IL FERÂL. Tignî dûr

Al jere il 1981: a 5 agns dal taramot, servitûts militârs ancjemò a plen… e pre Antoni al comentave sul ultin mês dal lunari e al invidave a no molâ. Vuê il contest storic al è cambiât, ma il sfas de Italie di cumò al è il centralisim simpri plui evident che al scancele e al scjafoie lis minorancis… bisugne tignî dûr, ancjemò.
(Redazion)
***
O sin rivâts ancje chest an insom dal lunari e o stin par roseâ l’ultin sfuei. Tal mont si viôt bombis, violence, straçariis, porcariis, injustiziis e tantis altris robatis che a cressin simpri plui; e voie di fâ ben che e cres simpri mancul. Ma però o sin persuadûts che, se ancje a nivel di place o di gjornâl o di grande plere che e fâs opinion, i prepotents e i furbos e i lazarons a cjapin simpri plui spali, a nivel di persone (chel che lu clamin «riflùs») a ‘nd è simpri int che e lavore, e scombat, e pare indenant la carete cun fede e cence fâ scjas. A son chei che a pochin indenant la storie, ancje se no laran mai a finîle sui libris di storie.
Tal nestri Friûl, che al è tal mont, la sunade no pues jessi diferent. Se si cjale la façade e la part uficiâl (istituzions, partîts, scuele, gleseam, studiâts e vie) e ven la disperazion e il convuls. Se però si pense a tancj furlans che dì par dì, cun pazience e passion, a stan cjapant cussience dai problemis de nestre tiere e si consumin la vite tal lavôr e tai principis sans de nestre tradizion plui gjenuine, alore il cûr si vierç ae sperance e si scuen tignî dûr e lâ indenant. Par no che la storie, simpri strie cui tibiâts, ju folpei inmò di plui; par che a puedin jessi simpri plui lôr a indreçâ il tamon de storie. Par dâur vôs a di chei che no ‘nd àn; par dâur une man a di chei che se meretin.
Svolant, par resons di puest, sui grancj berdeis nostrans (fruts che a scuegnin glotisi une scuele foreste; mestris che no àn inmò capît che si à di rispietâ il canai te sô storie personâl e sociâl; predessam che i ten plui al pape che no ae sô int; studiâts che si capìs che a àn studiât dome parcè che no rivin adore di fâsi capî; universitât che e pararès plui bon tun repart di rianimazion che no là che le àn imbastide; gjavis di tiere buine te Basse e spopolament te Alte; crisi de industrie ancje là che si crodeve che e ves fondis saldis; invasion tai ufizis e tes istituzions statâls e parastatâls di dute la pestilence e prepotence talianote; tradiment sistematic dai partîts di dut ce che al è «cuistion Friûl», e vie indenant) si fermarìn un credo su cualchidun che nus somee che si scuen bati simpri cence mai stufâsi.
I paîs dal taramot si cjatin intrigâts parcè che bêçs no ‘nt rive, almancul pe int. E i bêçs no rivin parcè che la barache taliane e je a remengo e i sorestants lis àn tentadis dutis, fale che une politiche di serietât e di programs prime che di formulis e di etichetis. Po ben, i bêçs dal taramot o vin dirit, e lôr a àn di dâju. E je ore passade che par salvâ la nestre patrie si scuegni spietâ di salvâ il baracon statâl. Che nus dedin il nestri e che a vadin a trai.
E sul trai al ven fûr il secont berdei: che in Friûl no podìn plui lâ indenant cun tantis sclopis e casermis. Chest an a àn batût fieste e disdivore, cun cjampane grande e campanel, su la fortune di vê il plui grant concentrament militâr de republiche. Si à viodût ce sorte di fortune che nus puartin e ce tant dam ancje morâl che nus tocje cjapâ di mieç. Se l’Italie e à chê di difindisi, che si cjati altris braidis di sbarâ e fâ marciâ i soldâts. Cussì ancje altris regjons, in non de unitât «nazionâl», a podaran sintî a cjantâ pes casermis e a podaran fasi une palanche cul spaç de droghe e cui putaneçs e a podaran lei il non dai lôr paîs ogni dì su chê cronache che nol stâ ben jessi metûts. Vonde cu lis sclavitûts militârs. Ancje in non de pâs, che cumò, magari a cjacare, ducj le bramin.
L’ultin cantin, ultin parcè che plui cjâr ma prin par impuartance, al è chel di salvâ no dome la culumie e il teritori e la pâs e di tornâ a fâ sù il Friûl ferît, ma ancje di dâi dignitât e onôr e sflandôr ae nestre culture, fasintle deventâ il pan di ogni dì e di ogni situazion. e no une massepassuderie o·un lus par studiâts o nostalgjics. Tun mont che al cambie di fâ spavent, o volìn che a cressin fueis gnovis ma su la lidrîs di simpri.
O invidìn partant ducj chei che a disin di vê a cûr la nestre tiere, a metisi une man su la cussience e a domandâsi se a àn fat dut ce che a podevin e se magari a puedin fa alc di plui. No crodìn a int che e ven di fûr a salvânus. Nus mandaressin il cont in zornade. Nant che a sedin i furlans a ripiâ la paronance de lôr storie e de lôr culture.
La strade, lafè, e je lungje e lis tentazions di fermâsi, di voltâsi, di rassegnâsi; di dî che aromai ce che al è al è, a son tantis. Ma o volìn sierâ cheste tabaiade e augurâsi un bon an, cuntune peraule grande dal vanzeli. Là che al dîs che si salvarìn cul TIGNÎ DÛR. E stant che, te storie, ce che nol à stât al pues vignî e ce che al à stât al pues simpri tornâ, magari tune forme gnove, cui aial dit che il sfas de Italie imblecade tal risorziment nol puedi sei une ocasion fenomenâl par che e florissi chê diviersitât regjonâl e etniche che, cence gjavâ nuie, i darès plui savôr e tignince al dut? E ancje chi un’altre detule: la muart dal lôf e je la fortune de piore. Te conte di Scufute Rosse, vierzint la panze dal lôf, e je saltade fûr la none, spirtade e scjalteride, ma vive. E parcè, passant ae realtât, spacant l’Italie no podaressial saltâ fûr un Friûl furlan?
Nissun no us improibìs di pensâ che il doman al sedi plui biel di vuê e nissun no nus improibìs di scombati par che dut chest al sucedi. Par chel al val la pene di stâ pronts aes novitâts de storie e di tignî dûr ancje cuant che al somearès che al sedi timp straçât. Che se al è un timp ben spindût, al è chel spindût lotant pe proprie tiere e pe proprie int. ❚
La Patrie dal Friûl n. 11-12 dal 1981
pre Antoni Beline