RAFFBB Lazzara, la ligrie e je dai anarchics. Il Friûl al à pierdût un poete e une diference di plui

Raffaele BB Lazzara al è muart, inte sô cjase di Cormons, inte gnot jenfri i 12 e i 13 di Jugn. O savìn che cuant che si piert un poete si piert ducj alc, parcè che «muart un poete no si fâs un altri».  Soredut tal câs di BB o vin pierdût alc di unic e diferent di dutis chês, tantis, altris vôs de poesie furlane. Diferent di dut ce che al jere stât prime e forsi ancje di ce che al podarà vignî dopo di lui. Un poete usmatic, visionari, psichedelic e une persone plene di umanitât. Pôc o nuie cognossût tai zîrs academics e inteletuâi ma ben cognossût invezit tes “tribùs” dal Friûl che lui al veve cognossût e cjantât tes sôs poesiis: i indians de Basse, i bluesoms dai Cuei, i libertariis bisiacs e triestins, i Trastolons e «i puars, i mats e i fruts» che e jerin ducj a saludâlu tal emozionant funerâl laic che si è davuelt a San Zuan dal Nadison, inte cjase dal Leon, sede de associazion Rozaleo.
Nassût intal ‘65 in Gjermanie di une famee cun divignincis cjargnelis, al à vivût a Milan, fat la universitât a Bologne e daspò al è vignût in Friûl, tai agns ‘90, inamorât di Pasolini e di Usmis. Raff BB (BB al sta par «Bombadil badaluc»: Tom Bombadil al è un misteriôs personaç di Tolkien e Badaluc un gnogno, un dordel ndr) al jere un poete militant, simpri presint tes manifestazions par difindi l’ambient e par difindisi dal fassisim, cu lis bandieris de anarchie e dal Friûl. E intant al scriveve, al scriveve tantissim: poesiis, cjançons, volantins, letaris, fumuts, contis pai grancj e pai fruts. Si podarès dî che dute la sô opare e met adun une cosmogonie dal Friûl e dal mont pardabon inzirlose, ironiche e sfolmenade. Peraulis che al sparnice ator cence nissune regule, doprant ducj i mieçs pussibii, dai collages in forme di volantin fintremai a Facebook, cun intervents displaçants e provocatoriis.
La sô e je une lenghe babeliche e caraibiche, come che le definìs insiemit ai Trastolons, simpri zuiade jenfri peraulis delicadis, cultis e rovanis invenzions linguistichis: «La mê poesie e je il miscliç che al met adun gnovis dimensions magjichis dal ateisim dal gno pinsîr refratari e agnostic, anarchic. La mê poesie e vose cun Artaud, Bukowski, Pelo. Lengaç cence leterature, cjant orâl, rituâl zingar improvisât, fra il furlan sielt di là di ogni identitât e chei altris lengaçs che lu tegnin adun: suns, colôrs, formis….».
Sfantade la esperience di Usmis, moviment politic e artistic che tai agns ‘90 al à segnât in maniere fuarte la culture furlane, al è lât indenant cui poetis cence leç Trastolons, a fâ poesie ator par dut dulà che par solit no si faseve, puescj salvadis e no istituzionâi: pignarûi, fiestis dal Mai, prâts, monts e flums. Cun lôr al publiche des oparis coletivis come la racuelte Tons Trastolons e il libri cd Tananai, une sclese mate indenant (o indaûr) agns lûs di ce si leieve e si sintive te poesie furlane, cun lis musichis di Arbe Garbe, Redd Kaa, Lino Straulino, Fabian Riz, Guido Carrara, Zùf de Zûr, Inzirli. Tal 2006, cun Loris Vescovo, al publiche Ma diliberimi dal Ma*, libri e cd emozionants e ispirâts tes peraulis e tes musichis, che e reste la sô uniche publicazion che si pues cjatâ cumò, insiemi ai video e ai cd cu lis cjantis pai frutins fats intai progjets scolastics di Adriano Venturin cu la associazion Guido da Variano. Dutis chest “usmis” che al à lassât ator cumò a son la ereditât che al lasse al Friûl e a la sô lenghe. A saran di racuei e di publicâ in cualchi maniere, che però no simioti chê sorte di udinesizazion, o depontenziament estetizant che, la “intelighenzie progressiste” je rivade a fâ cun Federico Tavan e cui inovâi puntuâi di Pasolini.
Justeapont, Pasolini, Tavan, BB Lazzara: une linie segnade sì de muart ma plene di vite par cui che ju lei e al larà indenant a leiju. Une trilogjie de vite. ❚
✒ Pauli Cantarut
________________________
La poesie
I ultins
I ultins uerîrs
a esistin ancjemò
tal curtîl
a San Svualt, Udin
capitâl
resistin
i ultins
i puars i mats i fruts
di ca e di là dal mâr
tal sei diviars
avuâl
i ultins
a esistin ancjemò.
_____________________________
Apel par un archivi
Amîs e parincj di Raffaele a an fat zirâ un apel par meti dongje un archivi des sôs oparis. Jessint un gjenerôs, al sparniçave e regalave tante robe. E cussì,, se cualchidun al à imagjinis, scrits o poesiis sôs, che ju mandi a la mail Raff.BB.archivio@gmail.com
Al va ben plui o mancul ogni sorte di file (dal sigûr doc, rtf, txt, pdf, jpeg, tif, wav, aif, mov, mp3, avi, mpeg, mpg, mp4). ❚ ✒ Pa. Can.