Un viaç di Murmansk a Odessa, di San Pietroburgo a Tiraspol. Dal arcipelago Gulag a Chisinau. Passant par Austrie, Slovachie, Polonie, Bielorussie, Ucraine, Romanie, Ongjarie e Moldavie, e po in Russie. Al è chel che al à fat Sergio Freschi, 59 agns, motâr di Pagnà, cu la sô Guzzi 850T5 (che e à 32 agns), dai 30 di Lui ai 12 di Setembar dal 2016. Partît dal Friûl e tornât in Friûl. «Un itinerari che o ai volût dedicâ al Udin, par vie che o soi un apassionât dal balon – o aleni ancje une scuadre – ; di fat, propit in omaç ae scuadre di Delneri o ai clamât il gno viaç “dal Mâr Blanc al Mâr Neri”». Freschi al ten seradis dulà che al mostre lis foto dal so viaç. Di une spontaneitât e simpatie contagjose, lis presente simpri e dome in marilenghe. E, cjapât dal pathos, al è facil che al sbrissi cualchi intercalâ di bar, tipichementri furlan.
Nol je la prime volte che Sergio Freschi al davuelç impresis come cheste in moto. Cualchi timp za fa al jere lât dal Friûl ae Mongolie, sul troi e cui conseis dal storic motâr cjargnel, Italo Barazzutti. Chê volte, al veve fat un libri cun dute la aventure. Freschi nol cognòs nissune lenghe dal Est. Se gjave fûr simpri par furlan. «Cuant che tu ziris pes grandis citâts al è facil cul francês o cul inglês, ma tai piçui paîs o tes citâts no turistichis dulà che la int no je studiade, il furlan al è il gno esperanto. No sai se al è par vie che a capissin des espressions de muse o de mê gjestualitât, ma in marilenghe o soi rivât adore di fami capî dapardut» nus à confidât. La passion dal viaç e je scomençade di zovin: za a 17 agns in France e a Parîs, dai parincj li emigrâts. Po dute la Europe, cui viaçs Interrail, in tren. «Il mût miôr di viazâ, ancje se plui lent, ma chel che al sburte di plui ae cognossince di altris personis e che ti fâs gjoldi de bielece dai paisaçs». Fintremai prime di scuvierzi lis motos: «Tu ti sintis un cavalîr», nus confide.
Si sa che un viaç al scomence prime di dut tal cjâf. Lui, cuant lu aial pensât, preparât, cemût lu aial organizât? «La prime ispirazion mi è vignude di Tolstoj, il gno autôr preferît. O volevi lâ a viodi i siei puescj. Mi àn simpri inmagât i inteletuâi rus, di stamp anarchic libertari, come lui. O soi lât a viodi la preson là che a àn sierât il gjeograf Kropotkin, par esempli. Di Tolstoj, o sei lât a cirî la tombe. No si è fat viodi nancje di muart: si ben che al fos siôr, al è soterât tal mieç di un bosc, taponât dal muscli, cence une lapide. Nol è intun pont precîs».
Un altre reson dal viaç e je stade la ricercje di un turisim no “di trope int”. «O soi lât a cirî i puescj e lis citâts scognossudis o pôc visitadis. I europeans a van massime a San Pietroburgo e a Mosche: culì il turisim al è di “masse” e i presits di conseguence. Jo o ai cirût chê ‘altre’ Russie. O ai visitât par esempli dutis lis citâts ‘martiris’, chês sdrumadis de furie di Hitler. A Smolensk, tune catedrâl o ai scoltât un côr di 8 personis che al cjantave messe e al rispuindeve al plevan. Chel côr al è bastât a ripaiâmi de sodisfazion dal viaç. O ai visitât la Bielorussie, che no jeri mai lât. Un cidinôr unic: dut calm e cuiet, un puest di un rilassament totâl. E po o ai scuviert il mâr Blanc. Il mâr dal Arcipelago Gulag, dulà che no si podeve scjampâ des purghis comunistis. Si clame mâr Blanc propite par vie che di Invier si glace dut. In Carelie, regjon di confin cu la Finlande, o ai scuviert la civiltât dai cimitieris. Cimitieris dapardut ben tignûts e conservâts. Dulà che la int si ferme a preâ. Simpri di chês bandis al è Murmansk, li che il mâr no si glace mai e li che e je la flote navâl russe. Culì si cjate ancje Alyosha, monument alt 40 metris in ciment armât, un soldadon che al cjale bande de Finlandie, tant che un monit. Di chê citadine, là che o ai paiât un apartament 7 euros par gnot, po dopo o ai cjapât il traghet pal Mâr Blanc».
Il puest plui stramp là che al è stât? «Dôs robis mi son restadin iniment. Une volte che tu passis il confin Bielorussie – Russie, tu jentris te Federazion russe e al è come jentrâ in Europe, no son plui confins, ni controi, jenfri un stât e chel altri. Po dopo o ai vude une esperience sureâl in Transnistria, une piçule regjon che uficialmentri e fâs part de Moldavie, ma che si è autoproclamade indipendente cul jutori di Putin, ancje se i organisim internazionâi no le àn ricognossude. Al è un teritori super controlât, dulà che al è un grum di trafic di armis, une scune di teroriscj. Al è l’unic puest dulà che mi àn dât un vistât turistic di massime dîs oris, nancje di une zornade, par che o les fûr dai tabars il prin pussibil».
✒ Oscar Puntel
