Un libri al viaze e ti fâs cognossi ator. O soi jentrât tal zîr dai storics che a doprin la storie orâl. Mi àn clamât a Napoli a une cunvigne internazionâl, e po mi àn domandât un saç su chest intervent pe riviste dal AISO. Int di chel zîr li e à cjapât in man il progjet de Treccani e mi à contatât.
–––
Ce contribût crodistu che al puedi dâ ae storiografie de nestre tiere e int?
Cheste e je une domande che mi met aviliment. La int dispès si interesse di storie dome tant che ripâr di un presint che e refude, par nostalgjie. A vuelin cartulinis dal vecjo Friûl cu lis feminis in neri che a cjolin la aghe te fontane cul buinç. Invezit la storiografie che e va a sbisiâ tes plaiis par contâ il presint e interesse un grum di mancul. Un dai temis dal libri sul taramot al è ancje il rapuart tra i studiâts e la int, e jo mi sint simpri fûr puest in dutis dôs lis categoriis. Mi sint fûr puest tra i professorons fîs di professorons (jo fi di muredôr e nevôt di contadins) ma ogni dì in fabriche cualchidun si svicinave par dîmi “cun dut ce che tu âs studiât, ce fasistu chi?”. Par me al varà simpri plui valôr il puarteclâfs regalât dai borghesans che un saç su la Treccani… ma la Treccani e paie! Ancje cuant che mi soi ocupât di storie de ricercje, ce che mi interessave al jere il rapuart tra inteletuâi e int intune epoche, agns ’40-’50, dulà che un studiât nol veve di vergognâsi di savê alc, come vuê.
O varessin di lavorâ su chest: fâ capî a la int che nol baste lei Wikipedia par operâ une ernie, e alore nol baste vê Facebook par jessi sienziâts sociâi e fevelâ di imigrazion o di macroeconomie.
Par me la storiografie e varès di jessi une arme par dreçâ tuarts, par corezi erôrs, ma mi capite di pensâ che ogni tant al bisugnarès dismenteâ par tirâ indenant, come che lis feminis a dismentein i dolôrs dal part. Magari se Diderot e chei altris a vessin savût di Robespierre a saressin lâts a jemplâsi di vin te ostarie, invezit che tacâ la enciclopedie.. ❚
Mauro Della Schiava