DI SCJAS IN SCJAS: I TARAMOTS INTE STORIE FURLANE. 1222: un gnûf scjas al bute jù cjasis, ma al fâs sù… Udin

Isal mai pussibil che une tragjedie tant che un grant taramot e puedi jessi la ocasion par introdusi une gnove plee de storie? Par tacâ a pensâ il mont intune maniere diferente? Al pâr propit che in Friûl cheste e sedi di simpri la cifre segrete, il miracul platât tal cûr de nestre int, che tai secui al à savût voltâ il disastri in gnove prospetive, e il scjas dal 1222 al è une dimostrazion straordenarie di cheste veretât. Inte gnot di Nadâl dal 1222, il patriarcje Bertolt di Andechs (1218-1251), un dai plui grancj princips de Patrie, al jere a Cividât cun dute la sô cort: chel colp al fo trement, e al butà par tiere cuntune orende sgrifade dal mostri il stes palaç dal Patriarcje.
Al sdrumà ancje une part dal maraveôs templut dai langobarts – il cuviert a crosere al colà parsore dai stucs antîcs, pierdite gravissime e che e someave ireparabile – e la glesie di Sant Zuan. In efiets, la scosse e fo grivie. Si calcole che e sedi stade dal VIII grât de scjale Richter. Distrutive. Bandonâ dut? Pierdi il coragjo? Domandâ jutori ai forescj? Bertolt al jere un om bon di coltivâ tal so cûr progjets plens di fantasie e di inovazion. Intant al pense di meti a puest i dams: in maniere miracolose, la scosse e veve fat jessî fûr de cripte dal Templut une relicuie.
Chest al ven let tant che un segnâl di rinassite e di sperance: ducj chei che a vignivin in pelegrinaç par viodile a vuadagnavin une indulgjence speciâl. Tante int, cun tancj bêçs. E si sa cemût che a son i pelegrins: donazions, regâi, ufiertis, tantis che il munistîr di Cividât in pôc timp al torne sù plui grant, plui biel e plui impuartant di prime, tant siôr che lis muinis a regalaran ae citât il restaur des muris vignudis jù cul scjas; e po dopo si clame ancje un pitôr a decorâ il Templut cun chei frescs che ancjemò in dì di vuê i regalin une anime maraveose. E no je mighe finide: Bertolt si cjale ator e al decît di puartâ la sede dal Patriarcjât di une altre bande. Pôc lontan de “Civitas” al jere un piçul borc di 1.200 abitants. Un borgut contadin, “rusticus”, di impuartance secondarie: lu clamavin Udin. Ma ben centrâl, plui di Acuilee e di Cividât: al podeve deventâ il gnûf cûr de Patrie. Une culine, là che al è probabil che e fos stade une spice romane e, sot, un grant sfuei. Ideâl pe difese. Dit e fat.
La storie urbane di udin e tache propit midiant di un taramot. Il Patriarcje si trasferìs sul cuel, al fas rimodernâ chê tor trasformantle in cjistiel, e al slargje l’abitât dulinvie lis rivis, intune rêt di straducis e passaçs strents che a saltavin fûr tal slarc di une place individuade tant che il lûc dal marcjât (ven a stâi, chel che vuê al è “Marcjât Vieri”), libar di tassis a partî dal 1223 e duncje une vore golôs pai marcjadants di dute la Patrie e ancje di chei che a vignivin di fûr confin. Al clamà dongje ancje i muinis dal cjapitul di Sant Durì sul Tiliment, che a tacarin a tirâ sù l’implant dal Domo: insome, in curt la gnove Citât e varès cjapade la sô muse che ancje in dì di vuê si rive a intivâle. Chê di Udin, capitâl dal Friûl. E dut midiant di un taramot! ❚
✒ Agnul Floramo