IL FERÂL. A scuele

Puntualmentri in Setembar a tornin a vierzisi lis scuelis. Di riforme in riforme, di cambiament in cambiament, al pâr che i problemis no si rivi a disberdeâju. Si continue a sintî a fevelâ di precaris, di graduatoriis, di concors, di programs …, ma dai scuelârs, dai students, dai sogjets principâi de scuele si fevele pôc. Di scuele in Friûl, di lenghe furlane, ancjemò mancul. (pre Roman Michelot)
O ai sot voli une vecje foto di scuele: trentecinc fruts cuntune sole mestre. E ancje i sussidis didatics a son adeguâts: un cuader, il silabari, il libri di leture e la bachete. Te scuele di cumò tu riscjis di cjatâ plui mestris che canaie e plui circolârs e cjartis che no dîs di scuele. Al bastarès chest aspiet superficiâl ma no secondari par dî la diference epocâl fra une esperience educative e chê altre. Suntun pont però o cjati une dolorose continuitât: te estraneitât de scuele in gjenerâl, e furlane in particolâr, al mont reâl, a la vite concrete, a la culture native, tacant de nestre lenghe, che te scuele e je stade bandide di simpri. Di fat, nô furlans al è come se no vessin mai vude scuele, tal sens di une scuele nestre, e là che o varessin vût di cjatâ la clâf dal riscat culturâl o vin cjatât un altri jôf di colonizazion.
Par chel, no mi sint di unîmi ai laments dai nostalgjics ni aes trombetadis dai modernis.
La vecje mestre, cussì buine, cussì materne, cussì severe e morâl o moralistiche, plui che mari de nestre inteligjence e je stade sierve fedelissime dal Stât e impen di insegnânus a vierzi i voi e a savê dî di no, e à batût fuart sul Credere-Obbedire-Combattere e sul trinomi Dio-Patria-Famiglia. Il Stât talian al varès di fâur un monument ai mestris furlans che, fale cualchi moscje blancje, lu àn servît cun masse religjon e passion. A àn fat il delit di no insegnânus a vê stime di nô e de nestre culture, cjapade come un impediment e un berdei, e di fânus vê gole di dut ce che al veve il sigjîl de fatalitât romane e taliane. Cul risultât che o vin pierdude la nestre identitât culturâl e no vin cjapade sù chê altre. Un popul crot che al scuen lâ a pitocâ catans forescj.
Su la scuele di cumò, in eterne riforme e sperance di cjatâ cualchi idee, si podarès fevelâ fin doman o vierzi e sierâ come tai tumôrs. No vuei fânt la responsabile di dutis lis disgraciis parcè che no merete e no vuei dâi masse impuartance. Lis stessis colpis lis à la glesie, che no ufrìs ponts di riferiment profonts e alternatîfs, e la famee, ricatade di mil fastidis contingjents e materiâi e usade a delegâ. Come se lassâ la culture dome tes mans dai mestris o la religjon tes mans dai predis o la politiche tes mans dai sindics al fos un at inteligjent e responsabil.
Ciert che, intun moment di grande confusion e di contradizion gjenerâl, no podìn permetisi confusion, parcelizazion e contradizion ancje a scuele. La culture, come dutis lis robis di fonde, e à di tindi ae  semplicitât (no ae semplificazion) e ae unitât (no ae uniformitât). Par un frut, a diference che pal grant, masse ponts di riferiment a son un dam psicologjic trement. In plui, la scuele di vuê e à copade la fantasie, tal sens di trasfigurazion dal reâl, e çoncjadis lis lidrîs concretis e vitâls a pro di un universalisim astrat e ideologjic. Al è just fâju deventâ grancj e usâju a resonâ in grant, ma cence fâur pierdi la stagjon de inocence e il contat vitâl cul lôr mont. Par no fevelâ dai orientaments morâi e di une religjositât armoniche, che no à nuie di confessionâl.
La scuele e je liberazion e sclavitût, benedizion e disgracie. Al dipent dal mût che e je fate e doprade.
Cuant che o viôt a partî i fruts a buinore, mi consoli pensant che a van tal zardin de fantasie e tal templi de culture, là che a podaran imparâ a cressi libars e savints. Ma subit un nûl mi scurìs la anime: e se a fossin come agneluts inflochetâts che a saltucin contents e incussients viers la becjarie?
Crist nol à rivendicât par se nissun titul, dome chel di mestri (Mt 23,10), parcè che ancje i mestris a son scuelârs denant dal misteri de vite. Chel mestri e chel predi che a van in scuele e in glesie dome par insegnâ e no par imparâ, a fasin ben a stâ a cjase.  ❚
Cirint lis olmis di Diu n. 3, pagj. 128
Pre Antoni Beline