Bon complean Avostanis: a son 25 chest an! La rassegne Ai Colonos e ponte su Tieris e Utopiis | Une cjalade al program | Il program

Cuntun clâr riferiment ae complicade situazion sociopolitiche contemporanie, la edizion numar 25 di Avostanis e cjape il titul Tieris e utopiis. Il lûc dai incuintris al reste l’agriturisim Ai Colonos a Vilecjaze di Listize, puest avanzât de furlanetât, interessât a valorizâ e a discuti, a diret contat cul vivi di vuê, e cun ducj i mil aspiets de nestre identitât. Cheste edizion 2016, tacade ai 28 di Lui e che e larà indenant fin ai 6 di Setembar, e cjape di pet une serie di cuistions leadis e cetant spinosis che a tocjin ducj: migrants, migrazions, Europe.
Intal biel mieç di une trasformazion epocâl, di lungje durade, dulà che la nestre societât, in continue mutazion, e met durementri in forsit vecjis posizions e si lambiche intal tentatîf di rivâ a gjestî une situazion cetant problematiche, Avostanis e clame al confront. Se chestis a son lis tieris, la utopie dal program si le cjate intal sens di ricercje di lûcs inedits, gnûfs, dulà che a puedin cjatâ rispuestis i dubis di cumò.
Sot la vuide artistiche di Federico Rossi, anime dai Colonos, Avostanis e met duncje dongje 12 apontaments, tra incuintris, dibatits, contis, leturis senichis, documentaris, mostris, concierts, par frontâ a largjis viodudis lis tramis sociologjichis e sociopolitichis complicadis che si stan costruint, inte suaze dai moviments dai popui, intune Europe che e cambie muse, zornade dopo zornade, cence ancjemò rivâ adore di ricognossisi dal dut e tal so interni. ❚
✒ Alessio Screm
____________________________________
Une cjalade al program
Tra i varis apontaments di Avostanis, tancj a saran presentâts in lenghe furlane midiant de musiche, dal teatri, dal dibatit e dal film documentari. Bielzà Clandestins, la leture seniche di Franco Castellano che e à screât la rassegne, e je nassude cun cheste intenzion, a traviers lis traduzions in lenghe par opare di Federico Rossi e Maria Bruna Pustetto, dal libri Les clandestins di Yossouf Amine Elalamy.
Tant friûl e tante furlanetât in tieris e utopiis. Cussì il Timp dal Sium di domenie ai 21 di Avost, spetacul conciert dulà che un grup di musiciscj milanês al à metût in musiche tescj in furlan, di Pasolini a Pittana, par tocs imortalâts intal disc Gnots furlanis. Di sigûr interès il varietât culturâl Provis viertis di culture furlane, joibe ai 25 di Avost, une ocasion par intercetâ lis tindincis de lenghe, de art e de culture furlane, in compagnie di  Sergio Cecotti, Massimo Garlatti-Costa, Carlo Della Giusta, Fabiano Fantini, Nando Patat, Massimo Somaglino, moderâts di Federico Rossi, cun moments musicâi a firme di Mirko Cisilino ae trombe, David Cej ae armoniche e Martino Isola al liron.
Ancje un documentari par furlan. Lâ vie di là, ai 29 di Avost, al è un progjet di Loris Vescovo cu la regjie di Marco D’Agostini, par un documentari di viaç tra Slovachie, Ucraine, Romanie e Ongjarie, dulà che e si cjapin testemoneancis di migrants partîts dal Friûl. Angelo Floramo al fevelarà cui autôrs. In âgris rimis e je invezit la serade di poesie che e siere la XXV edizion di Avostanis, ai 6 di Setembar, dulà che a vignaran presentadis dutis lis poesiis di Amedeo Giacomini, par une opare omnie di sigûr interès.
Il Friûl al sarà presint ancje in chei altris apontaments, sedi pai ospits, come par esempli Daniele D’Agaro, protagonist dal conciert intal Templi Vegjetâl ai 18 di Avost, dal titul Il cjant dai uciei, o intai temis tratâts, come l’incuintri Dai turcs in Friûl ai turcs in Europe, joibe ai 11 di Avost, cun Philippe Daverio, presince fisse e amade intai apontaments  Ai Colonos. ❚ ✒ A.S.
_________________________________
Il program
Joibe ai 28 di Lui, aes 21
Clandestins, leture seniche
Lunis prin di Avost, aes 21
Trente metros di sperance, serade multimediâl
Vinars ai 5 di Avost, aes 21
Bodanza e Gaetano, inaugurazion de mostre
Lunis ai 8 di Avost, aes 21
Human, film documentari
Joibe ai 11 di Avost, aes 21
Dai turcs in Friûl ai turcs in Europe, incuintri cun Philippe Daverio
Joibe ai 18 di Avost, aes 19
Il cjant dai uciei, conciert intal Templi Vegjetâl
Domenie ai 21 di Avost, aes 21
Il Timp dal Sium, conciert-spetacul
Joibe ai 25 di Avost, aes 21
Provis viertis di culture furlane, varietât culturâl
Lunis ai 29 di Avost, aes 21
Lâ vie di là (Furlans de Europe dal Est), film documentari cun dibatit
Joibe prin di Setembar, miezegnot
Colonos Open Call 2016, residence artistiche
Sabide ai 3 di Setembar, aes 21
La art a traviers mil confins, inaugurazion de mostre
Martars ai 6 di Setembar, aes 21
In âgris rimis, serade di poesie ❚
✒ A.S.