Un imprenditôr al servizi dai emigrâts

Adriano Luci, classe 1960 – imprenditôr di Tavagnà, a cjâf dal grup familiâr atîf tai setôrs ambient e edilizie – al è il gnûf president dal Ent Friûl tal Mont (Ente Friuli nel Mondo). Al è ancje vicepresident de Bancje di Cividât. E al è stât numar un de Confindustrie di Udin.
La assemblee dai socis lu à designât ai 3 di Dicembar: sot di lui al varà passe 23mil iscrits, che si dan dongje in 155 Fogolârs tal mont.
––
Adriano Luci, cemût si isal rivâts al so non?
Par dî il vêr, no mal soi mai domandât. Salacor a cirivin un imprenditôr par dâ un leam plui strent aes relazions ancje di caratar economic, a nivel internazionâl. Mi àn domandât la disponibilitât, e jo le ai dade.
––
Cemût saraial alore l’Ent Friûl tal Mont sot de sô presidence?
Al moment o stoi cjapant lis misuris par capî la organizazion di une machine avonde complesse, cetant sparniçade, cul obietîf di incuadrâ i ponts di fuarce e di debilece par impostâ lis relazions in sens reciproc: dal Friûl viers i Fogolârs e il contrari. E par mantignî i contats cui coregjonâi tal forest in Italie, in Europe e tal mont.
––
Cuâl aie di jessi la funzion dai Fogolârs e di chest Ent, tal 2016?
Atenzion al passât e atenzion al avignî: si trate di proponi une divierse vision dal fat di jessi emigrants furlans: o crôt che cu lis gnovis tecnologjiis e lis gnovis formis di comunicazion si puedi meti in cjamp e ativâ colaborazions par rindi plui facii i rapuarts, ancje in clâf socio culturâl e economiche. L’Ent al è come une ricete cun tancj ingredients miscliçâts. Tant plui a son vivarôs, tant plui la ricete e devente concretizabile.
––
Il so predecessôr, Pieri Pittaro al diseve che chescj Fogolârs a varessin di jessi tant che ambassadis par sburtâ i rapuarts imprenditoriâls.
Cheste e je une afermazion juste e si larà indevant in chê direzion. I Fogolârs a son un patrimoni che, se metût in rêt, al pues jessi un jutori par ducj i doi i atôrs in cuistion: i nestris imprenditôrs che a vuelin cjalâ i marcjâts dal forest, e i nestris coregjonâi tal mont che a vuelin jessi plui dongje e dâ il lôr contribût par competence e esperience. Vuê o vin gnovis gjenerazions che no son nassudis chi e che dal Friûl a àn dome sintût fevelâ, ma a sintin il plasê di cognossi lis origjins dai lôr vons.
––
Intun passât avonde resint, i rapuarts dal Ent cun chês altris associazions che si ocupin dai furlans tal mont a son stâts un pôc dificii. Al varà let sui gjornâi, dutis lis polemichis… Lui cemût intindial lavorâ su chest cantin?
O soi simpri stât pes robis concretis. E o partìs di chest concet: se un ent o une associazion a son in stât di mostrâ il motîf che a esistin, al è just che a vedin il spazi par rapresentâ esigjencis e spietis di chei che a rapresentin. Pal rest, al vâl un altri principi: bisugne misurâsi sui progjets e sui fats. Se però une associazion no à chei criteris, forsit e varès di jessi tornade a pensâ. Ma chest nol è compit gno, ni dal Ent Friûl tal Mont.
––
La marilenghe ce spazi varaie dentri di Ent Friûl tal Mont?
E sarà atenzion pe lenghe furlane, ma nol sarà il nestri obietîf primari. A son altris orghins che a àn chest ogjet sociâl.
Cemût aial cjatât la situazion economiche dal Ent?
I conts a son a puest. Cui che al è vignût prime di me al vedi fat un grant lavôr: Santuz al à cjapât in man une situazion che e veve une cierte complessitât. Pittaro al è lât indevant su chel stampon. Fûr di dubi che cumò l’ent al à i belançs in ordin.
––
Cuant che, in confidence, a Pittaro o ai domandât il profîl dal gnûf president, lui mi à rispuindût: vê tant timp libar par viazâ e incuintrâ i Fogolârs. I domandi: lui, aial tant timp libar?
No ‘nd ai. Ma o sai organizâmi. Cuant che un al fâs dîs robis, al rive a fânt ancje undis. Po dopo, o speri di jessi un president che al puedi gjoldi de colaborazion de Zonte e dal Consei diretîf dal Ent. O cirarai di fâ dut ce che al covente pal impegn che mi soi cjapât: l’Ent al sarà tra lis mês prioritâts, dongje de mê famee e dal gno lavôr.
––
Cuâl isal il whatsapp o sms di congratulazions che i à fat plui plasê cjapâ?
No ’nd è un in particolâr. Ma la robe plui biele che mi è stade trasmetude al è chel sintiment che al è tal considerâ l’Ent e il so rapuart cul teritori tant che alc di fuart e di valit. Mi plasarès valorizâ ancjemò di plui chest patrimoni, che al è grant. Cierts voltis si va a cirî lis ricjecis di altris bandis, cuant che invezit lis vin inte sachete. O speri di podê lâ indenant su chest troi, puartant lis mês esperiencis tant che imprenditôr che si diferenzie par dinamisim e par voie di fâ. Lu fâs par volontariât e mi fâs plasê par vie che lu fâs pal gno teritori, pe mê tiere dulà che o soi nassût. Par chest, o ai gust di jessi considerât un ambassadôr dal Friûl tal mont.
––
Volontariât? No i dano un gjeton di presince?
Chescj a son incarics là che un al met a disposizion il so timp, cence spietis. Dut câs, no: nuie gjeton.
––
Pittaro al è stât une sorte di Wojtyla dal Ent: simpri ator par Fogolârs. Ancje lui viazaraial une vore?
Jo o dîs: il contat fisic al è impuartant. Viaçs a ‘nt saran: al prin di Avost, in Argjentine. Dopo o screarìn il Fogolâr dal Congo. Ma no volarès fâ une programazion dome suntun an, ma su 4, tant che al dure il gno mandât. Di mût che ducj chei Fogolârs che a àn plasê, intenzion e volontât di scambiâ progjets, contats e resonaments, a vedin di vê il spazi par fâlu. ❚
Oscar Puntel