Si inviin lis Uti: ancjemò dut di viodi ce che al sarà

Ur vevin dit che nol sarès cambiât nuie par lôr, che anzit e sarès stade «une grande ocasion di incressite pal teritori» e cussì i vigjii, che di comunâi a son deventâts de Uti Friuli Centrale, a àn crodût. Invezit ur à tocjât di lâ in place ai prins di Març par vie che, a pene inviade la Uti, ur àn dite che no vevin plui dirit ai 80 euros al mês di indenitât pal fat che a puartin la pistole. E cussì… Jù siopar.
Ma in agjitazion a son ancje chei che a son fûr des Uti, ven a stâi la cincuantine di sindics che no àn aderît a nissune Union e cumò a domandin di jessi «comissariâts». Il motîf? La Regjon e da un soreplui aes Uti par gjestî lis funzions in associazion, e chei che a decidin di fâlis di bessôi – come i Comuns dal «no» – a àn di paiâlis di bessôi, cul lôr belanç. Il pericul al è che dopo «la Cort dai Conts nus contesti un dam erariâl». Inalore, «la Regjon che nus comissarii e che nus fasi cussì rispietâ ce che al è stabilît par leç, ven a stâi che tes Uti bisugnave jentrâ», a àn dit chê altre dì. Di storiis di chescj dîs, daspò che lis Uti – 18, rivadis cu la riforme dai ents locâi de Regjon – a son inviadis di un pont di viste operatîf, si podarès contânt une vore par dî che l’inviament nol è sempliç ancje se no dapardut si è intune Babêl.
Dut câs la situazion di transizion si sint une vore, come che e pant la sielte fate te Uti Destra Isonzo, ven a stâi Cormons e dulintor, là che par fâ capî ae int ce che a fasin lis Uti e dulà che si à di cjatâ lis rispuestis a àn metût sù un ufici di pueste in ogni Comun. «Alì – a àn spiegât – la int e podarà lâ a domandâ ce che e je la Uti». In chest periodi si cjatin ancje Comuns che, dopo doi agns che i confins des Uti a son stâts segnâts, a àn decidût di lâ a marît di une altre bande. Al è il câs di Grau, che chê altre dì al à votât di saltâ fûr de Uti Carso Isonzo e di passâ cun chê dal Agro-Aquileiese.
Gnovis un grum buinis a rivin invezit de Uti delle Valli delle Dolomiti friulane, che la presidente Debora Serracchiani, chê altre dì a Manià le à definide «un model a nivel internazionâl e che e sta par frontâ impegns impuartants pal svilup dal teritori». E je une Uti, e à zontât, che e «sta lavorant un grum ben e e je indevant la elaborazion dal plan pal svilup». Contentons ancje a Davian pes prospetivis viertis cu la partignince ae Uti dal Livenza, Cansiglio e Cavallo. «O podarìn destinâ i bêçs par fâ oparis publichis in forme plui apropriade, a son risorsis che cumò a son blocadis di vincui burocratics», al à dit il sindic.
Il Comun di Reane, invezit, al sta par decidi di puartâ in Tribunâl pe prime volte une Uti, chê dal Friuli Centrale, par vie che tal dividi i bêçs par invistiments rivâts de Regjon al è stât escludût stant che nol à aprovât il Statût de stesse Uti. In sumis, tocjarà viodi cemût che il procès al larà indevant par tirâ une conclusion. ❚
✒ Antonella Lanfrit
______________________________
Cemût che a funzionin
Lis Uti (Unioni Territoriali Intercomunali) a àn la assemblee, il president e l’orghin di revision. Al è previodût che a puedin vê – ma in realtât si sta mostrant une sielte cuasi obleade se si à di falis funzionâ – un diretôr.
La assemblee de Uti e je formade dai sindics dai Comuns che a partecipin e e je l’orghin di indreçament e di control politic e aministratîf. Ogni component che al scjât di sindic al scjât ancje de assemblee, fâle che pal sindic president che al reste su la sente fintremai che si elei il sô sostitût. Nissun al à dirit a vê une indenitât o un gjeton di presince. Nancje il president, che al è elet de assemblee. Ta chest orghin nol vâl un cjâf un vôt, ma il pês di ogni sindic – se tal Statût nol è stât scrit alc di diferent – al vâl daûr di chel che al è previodût te leç 24/2016: fintremai a 3mil animis 1 vôt; di 3mil a fintremai 10mil, 2 vôts; di li e fintremai a 15mil, 4 vôt; 6 vôts di 15mil a 30mil; 9 vôts di 30mil a 50mil; 12 vôts di 50 a 100mil e plui.
Il president al dure te incarghe 3 agns, al nomene il diretôr, al cjale che a funzionin i uficis, al da incarics dirigjenziâi, al nomene responsabii dai uficis e dai servizis e al nomene i rapresentants de Union tai ents e tes istituzions. Il diretôr al à responsabilitât manageriâl, al à il compit di gjestî e di atuâ lis liniis programatics de Uti. Al à un contrat di lavôr a timp determinât di nature privade (A.L.)