La opinion di cui che al à partecipât

Disarìno adiu par simpri al Premi Friûl? E, soredut, ce sino daûr a pierdi? Ce aie dât cheste manifestazion a desenis di artiscj furlans in chescj agns e ce che si podaressial fâ di plui? Lu vin domandât a cui che al è passât di li. Ve ca ce che nus àn dit.
Dj Tubet (Mauro Tubetti), 33 agns. «O ai partecipât trê voltis. Le prime o vevi 15 agns. Vignî al Premi Friûl al jere un must: chi a son stadis fatis lis primis rimis rap par furlan. Chi e à sunât int come i Mitili Flk, che par nô a jerin tant che pionîrs, erois. Cuant che tal 2007 o ai vinçût cui R.esistence in dub, o sin jentrât intun biel zîr, cun int esperte, che e à un ideâl culturâl seri di musiche in lenghe minoritarie. O vin vût atenzion di bande de critiche e dai media. Nus àn fat sintî che o jerin daûr a fâ alc di biel. Par cui che al à un progjet musicâl, dâi une man a fâ un disc, a capî cemût promovisi, e dâi un tic di coraç no je une robe grandiose, di plui. E je come la mîl. Se o ves di dî une robe che e mancje, o pensarès a une struture intermedie che e cjapi sù i grups che a jessin dal Premi e che ju meni ator. Une imprese che e organizi une rêt di concierts, un grant locâl dulà sunâ. Un pâr di datis al an no son avonde pe economie de musiche».
Luigi Maieron, 60 agns. «Mi somee che o sin daûr a pierdi tocs. Il Premi, come cualsisedi concors indulà che cualchidun al è incentivât ae scriture e ae produzion in marilenghe, dant il miôr di se, al è fondamentâl, no nome util. Soredut par un zovin, chel al pues vê une oportunitât par fâsi scoltâ. Cuant che o ai partecipât tal 1994, o vevi cualchi cjaveli blanc di mancul, al è stât impuartant confrontâsi, jentrâ intun circuit, sintî che ce che tu tu fasevis al veve un parcè. Il Premi Friûl al à ancje vût il merit di incentivâ la alternative, lis formis espressivis che in altris contescj musicâi in regjon a risultavin azardosis. Pecjât vê pierdude une ocasion: nancje il Premi Friûl nol à rivât a creâ un coordenament bon di dâi une vôs fuarte ae musiche furlane. Al è stât un biel moviment di artiscj, ma la mê sensazion e je che tantis energjiis a a son stadis butadis vie. Vuê se tu tu cjacaris di musiche furlane a son pardabon pôcs chei che i crodin ancjemò».
Dek Ill Ceesa (Andrea De Candido), 30 agns. «Tal 2005, cuant che o ai vinçût tant che solist, la mê cariere no jere inmò tacade. Par me il Premi Friûl al è dut, se no lu ves fat no sarès chi. No varès vût il supuart economic, ni mediatic, ni tecnic par jessî cuntune opare prime. La vitorie mi à dât dute cheste robe intun colp. Il concors al è stât un volan che al à creât Dek Ill Ceesa ma ancje i Carnicats. Daspò di 10 agns, o podìn ancjemò ringraciâ. Pe situazion musicâl di vuê, il Premi al à fat il massim che si podeve fâ. La sô vocazion e je di scuvierte dai artiscj emergjents, zovins o no. E al à rivât a cjatâ fûr realtâts frescjis e alternativis, lant a cirî lis robis che a valin li che a son. No dome. Ju à ancje seguîts tal dopo: parcè che l’obietîf dal concors nol è mai stât fâ un galà, ma tirâ fûr cjançons e artiscj che a sorevivin al festival dal pont di viste culturâl e comerciâl. Cence Premi Friûl, no sai ce che al reste».
Stefano Montello, 55 agns. «O ai vinçût dôs voltis, tal 1989 e po tal 1991 cui Mitili. Al è stât un moment impuartant parcè che in chê volte il Premi Friûl al jere pardabon une vetrine di ce che e jere la vite de musiche in Friûl. Al jere un pont di riferiment, un lûc viert, vitâl. Tai agns, però, la mission di dâur un palc a ducj par fuarce, ancje cuant che la ufierte e jere scjadinte, ancje a cui che nol veve nuie di dî o al maltratave la lenghe, e à contaminât il spirt rivoluzionari e inovatîf dal inizi. I cadavars a van taiâts fûr. Se i premis no rispuindin plui aes esigjencis dal teritori a son une vetrine fine a se stesse. Vê un palc no à di jessi la prime o la seconde robe di fâ, ma la vincjesime. Meti sù une band nol è un scherç, no si fâs ogni dì. Cjatâ un lengaç gnûf al è dificil. I musiciscj a àn di tornâ tes cantinis come i cjarbonârs, doprant i imprescj de tecnologjie, e lant a cirî ce che al è sot, underground, no ce che al è parsore, masanât milante voltis. E dome dopo, cuant che a son pronts, vignî fûr».
Federico Galvani, 42 agns. «O vin partecipât al inizi come Arbe Garbe e o vin vinçût tal 1998 cui Croz Sclizzâz, un progjet avonde strani, cun Fabian Riz. Al è stât un biel trampulin e nus à metût in contat cuntune sene interessante pe sperimentazion linguistiche e di lengaç musicâl. Nô o vevin za la nestre produzion, ma se mi met al puest di un che al à a pene scomençât, cheste e je une gruesse oportunitât par produsi un disc, e cjatâ un siôr studi di regjistrazion tant che chel di Stefano Amerio. Cence il Premi, la sene de musiche in lenghe furlane e piert un toc rilevant. Ma la domande e je: aial inmò sens cjantâ par furlan? Nô o vin scomençât cul furlan, po o vin miscliçadis lis lenghis, l’ultin disc no ‘nd veve nancje une peraule e cumò si sin disfats. Al è miôr meti une biele crôs parsore a ce che al à di murî, cence puartâ indevant “the walking dead”. Ma forsit no je inmò rivade la ultime ore».
Lino Straulino, 54 agns. «Il Premi Friûl tai agns ’90, ancjemò prime de tutele pe leç dal furlan, al jere un circuit li che a vignivin fûr prodots che e àn dât dignitât ae lenghe, al jere un teritori vergjin di sperimentazions libaris des costrizions e de ereditât dai agns ’70. Tancj di nô a vignivin dal mont contadin, a vevin un rapuart epidermic cu la lenghe, o jerin une gjenerazion che e veve une apartignince culturâl e identitarie fuarte. Par sô nature, il Premi al jere un festival libar, forsit par chel no à mai cjapât un franc. Però vuê si è consumât un cicli, no dome pal concors, ancje pe musiche furlane. Il sburt di bande dai artiscj si è smamît, il spirt origjinâl al è pierdût. La mularie si sta disafezionant, si invente i tocs par furlan dome par partecipâ al Premi, i crôt di mancul. O sin intun moment di impasse. Nus mancje une fuarce in plui par fâ de musiche furlane alc di unic e che no imiti la musiche di chei altris, e cheste gnove linfe no si viôt ancjemò». ❚
Natascia Gargano