SCOMENCÂTS PAR FURLAN. Dîs piçui Indians | Il libri e l’autôr | Il tradutôr

Sintât intun cjanton dal vagon fumadôrs di prime classe, siôr Wargrave, judiç a pene lât in pension, al passave cun rivuart lis gnovis di politiche dal Times, intant che al supave il so zigar.
Po dopo, poiât il gjornâl, al à tacât a cjalâ fûr dal sorelûs.
Il tren al coreve vie pal Somerset.
Un voli al orloi: ancjemò dôs oris di viaç.
I è tornât iniment chel che i gjornâi a vevin scrit su Nigger Island.
Prime gnove: un milionari merecan, ferbint di croseris su barcjis di lus, al veve comprât chê piçule isule denant de cueste dal Devon e alì al veve tirât sù une vilone moderne e sontuose, ben piturade sul sfuei.
Seconde gnove: la tierce femine di chel bacan, viôt tu la peule, e sofrive il mâl di mâr e cussì lui al veve scugnût meti in vendite isule e cjase. Sui gjornâi si jerin za ben pandûts cetancj avîs.
Tierce gnove: un tâl siôr Owen al veve comprât dute la sostance.
Dibot i comareçs a vevin tacât a jemplâ lis cronachis mondanis.
Cualchidun al scrupulave che Gabrielle Turl, la famose atore di Hollywood, e ves cuistât jê la isule, cun chê di lâ a taponâsi alì par cualchi mês…
Un tâl, di sorenon “Âf laboriose”, al motivave, cun tatiche, che chel puest al sarès servît di sotet par cualchi personaç di sanc reâl. “Il mataran” al bateve che la isule e jere stade comprade par la lune di mîl di un zovin lord che finalmentri si jere rindût a Cupido. “Giona” al sostignive di savê che le veve cjolte l’Amiraliât par inmaneâi parsore misteriôs esperiments sacrets.
Insume, la Isule Nigger e jere deventade il cantin dal dì.
Il judiç Wargrave al gjavà di sachete une letare. No si rivave cuasi a capî la scriture ma cualchi peraule e spiçave cuntune limpidece di no crodi.
«Cussì cjâr Lawrence… di tancj agns no ai plui sôs gnovis… bisugne che al vegni te Isule Nigger… un lûc di incjant… o ai tant di contâi… i timps di une volte… la comunion cu la nature… stasonâsi tal soreli… aes 12.40 di Paddington… si cjatarìn a Oakbridge. Simpri sô Costance Culmington».
La firme e jere fodrade cuntun svolaç. ❚
_______________________________
Il libri e l’autôr
Dificil cjacarà di romanç zâl cence tirâ fûr il non di Aghata Christie. Mari di doi personaçs une vore cognossût come Poirot e Miss Marple, protagoniscj ancje in oparis di cine e television. Ma il libri plui vendût de autore inglese (tierç tai romançs di dut il mont) al è Ten little niggers, dal 1939, cun 110 milions di copiis. Tantis a saressin lis robis di dî su cheste opare, ma no si pues no marcâ la sô nature di zâl atipic, cence un detective a indagâ e che al rive ae soluzion dome par volê dal colpevul, e il balet dai titui, che stant ae peraule ofensive “nigger”, cjolte de filastrocje inglese dal 1868, al è stât mudât in And then there were none, intai Stâts Unîts, e in Ten little indians, plui tart, version sielte ancje pe version taliane de Mondadori. Dîs piçui Indians al è un libri biel sedi par che al è une vore dificil scuvierzi il sassin, sedi parcè che la autore e rive a mostrâ la nature umane – e no tant biele – dai personaçs. ❚
_______________________________
Il tradutôr
Ospit di chest Scomençâts par furlan dedeât ae narative zale al è Adriano Nascimbeni, nassût a Udin tal 1950, avocat par cuasi 40 agns, Difensôr Civic dal 2010 al 2013 e impegnât te vite  publiche. Adriano al à vût publicât libris di gjenars diferent: la opere di storie e memorie intitulade Ricordi di un socialista friulano (di quarta fila) (Ed. Leonardo, 2008); la racuelte di poesiis Il volto della luna (Ed. Leonardo, 2009); Jo e Luzie. Un delit di paîs (Forum, 2011) vincidôr dal Sant Simon 2010; Difensore civico a Udine (ed. L’orto della cultura, 2013); Remo e sô fie (ed. L’orto della cultura, 2014).
Tancj i premis e segnalazions che al à ricevût: tal 2012 cu la poesie Pinsîrs prin tal concors Gjiso Fior di Verzegnis; tal 2013 cun Muart in lagune al à vinçût il Zâl par furlan a Spilimberc; I romançs, Il secuestri di Catine, Remo e sô fie e Un fi par Santine a àn vût la segnalazion al Sant Simon dal 2013, 2014 e 2015.  ❚
✒ par cure di Raffaele Serafini e Dree Venier