Lis lidriis des “gnovis vîts” a son in Friûl: interviste a Marco Simonit

A pene tornât dal Sudafriche, cul so look stravagant – i cjavei di arint sbarâts adalt, i vistîts che lu fasin someâ une star – cemût podìno definî Marco Simonit, se no l’om dai filârs e de ue? “Maître tailleur des vignes”: 49 agns che al finirà in Otubar, il 2016 e je stade la sô anade cun premis a sbreghe balon. Prime il Nonino, par finî cul premi Casanova: ricognossiments par vê pandût, cul so soci, Pierpaolo Sirch, un gnûf mût di cuinçâ la vît (leiêt plui sot). E cun di plui Simonit al è ancje cetant braurôs de sô furlanetât e de sô lenghe: «Di piçul o fevelavi la variant di Gardiscje, come che mi insegnarin i nonos. Po o ai cjapât sù chê di Manzan, cuant che o soi vignût a stâ culì che o vevi 8 agns. Insome, o ai zirât pal mont ma lis lidrîs a restin chi», nus dîs.
––
Viodût che Setembar al è il mês de vendeme, i domandarès subite se i vins di chest an a saran bogns…
Ogni an si dîs che lis cundizions a son cetant buinis, no lu sai se par motîfs promozionâi o ce, ma daûr de mê esperience no si pues ancjemò dî nuie, almancul dal pont di viste cualitatîf. Dal sigûr chest cjalt sec e lunc al à incidût sul madressiment. Varìn plui ue, ma su la cualitât no met la man sul fûc. E je stade une anade dificile, cun foncs e malatiis. Ma al è in chescj moments che e salte fûr la bravure dal viticultôr, sore che la ‘vocazion’ de tiere e dal puest dulà che e je la vît. Insome dut al è ancjemò in bal.
––
Lui e il so soci o vês screât chest gnûf sisteme di cuinçâ lis plantis di ue. E lu vês puartât ator pal mont. Cuâl isal stât il Paîs dulà che si fâs vin ma che mai si pensarès?
O soi juste tornât dal Sudafriche e mi à cetant plasût, par il fassin straordenari, civilizât ma salvadi, emozionâl. Si zire cetant e ognidun ti lasse dentri alc. O vin lavorât tes tieris classichis dal vin: Italie, France, Californie, Austrie, Svuizare, Gjermanie, Australie. Ognidune e à il so parcè.
––
Propite il fat di vê espuartât il so metodo, in lunc e in larc, i à puartât ducj chescj premis.
Mi fasin plasê. A son un ricognossiment dal fat che si sin inventâts un mistîr che nol esisteve. E po a rivin di cjase tô e chest al fâs ancjemò plui plasê, ancje par vie che a tegnin cont dal progjet culturâl che al sta daûr.
––
A proposit di cjase nestre, achì si è di pôc screade une gnove Doc, pal Pinot grîs, condividude cun Venit e Trentin-Sud Tirôl. Ce pensial di chestis gnovis etichetis di tutele?
No vuei comentâ. Jo o lavori su lis plantis, tai aspiets burocratics no met il bec.
––
Lui al ven definît un esempli di Lumbersexual cul so mût particolâr di vistî che al fâs vignî iniment i menaus e cui cjavei parâts par aiar. Si cjatial in cheste definizion?
Il gno mût di vistî al è il spieli de mê personalitât estrose e coloride. Il gno lavôr al domande creativitât e jo la puarti ancje intor. A cualchidun i da fastidi, a altris ur plâs. A mi no mi displâs che chest mût di aparî al fasi tant discuti. Al rapresente ancje la olse dal gno progjet imprenditoriâl.
––
Si visial di cuant che al è vignût in contat pe prime volte cui filârs?
A Gardiscje o ai passât la me infanzie, o soi stât cressût dai nonos dopo jessi restât vuarfin di pari. Lôr a vevin animâi, prâts, ue, sorc. Jo o vevi miôr stâ cu la none che mi puartave te stale, pluitost che cul nono te vigne. Ma a un ciert pont, o varai vût 20 agns, o jeri a vore cul Consorzi di tutele dai vins dal Collio, o ai scuviert cheste plante. Mi impensi ancjemò il moment. O ai dissegnade la fuee. E di li o ai capît che la vît e sarès deventade la mê profession.
__________________________________________
Sisteme inovatîf
Il sisteme si clame Simonit&Sirch (al cjape il non dai doi socis) e al è un insiemi di tecnichis par çoncjâ lis plantis de vît, in mût no invasîf. «Premesse: ae plante no i free nuie di jessi taiade e a cressarès come une liane rimpinantsi dulà che e pues. I coltivadôrs la cjoncin par dâi une forme e par che a stedi intun ciert spazi. Ma par ogni tai che si fâs al sucêt alc dentri di jê: a restin ‘conis di dissecjament’. Al è come se a restassin venis di len sec dentri dal len vîf e fresc» nus spieghe Simonit. Al è clâr che il len sec nol è un ben pe salût de plante. «O vin cirût – al continue – tecnichis che a conservassin miôr il len vîf e che garantissin il flus linfatic de plante. O cjoncin rispietant e sburtant la capacitât di cicatrizazion e vuarison de plante, par esempli provocantji feridis piçulis pluitost che grandis». Mancul len sec, al vûl dî plui risiervis a nivel di lidrîs e fust des sostancis nutritivis, la plante e bute in mût plui ecuilibrât rivant a nudrî miôr i raps. Al vûl dî ancje favorî un invecjament che i dei identitât e cualitât ae ue. ❚
✒ Oscar Puntel