Un voli su lis lidrîs e chel altri su la internazionalitât: Folkest 2017 al conferme di jessi un pont di riferiment pe culture de nestre regjon e chest an “al sofle” su 39 cjandelutis cun tantis novitâts.
Di fat, vegnin di ogni bande dal mont i artiscj che, come ogni Istât dal 1979, a animin i tancj palcs di Folkest, il principâl festival che al esplore lis musichis e lis culturis dal mont, chest an in program dai 22 di Jugn ai 12 di Lui, cun ancje cualchi altri impuartant avigniment sucessîf.
Une anteprime significative al festival e je stade a Ospedalet di Glemone cuntune serade dute al feminin, che e à tornât a cjapâ in maniere ideâl il focus dal an passât dedicât ae Sardegne, cu la presince di Ambra Pintore cul so cuartet, za vincidore assolude di Sunâ@Folkest intal 2015. Cjantante, atore, condutore, Ambra e je une artiste complete: Terre del ritorno al è il so secont disc, presentât propit a Folkest, prodot di S’Ard Music. Une evoluzion significative pe cjantante, autore dai tescj e des musichis, par dîs storiis che a viazin in sart, sicilian, puliês, francês, inglês supuartadis des melodiis jazz di un sax, des sugjestions des launeddas, dal country di une sunete.
Sul stes palc e à sunât ancje la zovine Martina Iori, fassane doc al pont di favorî il so ladin ancje intes cjançons che e scrîf, tant che intal so prin album Amore e Buscofen.
Martina Iori, di Alba di Canazei, e à scomençât a vot agns rivant tierce al Zecchino d’oro, cence plui lassâ il mont de musiche e vincint tal 2014 il Suns Festival a Udin cu la cjançon Via con mia musega. E cumò si cjate, a dome 21 agns, cuasi laureade in violin al Conservatori di Bolzan e e parone ghitare, flaut, piano e ukulele.
Par cognossi dut il program di Folkest al è il sît www.folkest.com dut par talian, inglês e furlan, in graciis de colaborazion cu la ARLeF che e à finanziât ancje il stand e il materiâl divulgatîf in lenghe furlane che al sarà distribuît al public, adun cui libris di Glesie Furlane e il nestri mensîl.
✒ Redazion