IL GRANT LUNARI DAL FRIÛL. Dicembar

Il non dal mês al ven di December, il diesim dal antîc calendari roman di Numa. Dicembar al è il diesim secont e ultin mês dal an. Chi la grande ruede dal timp e ferme la sô corse, lant daûr di chê dal soreli che si ferme tal so pont plui bas, il solstizi. Di fat, viers il vincjesim prin dì il soreli al pâr tocjâ il pont plui profont de elìs li che al ferme la sô corse tal emisferi austrâl o zodiac di meridion par tornâ a cjapâ la corse par ledrôs, chê viers setentrion, che lu puartarà fintremai al solstizi di Istât. Par chest, Dicembar al siere dal dut la Sierade e al fâs tacâ l’Invier. Tal grant moment dal solstizi, lis zornadis a son ridusudis al lôr minim di lûs e di durade, intant che lis gnots a son ae lôr colme di scûr e di lungjece; al è chest il moment critic dal passaç dal solstizi, pont clâf dal cicli eterni dal timp e dal cosmi, li che il scûr al vinç su la lûs, cuant che dut al mûr par tornâ a nassi, dut al finìs par tornâ a scomençâ tal ritmi misteriôs dal univiers.
In chest pont di fonde dal calendari atronomic, fieste de lûs che e torne a nassi (o ben Nadâl dal soreli) e che e tache a tornâ a cjapâ fuarce te maree dal scûr, tantis civiltâts e tradizions di culture a àn celebrât simbolisims di soreli une vore fuarts e il stes cristianisim al à logât propri a chest pont la nassite di Jesù Crist. Duncje, la grande fieste dal solstizi-Nadâl e à metût adun une vore di caratars e significâts sacris, magjics e tradizionâi che ancje la “societât agrarie” furlane e à simpri fiestezât, tramandant fin al dì di vuê dute une schirie di usancis e consuetudinis popolârs. Tal Friûl de alte il simbolisim dal solstizi (vâl a dî lis alegoriis de lote jenfri la lûs e il scûr) al è ancjemò introdusût de fieste di Sant Nicolau cu la sô lote cuintri i krampus, entitâts des tenebris e fuarcis ctoniis de nature, par po jessi puartât indevant dapardut de fieste di Sante Luzie (date antighe dal solstizi di Invier) che come Sant Nicolau e puarte regâi augurâi ai fruts. E va indevant duncje cul Nadâl, fieste des fiestis te tradizion de partecipazion ai rituâi religjôs, aes usancis culinariis, aes lûs dal peç furnît pe fieste e al presepi, par po lâ indevant tai rituâi de cuestue di bon auspici e des usancis dal Prin dal an par sierâsi, propri un mês dopo dal so inizi, tal grant spalt pe fieste de Pasche Tafanie.
In Dicembar i cuadris de nature a son dispueâts, fers e desolâts, come muarts sot di cîi pençs; i arbui incantesemâts, la jerbe secje e scridelide, monts, culinis, boscs e plans a son deserts, a tremin sot des scoreadis di aiar glaçât o a son sepulîts sot di une coltre di nêf, intant che il mâr al è in burascje o ingrispât des bugadis de buere. In Dicembar dut al è pardabon finît sot dal mantiel dal frêt, de glace, de nêf e des brinadis. Dome tal scûr e clip vintri de tiere la vite vegjetâl e polse tes lidrîs e tes semencis che planc a planc si trasformin, biel che chê animâl e duar fisse, te spiete che al torni il clip dal soreli. ❚
Mario Martinis
______
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion