Tgr F-VJ: il cûr al clope bande Triest La inchieste anuâl sui contignûts dal telegjornâl regjonâl

Cuant che l’assessôr regjonâl Gianni Torrenti al à dit che a Triest no i covente di deventâ citât metropolitane parcè che cu la abolizion des provinciis e sarà la sole capitâl de regjon, i furlaniscj di chenti a son restâts scandalizâts. Ma baste dâi un cuc al telegjornâl regjonâl de Rai par rindisi cont che cheste e je bielzà une realtât. E je prin di dut une facende di timps, come che a pandin lis tabelis che o publichìn e che a son il risultât di un scrutini fat te setemane di Domenie ai 14 a Sabide ai 20 di Fevrâr (e confrontâts ancje cul stes scandai fat te stesse setemane l’an passât ndr).
De profundis par Gurize. Al teritori de provincie triestine, il 22% de popolazion regjonâl, i tocje il 21,9% dal timp totâl, e a Udin, cun plui dal dopli di popolazion, i rive dongje il 21,8%. Cuasi pate: la capitâl dal Friûl no je mai rivade tant dongje di Triest. Tierce la provincie di Pordenon: e à il 23% de popolazion, ma dome il 12,6 dal timp dal Tgr, come l’an passât. Un grant pas indevant rispiet a cualchi an indaûr, ma simpri masse pôc. “Cinisintule” de situazion, daûr di une tradizion aromai storiche, la provincie di Gurize: 12% de popolazion, 10,70% de croniche. A pet dal scrutini fat tal Fevrâr dal 2015, al somearès un grant progrès: ma se si jentre tal particolâr, si viôt che la plui part des gnovis a son su Monfalcon, massime sui cantîrs. Par Gurize citât, invezit, un De profundis: stant al Tgr, intune setemane nol somee che al sedi sucedût nuie.
Se no sin aes diferencis di cualchi an indaûr, cuant che Triest si cjapave passe il 40% dal timp, al è dome parcè che la gnove direzion i à dât al Tgr une ande plui “regjonâl” come che al pant il fat che al prin puest di cheste graduatorie, cul 33% dal timp, a son lis gnovis di caratar “regjonâl”, ven a stâi chês che a interessin ducj i citadins de regjon.

Ce bon il vueli triestin. Un sfuarç di ecuilibri plui di forme che di sostance, parcè che il cûr dai gjornaliscj dal Tgr al clope simpri bande Triest. In cualchi câs si rive al ridicul, come cuant che a fasin un servizi su la fiere Cucinare di Pordenon e a fevelin la plui part dal timp di cetant bon che al è il vueli che si fâs tal Cjars triestin: e lis ecelencis enogastronomichis di Pordenon? Se a van a Monfalcon a fevelâ dai problemis dal puart, il teme al devente la impuartance di dâsi dongje cul puart di Triest. A fasin une servizi su la racuelte di firmis tes universitâts a pro de veretât sul câs Regeni, e a intervistin dome dôs ricercjadoris dal ateneu triestin. Tai servizis sul balon di Lega Pro, po, a scuegnin par fuarce fevelâ des scuadris dal Friûl ocidentâl, ma lis imagjins a son chês de partide de Triestine.
Il fat al è che pai gjornaliscj dal tgr, ce che al sucêt a triest al è simpri plui impuartant e al ven simpri prime, come che e pant la tabele su lis 10 gnovis che a ocupin il prin puest tai titui di viertidure: su 7 zornadis, Triest al à la prime posizion par 3 voltis, cu lis primariis dal Pd che nus àn fat cognossi ogni pêl de barbe dal sindic Cosolini e ogni tele di ragn de sale dal consei comunâl. Chês altris cuatri a son su argoments di caratar regjonâl. A Pordenon e a Udin nol è sucedût nuie che al meretàs la prime posizion. Discors compagn par ce al tocje lis gnovis che a cjapin plui spazi, duncje plui impuartantis: tes primis dîs, 4 a son di Triest: il tormenton su lis primariis dal Pd al cjape 7 minûts e 15 seconts. Altris 4 di argoment regjonâl, e dome une parom di Udin e Pordenon. Par no fevelâ des imagjins. Ducj i servizis su Triest a son compagnâts di imagjins frescjis, fatis in zornade: par chei sul rest de regjon, dispès e vulintîr a van in onde imagjins di repertori. Salacor ancje fûr di stagjon. ❚
✒ Mauro Tosoni