San Simon e Zâl par furlan: tante cualitât e partecipazion pai concors di leterature furlane, e tantis novitâts a son par rivâ. Une “Vierte di Invier” pe leterature furlane

La premiazion dal concors San Simon 2015 pe leterature furlane si è davuelte ae fin di Novembar stât, intant che o jerin in stampe. Aromai a san ducj che lu à vinçût Raffele Serafini, animadôr dal blog leterari “Contecurte” e ancje nestri colaboradôr. La opare che al à presentât e jere une racuelte di contis mitologjichis, Soreli jevât a mont: une opare une vore particolâr, come che si lei tes motivazions dadis de jurie pe assegnazion dal premi, «Une racuelte organiche e coerente di contis, che e met dongje la tradizion gjaponese intes sôs analogjiis spiritistichis a tocs une vore sugjestîfs de storie e de culture furlane».
E je la prime volte di cuant che a son stadis tornadis a meti in concors lis racueltis di contis oltri ai romançs, che e vinç une opare di cheste fate. In finâl a jerin in trê: cun Serafini, Gianluca Franco cul romanç storic Il buinç, e Adriano Nascimbeni (vincidôr intal 2010) cul romanç “noir” Un fi par Santine.
I lavôrs rivâts chest an a son stâts nûf. Ancje se cinc di mancul dal an passât, il president de Jurie, Carlo Tolazzi, al à marcât che il nivel cualitatîf dai lavôrs al è stât une vore bon.
In sumis, al somee che a sedin passâts i timps li che Tolazzi al diseve di dut cuintri de cualitât dai partecipants e de tecniche e de lenghe dopradis, fin a rivâ a no assegnâ il premi pal 2013.
Il probleme al jere forsit dome chel di une formule aromai vecje e fruiade. Chest an il premi si è “vierzût”, ancje cun seradis di contor: une par Franco Marchetta, une cul scritôr romanç Arno Camenisch, une serade li che si presentavin i finaliscj selezionâts, e la serade finâl cun la proclamazion dal vincidôrs. Dutis cuinçadis ancje cun intervents musicâi.
BEN ANCJE IL ZÂL
Une indicazion di buine salût che nus ven ancje di Spilimberc, li che si è davuelte la premiazion “Zâl par Furlan”, fat par autôrs di contis “zalis” in lenghe furlane, un concors rivât ae cuinte edizion. Il vincidôr al è Ivan Zampar, insegnant di Çarvignan, cu la conte “La gnot de civuite” inte sezion contis; inte sezion fumuts, prin Francesc Bisaro di Sant Zorç de Richinvelde cun “La senade”. Pe sezion scuelis, il prin premi al è lât ai fantats de “seconde A” des scuelis mezanis di Cosean cu la conte “Une bombe in palestre”. Al di là dai premiâts, al è di marcâ che ancje chest concors al à vût grande partecipazion (16 autôrs pes contis e ancje di fûr dal Friûl) e che in gjenar la cualitât sedi tecniche (tal contâ) che di lessic e di grafie e je stade une vore alte: aromai i furlans a san scrivi ben in lenghe ancje dal pont di viste formâl. I prins in graduatorie a son stâts separâts di pôcs ponts.
LIS NOVITÂTS PAL FUTÛR: FUMUTS AL SAN SIMON E VIDEO A SPILIMBERC
Lis dôs manifestazions no si sentin daûr di chescj risultâts, ma pe edizion che e vignarà a àn za i fiers in aghe par proponi altris novitâts. A Spilimberc si siere la sezion fumuts, masse strente par un argoment specific tant che il “noir”, ma si vierzarà une sezion video cul concors par cines curts di 5 minûts. Une idee par coinvolzi i zovins, une gjenerazion che su YouTube e messede ben chest media. Il San Simon, biadelore, si vierzarà ai fumuts: a saran ametudis in concors lis “grafic novel” ven a stâi i romançs a fumuts, dopo che ancje grancj concors talians tant che il Premi Strega a àn ametût cheste gnove espression artistiche grafiche leterarie. Chest an, l’autôr ametût in concors al è stât il roman Zerocalcare, l’an prime il toscan Gipi. ❚
Dree Venier