SPECIÂL – Tai segrets de cjamare… di consei

Nissun al podarà mai savê cun sigurece ce che al è sucedût te cjamare di consei che e à burît fûr la sentence de Cort Costituzionâl n. 159/09; sentence che e à ritignudis fondadis, in vie definitive, cuasi dutis lis censuris fatis dal guvier a cualchi disposizion de L. R. 29/07 di tutele e di promozion de lenghe furlane.
NO JE STADE FACILE_ Nol somee, dut câs, che e sedi stade une cjamare di consei facile. Come  che ducj a puedin lei te epigrafe de sentence, il relatôr de cause – il famôs costituzionalist professôr Ugo De Siervo, autôr di un dai plui grancj manuâi di dirit costituzionâl che si studiin tes universitâts  –, daspò vê curât la cause par plui di un an e vê tignût la sô relazion esplicative par preparâ la  udience di discussion finâl dal ricors di impugnazion statâl de leç regjonâl, nol risulte autôr de motivazion de sentence. Sentence che, cemût che al è stât evidenziât ancje su internet subit daspò la sô publicazion (cirît su Google «lingua friulana corte costituzionale»; mi permet di citâ un gno coment, une vore tecnic, sui ponts juridichementri plui delicâts), e puarte un dispositîf une vore problematic, fondât su interpretazions no mancul problematichis. E je une sentence che e viôt tant che redatôr, rispiet al relatôr referent de cause, un altri judiç, vâl a dî Paolo Maria Napolitano, che al à scrit materialmentri i argoments di justificazion de decision.
PRASSI E STRANETÂTS_ Di fat, ducj a àn di savê che te prassi de Consulte, ancje par economie di lavôr, e tocje cuasi simpri al stes e identic judiç, nomenât relatôr te fase introdutive dal procediment ancje in considerazion dal so curriculum e des materiis che plui al è espert, fâ di redatôr de motivazion daspò la decision colegjâl, cjapade tal segret scuasit religjôs de cjamare di consei.
Se, tal nestri câs, il relatôr nol à scrit ancje la motivazion de sentence, alc di grues al à di sei  sucedût, ta chê cjamare di consei.
I cuindis judiçs, su ogni cuistion a fevelin ma, in sumis e insom, a votin. Prin il relatôr (che al cognòs miôr lis cjartis de cause); daspò chei altris judiçs par ordin di etât; in fin il president. Un relatôr che al reste in minorance, se al reste ancje cunvint de sô idee, la sentence no le scrîf, e al lasse, o al domande, che la Cort e fasi scrivi la motivazion a un altri coleghe. Forsit il relatôr (e vicepresident de Cort) De Siervo, nol à volût jessi responsabil di une sentence che nol veve conseât, e che nol condivideve.
No lu savarìn mai par sigûr. Ma cui che al à studiât la cause, e in primis l’avocat de Regjon professôr Giandomenico Falcon (che tant e tant, ancje di resint, al veve vint in Cort Costituzionâl pe Regjon), si spietave une decision e une motivazion che a varessin ancje podût jessi une vore diferentis.
TRADIZION BIZANTINE E TRADIZION ANGLOSASSONE_ Daûr de tradizion procedurâl de jurisdizion latine (e anzit bizantine) continentâl, ancje lis sentencis dai orghins judiziaris colegjâi a somein invezit monolitichis, univochis, pacjifichis (i sorestants atuâi de Regjon a disaressin «proviodudis, scontadis, inevitabilis»), daûr dal model teoric di Montesquieu che al viôt il judiç tant che semplice e mecaniche «bocje de leç» (e che no i crôt plui nissun, almancul di chei che a cognossin cemût che al funzione in concret un tribunâl).
I juriscj anglofons, che ur plâs di plui il sens pratic, no si scandalizin invezit a lei tes sentencis, massime in chês des corts superiôrs, ancje lis dissenting opinions (opinions contrariis, N.d.r), lis ricostruzions e lis soluzions alternativis des cuistions juridichis di bande dai judiçs che a àn pierdût. Ancjemò plui, cuant che lis cuistions a son tantis e tant problematichis.
Pecjât no podê lei te sentence, e meditâ, ancje la opinion dal professôr Ugo De Siervo.
La sentence, di fat, no je un totem monolitic. E somee anzit plui democratiche se e presente, fûr dal segret de cjamare di consei, ancje la dissenting opinion. Su chest pont, il Regolament pai judizis de Cort Costituzionâl al larès riformât. Ancje se i Stâts Unîts no son dal sigûr il miôr dal monts pussibii, a disin in Americhe: «Justice has not only to be done, but also to be seen to be done» (No si à dome di fâ justizie, ma si à ancje di viodi che e je stade fate n.d.r.).
Nus pâr che lu disi ancje la nestre stesse Costituzion, dulà che e previôt che la justizie e sedi aministrade tal non dal Popul Talian (sede de sovranitât e costituît ancje di citadins che a fevelin une o plui lenghis diferentis rispiet a chê uficiâl) e che ducj i proviodiments jurisdizionâi a àn di jessi motivâts (par finalitât di publicitât, justificazion e comprension, ma ancje a garanzie dai dirits di critiche legjitime e motivade).
Di fat, la critiche aes sentencis no je une mancjance di rispiet ma un contribût a un lôr studi daûr de metodologjie dai classics grêcs e romans antîcs, di Aristotele a Ciceron, secont une metodologjie dialetiche fate – prime de ete jeratiche dai bizantins – juste apont di sintesis, che a puedin nassi a condizion che si presentin no dome tesis, ma ancje antitesis.
Luca Campanotto
dotôr praticant legâl dal Foro di Udin