La gnove polifonie babeliche di Muguruza & Chalart 58
Fermin Muguruza al è un dai personaçs plui impuartant de musiche e plui in gjenerâl de creativitât tal Paîs Basc, a tacâ de sô militance tai Kortatu e tai Negu Gorriak fintremai ai siei progjets soliscj plui resints, tra discs, documentaris, libris, fumuts e mostris. Ae fin dal 2016 al à dât fûr un gnûf album adun cul produtôr e percussionist catalan Gerard Casajús (Chalart 58) e cu la complicitât di tancj di lôr: tra chescj a son il ghitarist francoalgjerin Madjid Fahem, Joan Garriga de La Troba Kung-Fu, lis baschis La Basu e Aneguria, lis catalanis Bocadebaba, il gjamaican Skarra Mucci, la spagnule Amparo Sanchez e la palestinese Maysa Daw Il risultât al è une sauride polifonie babeliche cun fondis reggae e dub di scoltâ cun plasê dal principi ae fin. (Marco Stolfo)
Fermin Muguruza & Chalart58, ‘Black is Beltza ASM Sessions’, cd Kasba Music 2016.
Riflessions e propuestis su la autonomie dal SudTirol
Te regjon Trentin-SudTirol si resone za di un pôc di timp in cont de revision dal Statût di autonomie. Cun chê di inzornâ la suaze normative e istituzionâl, metude adun tal 1972 e disvilupade soredut tai ultins vincjecinc agns, la Provincie autonome di Bolzan e à inviât un procès partecipatîf di pueste, la cussì clamade Convenzion su la autonomie, che e varès di sierâ la sô ativitât dentri dal Istât dal 2017. Thomas Benedikter, ricercjadôr in cjamp economic e sociâl, al interven in chest dibatiment e al met dongje dâts, testemoneancis e riflessions in particolâr su la autonomie sudtirolese che e je e su chê che e covente, tra storie, competencis aministrativis, financis e economie. Une leture interessante e istrutive. (Marco Stolfo)
T. Benedikter, ‘La nostra autonomia oggi e domani. Proposte per il terzo Statuto del Trentino-Alto Adige/Sudtirolo’, Politis/Arca, Bolzan, 2017.