A Rivignan il festival mondiâl de cjançon funerarie | Lis fiestis ator pal Friûl

«Gnot di lune plene, vîf e muart cjamine insiemi». Un proverbi che al funzione benon in chel di Rivignan, li che di secui aromai si fâs la Fieste dai Muarts. Di sîs agns a cheste bande, la fieste e à cjapât une plee une vore cjantarine, in gracie al Festival mondiâl de cjançon funerarie, une idee vignude fûr de fantasie di Enrico Tonazzi, – chel dal famôs trio «Frizzi-Comini-Tonazzi» – e cjapade sul seri da Rocco Burtone, il cjantautôr, scritôr, atôr, cabaretist plen di estri e ironie che di tancj agns al anime la vite culturâl in Friûl.
In chel di Rivignan si pues alore riviodi il det, cence sbaliâ, in cheste maniere: «Gnot di lune plene, vîf e muart ai cjante insiemi». Une kermesse che cul lâ dal timp e à vût lis atenzions de Rai, de Mediaset e di diviers gjornâi talians, come Il Giornale, fintremai dal New York Times che al à dedicât dôs riis – miôr di nuie – a cheste origjinâl manifestazion cjanore.
«L’apontament al è, come ogni an, ai 2 di novembar sot sere, in place a Rivignan, in ocasion dal marcjât che come simpri al scomence ai 31 di Otubar e al finìs apont cul Festival mondiâl de cjançon funerarie», nus conte il diretôr artistic Rocco Burtone, che al va indevant: «E je une maniere di pensâ ai muarts cun ligrie, cence ofindi nissun, cun rispiet e inteligjence. Ancje la goliardie e jude a pensâ cun cussience al mont di là. Cun di plui, i artiscj ospits ae manifestazion e son ducj di spessôr e ogni edizion si caraterize par la cualitât e lis novitâts, che e no mancjin mai».
Cheste seste edizion e sarà presentade, come di tradizion, di Tiziana Cosmi e, novitât, di Daniel Samba, il simpatichissim “furlan piturât di neri”, come che i plâs presentâsi, ven a stai il zovin african aromai naturalizât furlan che al spopole in radio e tal web.

Tancj i ospits, i artiscj e i gjenars musicâi, come Franz Merkalli e i Tellurica cun il lôr rock ironic, Estacion Sur, cuatri sudamericans plens di energjie, il mitic pianist Arno Barzan che insiemi al sopran Daniela Del Mistro e ae cjantant lizere Francesca Smiraglia, al proponarà Verdi Rock. Speciâl il trio componût dal ghitarist Michele Pucci, dal violinist Giulio Venier e dal armonicist Paolo Forte, che a daran la lôr version de muart in tune conte musicâl tra flamenco, musiche popolâr e improvisazions. Ancjemò flamenco, cheste volte balât, cun Viento Flamenco che e presentaran dôs coreografiis di danzis funebris. Presints ancje i Nosisà, famôs par il lôr stîl che al no dismentee mai la musiche popolâr furlane. Nol mancje il blues cun Fabio Ulliana & Off Limits Band e nancje la dutrine, cun il professôr universitari Luca Montessoro cu lis sôs contis, tra il seri e il scherçôs.
Si fâs indevant une edizion un grum vivarose, ancje se e je la fieste dai muarts. Vâl la pene di ricuardâ che ancje Ippolito Nievo l’ere restât incantesemât de Fieste dai Muarts di Rivignan, cuant che in tal lontan 2 di Novembar dal 1856, tant che al stave in tal Cjiscjel di Frate, al veve partecipât aes celebrazions. Di fat, cheste visite e la à ricuardade in tun cjapitul des sôs Confessioni di un italiano. ❚
✒ Alessio Screm
__________________________________________

Lis fiestis ator pal Friûl
Tra lis tantis ricorencis che e colin tra il dì e la gnot di Ognissant in Friûl, nô us consein cualchidune che e merete pardabon par vie des sôs particolaritâts, cirint di movisi in libertât tra lis monts e la plane.
In Cjargne, a Dimpeç, si fâs la Not dalis muars ai 31 di Otubar. Une rievocazion dal Prin dal an celtic ce tant sintude e frecuentade. Une ambientazion spetrâl, li che il paîs al ven iluminât dome dai fûcs. Si mangje, si bêf e si bale, tra striis e orcolats, dute la gnot. A Vile Santine invezit al è il Marcjât dai Sants e a Pontebe Halloween on ice, une fieste di spirts inte piste tal glaç.
A Colorêt di Prât e je aromai une tradizion la Fieste de Crepe, une sfilade mascarade pensade in particolâr pai fruts. No mancjin lis cocis, la cjocolate cjalde, lis cjastinis e la rebule par i plui grancj.
A Cjopris Viscon o vin invezit la Vilie dai Sants, une gare tra lis cocis intaiadis plui bielis. E vegnin esponudis dilunc la vie principâl dal paîs daspò dal tramont e a restin luminadis par dute la gnot. Il dì dopo, une zurie selezionade e premie lis plui bielis e origjinâls, tra il mangjâ e il bevi in bine compagnie.
A Forgjarie infin si fâs Halloween in risierve, ven a stai une serade di sgrisui inte bielissime risierve dal Lât di Curnin, tra baladis e animazions di ogni sorte. Il teme al è, in fin dai conts, simpri l’istès, ma ce che al conte di plui al è di visâsi che e je di une fieste che e no ven des Americhis, ma di une antighe tradizion europeane, o miôr celtiche. ❚✒ A.S.