Laudes (prime albade) – Alte, la cime de Grauçarie e stralûs jenfri i prins cucs dal soreli che le busse di Orient. Dut al è taponât de prime nêf: il bosc, la strade che si piert jenfri lis monts, i cuvierts de torate, dal dormitori, des oficinis. La ultime note des laudis cjantadis intal Côr si è a pene distudade insiemi cu la flame des cjandelis, e ognidun al è tornât ae sô ocupazion, dal moment che ora et labora al previôt che, dopo di vê preât il non dal Signôr, tocje vuadagnâsi il pan cu la fature dal lavôr: il fradi de stale a viodi des bestiis, sgarfant cu la forcje sot dal stran par meti adun un jet di paie frescje e nulint; il frari de oficine a soflâ jenfri lis boris par dâur fuarce e lusôr: al batarà fier par fâ imprescj, clauts, clâfs; il cjanipari invezit a controlâ che il vin, inte cantine, al polsi come cu va tai caratei di len, e che lis cuessis di purcit picjadis sui travons dal sufit no cjapin di musar. Malachie si svicine al antifonari di pergamene e, prime di sierâlu, si bandone un pôc a cjalâ ancjemò une volte lis cjartis scritis plui di cent agns prime dai muinis di Sant Gjal dai Svuizars: opare preziose e rare, regalade a Mueç cuant che la Badie e fo fondade, intal an dal Signôr 1118. Lis primis cjartis, ingjustri su la piel zale di un trop di pioris, a conservin une corone di antifonis che la Glesie Mari di Aquilee e à pandût fin dentri dal cûr da la Europe, zontant ae fin dute la Passion di Ermacore e Fortunât. Di cuant che al è il custode dai libris in cheste badie venerabile, Malachie di Treffen, fradi dal siôr di Wolfsberg, Vicedominus dal Dominus Patriarcje di Acuilee, al à votade la sô vite ae preservazion de Sapience, come che la Regule di Benedet e à prescrit intai siei comandaments. Un grant privilegjio chel di podê disponi di une biblioteche cussì grande e dai siei tesaurs: no dome evanzelaris, salteris e struments de liturgjie, ma ancje comentaris di autôrs antîcs, ducj cul lôr coment morâl. E une maraveose version dal Rainhalt e Lesengrin trascrite di Vilielm di Lavarian, copist dai plui fins, intune lenghe volgâr insiorade di une assonance che a clamin furlane, plene di chê musiche bielissime che i aquileiês a metin tal lôr fevelâ. Ma vuê e je une zornade speciâl. Di gale. E ducj a son cjapâts di une fiere strambe: si è in spiete di une delegazion che e ven di Worms, inte lontane tiere di Gjermanie. A son clerics di Rome, robe di curie: bonsignôrs, vescui, segretaris. Forsit ancje cualchi cardinâl. La vôs che e zire e je che a varessin a pene concludude une riunion conciliâr di grande impuartance, che e varès di meti finalmentri pâs jenfri Pape e Imperadôr. Poiant lis antifonis inte scansie di len de biblioteche, Malachie al riduce pensant a ce che al disè Sant Jaroni, che di musiche si intindeve: «I clerics di Aquilee a cjantin tant che un côr di beâts, chei di Rome invezit a vuachin come cjans!».
Hora Sexta (Misdì) – Delmo, il cogo, al è deventât mat, par superâsi. La mense, par volontât dal Priôr, e à di maraveâ i ospits romans: trute frescje, pescjade te Fele, passade inte farine e poiade su la gridele, siervide suntun jet di lidric di mont conservât intal vueli istrian; une sghirate rustide tal for, insavoride di pevar e poiade a nadâ intune salse di meluç; cevolis sot de trape; vin blanc di Rosacis. E, par finîle cul dolç in bocje, mîl salvadie, di gustâle cul siç di piruç. Di lecâsi lis orelis, che nancje inte matine di Pasche si mangje cussì ben te badie. E invezit? Malachie al cjale i ospits de delegazion: cui lôr vistîts di vilût e di armelin, lis manecis di bolp plenis di anei e di pieris preziosis. Il cardinâl, ruan inte muse tant che tal vistît, al svante une crôs di aur picjade intune cjadene tampiestade di medaions di arint cu la muse dai cuatri evangjeliscj. A fasin smorfiis, chei siorons de glesie romane, a riducin, cu la man i fasin capî al cogo che no gradissin, e che al lassi pierdi. Satis est, satis est confrater! Che insome a son usâts a savôrs plui delicâts. E che si fermaran juste il timp di durmî vie pe gnot e tornâ a partî ae svelte, intal doman. Malachie al pense al so piçul borc di Treffen. Là che al è nassût ancje un grant patriarcje, chel Poppo che al veve fate braurose e biele la Basiliche di Acuilee. Fedêl plui al Imperadôr che al Pape. Intabarât jenfri capuç e mantele, al scomparìs bande la biblioteche. Miôr la compagnie dai libris di chê dai cardinâi. Une ombre scure puartade di une buere nere e cuvierç la lûs dal soreli. Che al sedi un brut segnâl?
____________________________
1122 IN FRIÛL: UNE BUINE POSIZION
Intai ultins agns de lote pes invistiduris, il Patriarcjât di Acuilee si ven a cjatâ intune posizion strategjiche impuartantone, tant che il plui meridionâl dai principâts eclesiastics Imperiâi, fedêl come chei altris ae Corone, e il plui setentrionâl dai prelâts sogjets ae ubidience romane, dispès in contrast viert cul Pape. La Corone, in chest periodi, e sburte pe formazion di une rêt di badiis che e puedi costituî un control teritoriâl impuartant: Millstatt (1080), Sant Paul in Lavanthal (1099), Sant Lambert (1102), Arnoldstein cun Ebendorf in Iauthal (1106,) il munistîr di Sant Durì al Tiliment e, tal 1118, la Badie di Mueç insiemi cun chê di Rosacis. La famee plui in viste dal Patriarcjât fin ae vilie dal concili di Worms e je stade chê dai Eppenstein: cun Vodalrì Patriarcje di Acuilee, che al mûr intal 1121 e so fradi Indrì, duche di Carinzie, spirât l’an dopo, ai 4 di Dicembar dal 1122. La famee e jere profondementri unide ae Corone dal Imperadôr, Indrì V, tant che il Pape Pasquâl II al fo tignût presonîr propit dal Patriarcje a pro dal Imperadôr.
_________________________
1122 IN EUROPE: IL CONCILI DI WORMS
Il concili di Worms, congjedât ai 23 di Setembar dal 1122, al varès vût di sierâ la dispute jenfri il Pape e l’Imperadôr, miôr cognossude come la Lote pe invistidure. Dut si jere viert cun Gregori VII e Indrì IV tal 1077, l’an che – propit in conseguence di cheste contraposizion – e nas la Patrie dal Friûl (ai 3 di Avrîl dal 1077), dimostrant ancjemò une volte che la storie dal nestri popul e je fondamentâl par rivâ a capî ancje chê de Europe e dal mont. La prime metât dal secul XIII e reste impuartantone ancje pal disvilup de economie. Lis citâts aromai a son deventadis une vore potentis dal pont di viste economic, gjestidis di une borghesie che e vûl jessi rapresentade ancje te gjestion politiche cui siei rapresentants. Lis universitâts in Europe si moltiplichin e i students a viazin puartant ator ideis gnovis, culturis, sensibilitâts, bevint intes ostariis di Praghe, di Heidelberg, di Oxford tam pro papa quam pro rege, convints che la Storie e varès vût di zirâ la ruede par fâ nassi un mont gnûf e plui interessant. Purtrop si sbaliavin di grues.
