150 agns de annession dal Friûl ae Italie: un procès segnât, fale par Cosean…

Parcè ricuardâ che juste 150 agns za fa, ai 21 e 22 di Otubar dal 1866, al fo il plebissît che al decidè pe anession al Ream di Italie des provinciis venetis, che in chê volte e cjapavin dentri ancje chê di Udin (comprendût Pordenon) e Mantue? Ven a stâi i teritoris cedûts ae France dal Imperi austro-ungaric daspò la tierce vuere di indipendence.
«Se la cuistion no fos ostaç di polemichis localistichis, e sarès la ocasion buine par une riflession su centralisim e decentrament. Un dibatiment che in Friûl al sarès un grum impuartant sedi dal pont di viste culturâl, par vie de straordenarie vitalitât culturâl e linguistiche di chest teritori, sedi pe sô indiscutibil tradizion di autonomie», al rispuint Andrea Zannini, docent di Storie Moderne ae Universitât di Udin e diretôr dal Dipartiment di Studis umanistics e dal patrimoni culturâl dal ateneu.
Ma a ce pro imbastî une riflession su chest bipolarisim culturâl e aministratîf tra centralisim e decentrament «in un mont “globalizât” dulà che no crôt che a vei sens fevelâ di separatisim e altris formulis dal gjenar»?
Seont Zannini almancul par doi motîfs.
«Prin di dut, gjavantsi fûr dai discors politics strumentâi de politiche dai ultins 20 agns, al è ben resonâ su fin a ce pont che al è util decentrâ par no pierdi eficience e eficacie dal sisteme di guvier dal teritori», al dîs Zannini. Po e je la partide culturâl, par vie che «ciertis lidrîs culturâls a an une fonde positive. Cun di fat, plui o sin cussients de nestre identitât storiche e plui o podìn scambiâle cun chei altris». Di chest pont di viste, vignint ae atualitât, Zannini al riflet che «ai dispatriâts che cumò a rivin chenti o crôt che nol sarès sbaliât insegnai dongje dal talian ancje la culture furlane. E sarès une oportunitât par lôr e par nô».
Il principi, al zonte, al è clâr: «Rinfuarcî la nestre identitât storiche al vûl dî jessi bogns di lâ miôr incuintri a chei altris, nol vûl dî sierâsi».
Par chel che al rivuarde invezit il vôt di 150 agns za fa, che al puartà gran part dal Friûl sot de Italie cinc agns daspò il rest dal teritori, un secul e mieç «par un Stât nol è tant, si che cheste date – al marche il storic – e varès di ricuardâ che la Italie e je un Stât pluitost zovin, tra chei modernis il plui zovin dutun cu la Gjermanie».
In Otubar dal 1866 il plebissît te provincie di Udin al finì cun 104 mil 998 «sì» e 36 «no» – «simpri che i numars a sedin vêrs, par vie che il vôt in chê volte nol veve lis garanziis democratichis di cumò», al vise Zannini – che  si concentrarin a Cosean (25). Po, a forin 2 “no” a Martignà e Cjampfuarmit e un a Udin, Vildivar, San Lenart di Cividât, Bordan, Nimis e Lauc.
Te leture storiche, chel plebissît, al dîs il docent, «al à rapresentât il finâl di une lungje agonie dal domini austroungaric sul Venit, comprendût Udin, che e jere considerade une provincie dal Venit». E l’esit dal vôt nol fo une maravee, par vie che «si veve la percezion clare di timp che la ete austriacant e stave finint e cuant che ai 26 di Lui dal 1866 al jentrà l’esercit talian tal cjâflûc furlan, il destin de provincie al jere bielzà segnât».
Naturalmentri no ducj a jerin di acuardi e jenfri chescj part de glesie – come che al dimostre il câs di Cosean – e di ambients dongje. Dut câs i contraris no an vude strade semplice par fâ cognossi lis lôr resons, ancje parcè che «dute la stampe e jere a pro de Italie – al ricuarde Zannini -. Dal rest la italianitât di chestis zonis no jere in discussion, parcè che prime e jerin stadis venezianis e in origjine furlanis». No i là drete però, nancje a chei, come Pacifico Valussi, che pupilarin almancul un Stât federâl, «par vie che al veve pôre, come che al sucedè, che il Friûl intun Stât talian centralizât al pierdès la sô autonomie. Tal dibatiment su chest cantin, altris a sostignivin che no podeve lâ si no cemût che e je lade».
Dut câs, al siere Zannini, «il plebissît par sô nature al è l’at propagandistic di un procès di costruzion di un Stât che no si forme mai par une vie legalmentri clare e definide, ma simpri par un vuere, une rivoluzion o almancul une sfuarçadure des leç in cors. Di fat nissun Stât al previôt te sô normative la sô dissoluzion». ❚
✒ Antonella Lanfrit