Inte sierade dal 2005, ai 30 di Setembar e al 1° di Otubar, e si è davuelte la cunvigne dedicade a chest grant esploradôr furlan-talian-francês (Rome 1852 – Dakar 1905). I ats di chê cunvigne a son stâts racuelts intun volum editât de cjase florentine Olschki e presentât intal salon dal cjistiel di Udin il 25 di Otubar stât. Un volum (AA.VV. Pietro Savorgnan di Brazzà dal Friuli al Congo Brazzaville, Firenze 2006) di scuasi 270 pagjinis, cun preseosis riproduzions di documents autentics + 17 di taulis fûr di test. Cuindis studis ducj di alt nivel: il prin, di Bruno Zanettin, al fâs un cuadri gjeo-morfoloigjic de Afriche cetant util par capî il continent e la sô storie. Par un esempli: parcè il flum Niger si impensial di lâ a cori drenti intal continent a traviers di un percors une vore singolâr invezit di butâsi intal Atlantic che lu à li dongje de risultive? Plui sul personâl l’intervent di Detalmo Pirzio-Biroli (mancjât daspò de cunvigne, ma prime de publicazion dal libri), dissendent di Pieri, che al met in risalt i aspiets ancje mancul nobii dai finanziaments des impresis dal so basavon, che al cjatà i flics che i coventavin plui intal patrimoni di famee che no inte gjenerositât dal guvier francês. E il parcè di cheste reticence dai francês al è spiegât plui in devant intai articui di Francesco Micelli, che al incuadre la figure di Pieri Savorgnan di Braçà intun confront cun chei altris esploradôrs e gjeografs talians di chê epoche (si fevele ancje di altris furlans innomenâts, sicu Attilio Pecile e Giovanni Marinelli) e di Fulvio Salimbeni, che al analize l’ategjament e lis mossis des potencis europeanis intal ultin cuart dal secul dal ‘800 in face dal colonialisim e dal imperialisim. Simpri di caratar storic, ma sul versant religjôs l’articul di G. P. Romanato che al fevele des missions e dal lôr dificil rûl jenfri esplorazion e colonialisim; nus fâs cognossi, tra altris robis, ancje la figure di un grant esploradôr e predi sloven, Ignaz Knoblehar. Dongje di chestis analisis storichis nol mancje l’aspiet leterari. Manlio Pastore Stocchi, Elvio Guagnin e Renzo Rabboni a incuadrin il Savorgnan intal periodi dai grancj viaçs di esplorazion intal contest dai romançs di aventuris che a si ispiravin di lôr. Si fevele naturalmentri, ancje, dai romançs africans di Salgari e di Verne, autôrs che su lis memoriis dai esploradôrs a costruivin lis lôr tramis. Altris articui plui specifics a rivuardin i documents che Pieri al à lassât o che, dut câs, lu rivuardin (Isabelle Dion, Bénédicte de Capèle, Elisabetta Mori), i siei rapuarts cu la Societât gjeografiche taliane (Nadia Fusco) e lis sôs letaris a partî di cuant che al jere zovin e al studiave in France fin a la ultime spedizion chê che i costà la vite (Fabiana Savorgnan di Braçà). Nol è di dismenteâ, cun di fat, che al è stât avanzât cualchi suspiet che la dissenterie che lu puartà a murî a Dakar intal 1903, e fos in realtât discjadenade di un avelenament. A completin il volum un studi su lis imagjinis di Pieri e des sôs ativitâts che a son disponibilis in dì di vuê (Mathilde Leduc-Grimaldi) e une esposizion dai sîts internet dulà che si pues cjatâ alc che lu rivuarde (Franca Battigelli). Salacor masse brâf pe Italie, che si veve lassât scjampâ un altri dai siei miôr cjâfs fins (e no jere le prime volte che e sucedeve), il Savorgnan al veve scugnût cjapâ la citadinance francese. E cussì no fo la Italie a vaî la sô muart. La sô vedue, che e jere francese, i fasè fâ su un monument a Algeri (là che i siei rescj a son restâts scuasi un secul, prime di sedi sistemâts a Brazzaville, la citât capitâl dal Congo, che lui stes al veve fondât). La France e vai il fi adotîf che al veve savût, scuasi di bessôl e cence armis concuistâi un imperi imens inte Afriche scognussude, a fuarce di olse e di fede invincibile inte pazience e inte bontât. La sô memorie e je pure di sanc uman. Cussì al recitave l’epitafi su chel monument. No jere propi la rude veretât… Pieri lui stes nus conte (p. 75) che lis armis lis doprà ancje lui, cualchi volte. Ma dal sigûr Braçà al liberave i sclâfs invezit di fânt di gnûfs. E al veve ancje il coraç di tornâ in daûr là che no si podeve passâ cence copâ. Al jere un colonizadôr e lis coloniis si sa che a àn vût un impat devastant in Afriche. Ma almancul al jere un om che al cirive di incuintrâ altris oms.
–––––––––––––––––––––––––––––––––––––
Sot De Lint
Doi agns daspò dal so centenari e un daspò de inaugurazion dal grant mausoleu che il Congo i à dedicât a Brazzaville, la Regjon e onore il grant esploradôr Pieri Savorgnan di Braçà (1852-1905) proponint di dedicâ al so non l’aeropuart di Roncjis di Monfalcon. La gnove e je stade pandude da la zonte regjonâl intant de riunion fate a Murùs, tal paîs dulà che la famee di Braçà e veve la sô vile.
