Un comitât autonomist pal «No» al referendum su la Costituzion

Tal 1866 Cosean al è stât l’unic paîs dal Friûl che al à vût 25 vôts cuintri de anession ae Italie, cuant che inaltrò ducj come pioris a àn votât a pro dai Savoie. Al è par chest che i fondadôrs a àn sielzût propit cheste localitât par meti dongje il prin Comitât dut furlan Sono speciale. Voto NO, che al è formât di une schirie une vore trasversâl di personalitâts, peadis de voie di oponisi a une riforme costituzionâl che e riscje di fâ mâl a dutis lis autonomiis e in maniere particolâr al Friûl. La robe singolâr e je che cheste voie no nas di une ideologjie politiche, ma dal amôr pal teritori e de pôre di ce che si podarès pierdi in tiermins di autoguvier lassant aprovâ une modifiche sbaliade ae Cjarte fondative dal Stât talian.
Al è di un grum di timp che tancj a speravin intune “resistence” furlane al model plebissitari di guvier che Matteo Renzi al puarte indevant cu la riforme costituzionâl che al cirarà di fâ buine a Otubar cuntun referendum. E se e je vere che zaromai sedi a çampe che a drete si stan inmaneant Comitâts militants pal NO, un Comitât dut furlan che al nas cuntun sproc identitari al è za une notizie.
Cun di plui, ae cuistion simboliche si zontin almancul trê altris problematichis politichis, che a podaressin vê ripercussions fuartis su la specialitât furlane: 1) la tindince fuarte de gnove Cjarte a comprimi i nivei di autonomie e lis competencis des Regjons, ancje di chês speciâls; 2) il Senât des Autonomiis, che al varès di tignî cont des peculiaritâts dai nivei decentrâts dal Stât talian, nol somee vê nissun podê par cuintribelançâ lis prerogativis dal guvier centrâl; 3) la leç eletorâl dal Italicum e podarès lassâ cence nissune rapresentance politiche la comunitât linguistiche furlane, stant che almancul 6 dai 13 deputâts ju varà Triest cun Gurize, e chei altris a saran distribuîts jenfri Udin e Pordenon, cun buine probabilitâts che a sedin lis segretariis dai partîts e no i citadins a determinâju in buine part.
Il pericul di une riforme che dal pont di viste aministratîf decisionâl e copi la specialitât al è stât spiegât une vore ben a Cosean di Giorgio Cavallo, president dal Comitât, e di Roberto Visentin, che al è il segretari.
Dut câs, la sgrifade plui fuarte le à dade Sergio Cecotti, za president de Regjon e sindic di Udin: par lui la vitorie dal NO e je «la uniche pussibilitât di ricostruzion dal Friûl». Invezit la vitorie dal SÌ e sdrumarès dut ce che al reste de nestre autonomie, e i teritoris a saressin nivelâts a zero dal Stât centrâl roman.
Al à di jessi par chest che l’apel a metisi dongje al à za tirât sù la adesion di tantis personalitâts dal mont politic, culturâl e economic furlan: al è il mont politic e dai aministradôrs cun Mario Anzil, Mario Banelli, Franceschino Barazzutti, Elisabetta Basso, Giampaolo Bidoli, Gianluca Casali, Giorgio Cavallo, Sergio Cecotti, Roberto Dominici, Paolo Fontanelli, Geremia Gomboso, Alessandro Marangoni, Markus Maurmair, Renzo Medeossi, Massimo Moretuzzo, Renzo Pascolat, Elia Vezzi e Roberto Visentin; il sindacât cun Franco Belci; il mont de culture cun William Cisilino, Sandro Fabbro, Angelo Floramo, Federico Rossi e Andrea Valcic. Tancj altris si son declarâts a pro di cheste idee e il Comitât si sta slargjant simpri di plui, fasint ancje cont sui incuintris publics che a vegnin inmaneâts par presentâ lis resons dal NO. Ai 30 di Jugn, par esempli, si è tignût un incuintri a Voleson, ai 5 di Lui Cecotti al à fevelât di chest a Udin e ai 8 di Lui il Comitât al à ancje programât un seminari di aprofondiment juridic par sclarî i aspiets plui impuartants de bataie che si prepare a frontâ di chi al referendum di Otubar. «Pierdi la specialitât al sarès un colp mortâl pe nestre tiere» al à spiegât Cecotti, prin di dut in tiermins di riduzion dal Pil, duncje di ricjece, ma soredut in tiermins di ocupazion e di servizis te sanitât, te culture, pes impresis. Un pericul che al va evitât in dutis lis manieris. Prime fra dutis, la mobilitazion dai furlans che a àn ancjemò la cussience de lôr identitât. ❚
✒ Walter Tomada