SLOVENIE. In Italie cumò e je “la buine scuele”, ma in Slovenie cemût ise la scuele?

Il prin di Setembar in Slovenie e je sunade la prime campanele dal an scolastic 2015/2016 e il so principi al à coincidût cuasi cu la fin dal prin an di lavôr dal guvier di Miro Cerar(ai 18 di Setembar). E je stade duncje cheste une ocasion otime par analizâ la ativitât fate da singui ministeris, cjapât dentri chel de istruzion vuidât di metât Mai di Maja Makovec Brencˇicˇ, nomenade ministri dopo lis dimissions, prime di Stanka Setnikar Cankar, e po dopo di Klavdija Markež (in cjarie dome pôcs dîs).
I ASÎI_ In Slovenie i fruts a puedin scomençâ il cicli prescolastic (che al coincît cui asîi nît e cu lis scuelis de infanzie) e frecuentâ i asîi dal compiment dal 11 mês. A pet de situazion in Italie, i asîi in Slovenie no sierin dilunc dal Istât.  Ae fin dal an scolastic passât, i asîi slovens a jerin frecuentâts di 89 mil fruts, il numar plui alt fin cumò, cuntune percentuâl di inclusion dai fruts in etât prescolastiche dal 76,8%.
IL CICLI PRIMARI_ In aument continui a son ancje i arlêfs dal prin cicli scolastic, che al corispuint aes primariis e secondariis di prin grât in Italie e che al dure in complès nûf agns. Il numar dai arlêfs chest an al à fat regjistrâ un aument sensibil: a son di fat cuasi 173.960, sui 6 mil in plui a pet dal an scolastic 2014-2015. Di chescj, 21.807 a son i fruts iscrits al prin an. La tindince positive, daûr dai dâts dal ministeri, e varès di lâ indevant e rivâ cuasi ai 182 mil arlêfs intal an scolastic 2018/2019. Par ce che al tocje il program formatîf, al è previodût tant che materie facoltative il studi di une lenghe foreste pai fruts des primis classis. Dal an scolastic prossim il studi di une lenghe foreste al sarà obligatori invezit de seconde classe.
AE AVANVUARDIE PAI METODIS_ Novitât ancje par ce che al tocje il gustâ sovenzionât dal Stât pai arlêfs. Fin cumò a vevin dirit al gustâ a gratis i fruts des fameis là che il redit pro capite nol passave il 18% de paie medie a net slovene. Dal prin di Zenâr la percentuâl e vignarà cressude al 36%, slargjant ancjemò di plui il numar di chei che a àn dirit e che, daûr des stimis dal ministeri, a varessin di jessi plui di 8.500. Il compens mensîl net medi dai lavoradôrs slovens in Lui al rivave a 1.005,06 euros.
La Slovenie e je di agns tra i stâts de UE che a son, ancje in cjamp scolastic, plui ae avanvuardie par ce che al tocje metodis inovatîfs: comunitâts virtuâls par insegnants, classis virtuâls, ûs di ordenadôrs, internet e altris struments tecnologjics. A son 710 i istitûts di formazion (cjapâts dentri asîi, scuelis e altris istitûts) che a son furnîts cun tecnologjiis modernis. A son stâts cuistâts 2.265 ordenadôrs, 1.303 portatii e 113 proietôrs. Il 70% dai arlêfs e students slovens al frecuente istitûts che a àn a disposizion un colegament internet a fibre otiche (1GB/s la velocitât garantide).
RUSSACS PLUI LIZÊRS_ Cun di plui, za dal 2004, il ministeri al è daûr a c irî di ridusi il pês dai russacs e borsis dai fruts promovint la creazion di libris di test eletronics, aurint ancje ai fonts europeans. Cumò a son daûr a testâ 42 libris di test digjitâi, interatîfs. Vincjecinc tra chescj a son stâts za confermâts. Pai students des scuelis secondariis e pai universitaris e je stade creade  di pueste ancje la aplicazion mobile „eVŠ“ che ur permet di acedi a informazions sui programs di studi e su ufiertis particolârs che ur son dedicadis, des pussibilitâts di lavôrs pai students aes borsis studi. ❚
Tjaša Gruden