Un Arc di Sant Marc che al ven de Svuizare: il lavôr teatrâl di Ferruccio Cainero

E je la Svuizare todescje, chê francese, taliane, rumance e chê…furlane. E no dome pai tancj migrants che a son partîts dal Friûl e che no son plui tornâts, ma pes contis su la sô tiere di divignince che Ferruccio Cainero, origjinari di Udin, al puarte tai teatris svuizars a partî di chei dal Cjanton Ticin dulà che al vîf aromai di trente agns.
Autôr, ator dai siei tescj – e ancje musicist -, al à fat cognossi tai agns tal so Cjanton e ancje inte Svuizare todescje Grau, Aquilee, Sant Denêl e Udin, fintremai cui nons des lôr stradis. Come che al è sucedût cun “Cosmos”, il penultin spetacul che al à imbastît, dulà che al spieghe lis leçs che a guviernin l’Univiers midiant la organizazion de vecje Oficine Cosmo di Toni De Lucia, che e jere in vie Cjace a Udin.
IL GNÛF SPETACUL
E al è stât propit De Lucia l’ispiradôr dal gnûf spetacul di Cainero che al à debutât ai 9 di Otubar al teatri sociâl di Bellinzona e po si è inviât pe tournée. Si clame “L’arc di San Marc” e al è ispirât al test “La notte della chiesa di Aquileia” di pre Gilberto Pressacco, che propit De Lucia, une dì che al jere sui scjalins de biblioteche Joppi a Udin, i veve conseât di lei. Che par un furlan no si podeve fâ di mancul. “Al jere ancje Leonardo Zannier a viodilu – al à contât cualchi zornade dopo – e par solit a son simpri cualchi emigrant o fi di emigrants tal public”. Dut câs, lis sôs storiis a son par ducj e lui al conte dal Friûl e de sô vite fintremai che al è restât chenti o par talian o par todesc, cuant che al va te Svuizare todescje. Ancje se tal spetacul nol mancje mai une peraule o ben une cjançon par furlan.
CUINTRI
LA MONOCULTURE
Un pôc di miscliç di lenghis che Ferruccio Cainero lu fâs cuntun precîs obietîf, chel di mantignî simpri alte la atenzion sul plurilinguisim. “La tindince dal podê – al considere – e je chê de semplificazion, de monoculture, che po un pôc ae volte e vûl dî la muart. Baste viodi tai cjamps, che se a son lassâts tal lôr jessi a son un florî di diversitâts e se invezit a son costrets ae monoculture bisugne implenâju di acolt”.
Secont Cainero, proponi e difindi il plurilinguisim e je la strade par tignî vivis lis minorancis. “Si à di fâ in mût che – e je la sô teorie – la maiorance di un popul, di un Stât o ce e vedi la cussience dal valôr dal plurilinguisim. Forsit in dì di vuê chest al è il rûl des minorancis, par vie che in cheste suaze a rivin a mantignî la lôr esistence. Intune societât plurilengâl, la minorance e à bon acet e si è braurôs di jessi part di une minorance. Vicevierse – al continue -, se e impere la ideologjie dal monolinguisim tu vegnis mangjât”.
LA SENSIBILITÂT SVUIZARE
Si trate di un discors che in Svuizare al cjate teren, par vie che “achì la sensibilitât sul plurilinguisim e je plui svilupade che in Italie”. Cainero si impense che ancjemò scuasit trente agns za fa, intun censiment che e fasè la Confederazion, si domandave di scrivi ce lenghe che si fevelave. “Po ben, ta chel document uficiâl al jere ancje scrit: chei che a fevelin furlan che si segnin tal ricuadri dal Rumanç”.
E a proposit de lenghe rumance, al conte che e je “une lenghe ancjemò vive pardabon. Tal Cjanton dai Grisons si pues dî che ducj a fevelin trê lenghis, todesc, romanç e talian e che al è un impegn continuatîf par che il rumanç nol sedi scjafoiât dal todesc. Si trate – al siere Cainero -, di une lote gaiarde e che à bogns risultâts”. ❚
Antonella Lanfrit