ATUALITÂT – Furlan-gjamaican su lis culinis di Nimis

Si sin cjatâts a Nimis, in place, ma in pôcs minûts o jerin za a cjase sô. A fâ strade Mauro Tubetti, 27 agns, dôs laureis za cjapadis (psicologjie socioculturâl e siencis de educazion) e une tierce in vore (specialistiche in siencis de formazion), ma che su lis senis musicâls dal Friûl, e no dome, al è cognossût come Dj Tubet, rapper, free-styler cu la «batule» svelte, par vie de velocitât che al rive a elaborâ e a trai tal microfon strofis daûr strofis.
Dj Tubet, cemût sino cul tour de «R.Esistence in Dub» (l’atuâl formazion, premi Friûl 2007, che lu viôt impegnât come vôs, ndr)?
Une vore ben, o vin contats cun Piemont, Toscane, Sardegne e Venit, li che o sunìn dispès. O fasìn, propit se nus va mâl, minim 4 datis ogni mês. Midiant di chest nestri zirâ o rivìn ancje a puartâ indevant il leam e te ultime Festintenda a Cjasielis o vin rivât a puartâ ancje musiciscj de Sardegne.
Ce reazions viodêso te int li che no fevelin la nestre lenghe?
Prin di dut al è di dî che no sin mai une sorprese: prime di fâ une date, lis organizazions che nus clamin a àn za sintût il nestri Cd. Invezit il public sul imprin al pense di sintî une lenghe foreste e dopo a stan une vore atents par cirî di capî: duncje o vin simpri vude une reazion positive. Il public che al scolte il nestri gjenâr al è usât a sintî lenghis che no son il talian: al è stât sperimentât za cun formis dialetâls tal Suditalie e se o pensìn al Nord, l’esempli plui famôs al è chel dai Pitura Freska che a cjantavin par venezian.
Fevelant dal Cd «Avampuest Dub» dai R.Esistence in Dub, cemût nassial?
Il progjet intîr al nas de idee dal «Toffo» (Andrea «Selecta» Toffoletti, ndr) che al à tacât a meti dongje il grup, prin cui otons e po clamantmi me. Cuant che o vin tacât, cirche 2 agns indaûr, si esibivin cun basis predefinis e jo o improvisavi. Po dopo o vin començât ancje a fâ musiche nestre.
Nus descrivistu il vuestri gjenar?
Il nestri al è reggae eletronic: une musiche che e nas in Gjamaiche ma che cumò e à in Ingleterie la sô difusion principâl.
In dut chest ce centrial il Friûl?
Jo mi sint dongje a nivel «filosofic» cun lôr: la Gjamaiche e je une isule fisiche e linguistiche (l’inglês che si fevele li al è difarent dal British English) e ancje il Friûl al è une isule linguistiche.
Duncje la lenghe no us limite…
No. Il furlan al à une sonoritât une vore dongje dal gjamaican e chest al jude une vore te promozion de nestre musiche ancje tra i adets. Par esempli Paolo Baldini, bassist dai Africa Unite che o vin cognossût, al è content dal nestri lavôr. O ten a marcâ il concet di teritori linguistic, ven a stâi che secont me furlan al è cui che al capìs la mê lenghe. Chest concet di partignince no leade a une tiere, ma a la culture, al è za stât superât cul gjamaic e us fâs l’esempli di Alborosie, talian, ex component dai Reggae National Ticket, che però al ven considerât pe sô ativitât a ducj i efiets a nivel mondiâl un musicist gjamaican.
Parcè dopraiso une vore di tecnologjie, no dome par sunâ, ma ancje par proponisi?
La motivazion e je tal concet di «cence confin». O fasìn un gjenar une vore particolâr e o vin dibisugne di ducj i mieçs par presentâsi: o sin presints su Internet cun Youtube, Myspace e Facebook (cjale il speciâl Internet su La Patrie di Març 2009, ndr), no dome come grup ma ancje singolarmentri. Nol baste plui produsi il Cd o sunâ dal vîf: par chest nus coventin ducj i mieçs che al furnìs Internet.
E dopo de vitorie dal Premi Friûl dal 2007, cemût vêso cjapade la mancjade vitorie de Targhe Deganutti tal 2008?
No vin vude delusion: o sin contents di vê vût il premi de jurie critiche pe versatilitât de lenghe, che al jere ancje il sens dal Cd. Po dopo o sin ancje contents che il premi al sedi lât a Loris Vescovo, par dut ce che al à fat e al continue a fâ a nivel musicâl te sô cariere. No vin premure e o sin cussients che un gnûf prodot come il nestri al à dibisugne dai siei timps.
Cuâi sono i tiei grups di riferiment e cun cui ti plasaressial sunâ?
A nivel furlan mi cjati ben cun Fabian Riz, che o vin sunât insiemit za plui di cualchi volte… une sintonie no dome musicâl ma ancje «filosofiche» pal fat che ducj i doi o sin leâts di une cierte vision de ruralitât. Pal rest mi plasarès continuâ a dividi il palc cun int dal gno setôr come che al è capitât al Sansplash: i nons a saressin tancj.
E come percors artistic, a cui ti sêstu ispirât fint cumò?
Un cont al è il percors che o ai fat pal progjet dai «R.Esistence in Dub» e un cont e je la mê ricercje personâl musicâl come Tubet te improvisazion. Cun lôr o ai cirût di studiâ il Dj style, ven a stâi lis primis tabaiadis su la musiche che si à tacât a fâ tai agns ’50 e ’60 in Gjamaiche. Dopo par ogni aspiet tecnic o ai un riferiment difarent, no ai dome un idul. Invezit su la ricercje de improvisazion o pues dî di vê cirût di fondi al Skat e al Jazz il volê cirî di doprâ la peraule, robe che e ven di plui dal gjenar Rap: insome, un grant cjalderon di stîi, ricercje e sperimentazion.
Su la difusion da la musiche tu nus âs dit che nol baste plui dome il Cd. E a la lenghe furlane ce i covential par jessi plui difondude?
Secont me i supuarts a coventin parcè che e reste in ogni câs une «testemoneance». Pe musiche furlane in particolâr i grancj events, festivals e vie indevant a varessin di dedicâ un spazi ancje a lis espressions inte nestre lenghe: Festintenda e Sunsplash a àn za dimostrât sensibilitât e a continuin a fâlu. Purtrop altris «vetrinis» no metin a disposizion visibilitât a la produzion par furlan. Po dopo al convente ancje cualchi jutori e duncje il premi Friûl che ti da une man a fâ un disc e je une robe grandiose, ma e reste un câs unic.
E par cirî di tignî dongje i zovins?
Al coventarès che la informazion e la promozion a fossin slargjadis e duncje no dome leadis ai cjanâi specializâts. E cussì al sucêt che magari il zovin al cognòs i musiciscj che a sunin une cierte musiche a nivel talian, ma nol sa che il stes gjenar al chenti, parcè che lis testadis talianis no son interessadis al locâl. O viodarès ben un progjet che al sburti tes scuelis. A son ancje impuartantis iniziativis come Musicafè di Zeppieri su Telefriuli o l’Angolo della Musica che a dan la pussibilitât a grups locâi di fâsi cognossi. Spes i zovins a valutin la popolaritât dal grup e duncje se un musicist al è cognossût ancje fûr dal Friûl, alore la lenghe furlane no ven viodude come un probleme.
E tra artiscj?
Secont me al zovarès meti dongje plui compilations e events li che i artiscj di plui gjenars musicâi si incuintrin, cussì ancje i rispietîfs publics a jentraressin in contat tra di lôr par fâ cognossi simpri di plui ancje la lenghe furlane. E je dute une cuistion di promozion.
Altris progjets pal avignî dai R.Esistence in Dub?
Cumò o sin in contat cun int di Rome pe produzion di un vinîl insiemit. Lôr a cjantaran par inglês e noaltris par furlan. Chest parcè che il disc al sarà distribuît midiant di Dubwise un grant distributôr a nivel mondiâl e cussì o rivarìn a fâ cognossi tal marcjât reâl di cheste musiche la lenghe furlane. O pensavin di rivâ a fâlu pe edizion dal Sunsplash 2009, ma pal moment no vin finît. Pal Istât si pensave ancje di fâ un minicd cun cualchi remix. Po dopo o puarti indevant ancje i miei progjets di solist e o varès tal cjâf di realizâ alc cul reggamuffin, un altri gjenar musicâl inmò.
Christian Romanini
____________________________________________
VIDEO E MAIUTIS: CARNICATS AE CONCUISTE DAL MERCJÂT
Al è on line dai 15 di Jugn «Carnicats» l’omonim video dal grup rap furlan Carnicats, presentât in anteprime a Udin vinars ai 22 di Mai vie par une fieste in centri. Il sît al è www.carnicats.com. Il grup rap cjargnel al partìs al atac dal marcjât musicâl cuntune cjançon par talian, ma cence dismenteâsi dal furlan. Di fat, il toc al tache in marilenghe, e dopo si passe al talian: il cjantant DekillCeesa, in maniere simboliche si gjave la maiute «Make frico not war» che al à intor e al met la gnove maiute «Carnicats» cul gjat neri, che e devente simbul dal grup e dai fans. La maiute e sarà metude in vendite on line tal sît de Friulpoint (www.friulpoint.it) e che e à judât la realizzazion dal video, prodot da Carnicats & Reddarmy e pe regjie di Clan Sensaskei.