Al somee che il Sîscent al sedi stât un secul di polse pai torments de Tiere furlane. Forsit il clime stranît di un secul che al par indurmidît sot di tancj ponts di viste al à inçussît ancje l’Orcolat. Ma se par cent agns al reste in cove, al varà ben mut di fâsi sintî cun esplosions di rabie che par dut il secul XVIII a sdrumaran la part plui puare de Patrie, ven a stai la Cjargne e i borcs Asìns a drete dal Tiliment. Il ‘700 al è passât ae storie tant che il periodi des grandis rivoluzions: chê Americane, chê Francese e chê Industriâl. Forsit ancje il Taramot al vûl fâsi rivoluzionari e si scjadene in tune sucession di episodis un plui fuart di chel altri.
Il Catapan de Plêf di Vît al note che il 27 di Fevrâr dal 1726, aes dôs di gnot, il paîs al ven dismovût di une grande bote. La tiere e va indevant a tremâ a fuart ai 5 di Març e ai 4 di Lui: simpri tal scûr de gnot, scuasit che il mostro al cjapi gust a presentâsi cul scûr, cuant che nissun si impense di lui, procurant tant che plui dam e muart, dal moment che la int e duar dentri des cjasis che vegnin ju cun grande ruvine. Jenfri dai 9 e i 10 di Lui dal 1776, cuant che di là de Grande Aghe i Americans si preparin a scrivi l’at de lôr Costituzion autonomiste e rivoluzionarie cuintri dai Inglês, lis valadis dal Colvare e dal Midune a vegnin striçadis cun tune violence paurose, sì che Pofavri, Cjasesole, Secuals, Midun e Tramonç si poin par tiere in tun fracàs di claps e di maseriis: piçui paîs di bruscjedôrs e scarpelins, int usade a lavorâ dûr cence domandâ nuie ae vite. Il plevan di Tramonç al conte intal so diari che une scûr penç e di fâ spavent si è poiât pardut intant che la tiere e tremave, sparint subit dopo. La pôre dal comun sintî e mude la pene cuinçantle cun la sugjestion, che amplifiche il Mâl, lu fas deventâ diabolic.
Tumieç al patis une grande sdrondenade tal 1788. Ma e je dome che une anticipazion di ce che i varès tocjât doi agns dopo. L’an de Rivoluzion Francese, ven a stai il 1789, al fo pal Friûl une tremende golaine di disastris, come se la Nature e ves vude voie di sdrondenânus par anticipâ il grant scjas de Storie che di li a pôcs agns al varès cjapât dentri ancje la Patrie, trasformade in tun cjamp di bataie li che Napoleon, Imperiâi, Cosacs dal Zar si saressin combatûts, simpri fasint paiâ lis spesis a la puare int dai paîs e des campagnis. Il Catapan di Vît al conte che ai 31 di Març dôs grandis sdrondenadis, une a misdì e mieç e che altre a une e mieze, a rivarin cul frêt e cul aiarat a visâ che il Mostri al jere tornât. Par chel an, fasint la tane a Tramonç, al varès fat tremâ il Friûl plui voltis ogni mês. Il Plevan al segne come ultime scosse il 14 di Novembar. Une polse par Nadâl.
E l’an 1790 si scree pe Cjargne in tune maniere ce tant feroce e crudele: il 26 di Zenâr, a lis dôs e mieze tal dopo di misdì, in tune zornade frede ma clare, di soreli lusint, e fâs dams impuartants. E ven ju ancje la fabriche di Jacopo Linussio, che al veve nasade la pussibilitât di inventâsi un Friûl diferent, a la pari cun la Europe, invistint in inteligjence e in gnove tecnologjie ancje come reazion ae crudeltât de Nature. Chel insgrisulâsi de Tiere al continue a cori mês par mês di chel an: il sîs, il dodis, il vincjenûf e il trente di Jugn, e vie cussì, fin ai 29 di Novembar. Ultin scjas dal secul: ai 3 di Jugn dal 1795. ❚
✒ Agnul Floramo
