Il disarmament complet de ETA, il «procès» catalan, la assemblee de Aleance Libare Europeane e il prin turni des elezions presidenziâls tal Stât francês. Ancje vie pal ultin mês no son mancjâts fats pardabon interessants, pe Europe e ancje pal Friûl, che de Europe al fâs part.
L’event plui impuartant al è par sigûr chel che al è stât ai 8 di Avrîl. Chê date e jentre inte storie de Europe e dal mont intîr, stant che e segne in maniere definitive la conclusion de lote armade pe indipendence dal Paîs Basc. Juste in chê zornade, dopo che vie pal 2011 e veve za cjapât une decision in chê direzion, la organizazion rivoluzionarie socialiste pe liberazion nazionâl ETA (Euskadi ta Askatasuna = Paîs Basc e Libertât), metude adun cun chê di scombati pe indipendence dal Paîs Basc ancjemò tal 1959, e à completât il so disarmament unilaterâl. La operazion e je stade fate cu la colaborazion dai Bakegileak (i Artesans de pâs), rapresentants de societât civîl basche impegnâts par sigurâ il procès di disarmament decidût de ETA. La consegne aes autoritâts de polizie francese des informazions sui arsenâi ancjemò ator pal Paîs Basc dal nord e je stade fate de bande di une comission internazionâl di verifiche, metude adun ancje cu la poie dai guviers de Comunitât Autonome Basche, de Navare e de Comunitât Provinciâl Basche francese, che po e à certificât il disarmament. A Baiona-Bayonne in miârs di lôr a àn compagnât la azion dai Artesans de pâs, cuntune manifestazion publiche.
La decision di ETA di consegnâ il so arsenâl e je stade comentade in maniere positive de bande dal guvier francês, intant che a Madrid a àn mostrât fredece. Di chês bandis al somearès che ur displâs di no vê plui un nemì armât e che no vedin voie di vierzi nissune forme di dialic, ancje in chestis gnovis cundizions. Cun di plui, l’esecutîf spagnûl al à cjatât une altre volte la poie dal tribunâl costituzionâl tal so braç di fier cu la Catalogne. I judiçs a àn dât acet al so ricors di incostituzionalitât fat indenant cuintri des vôs dal belanç de Comunitât autonome che a fasin riferiment ae organizazion di un referendum su la indipendence. Pal moment al è stât decidût di suspindi chestis vôs in maniere cautelâr par sîs mês, in spiete di esaminâ il ricors in detai. Il guvier di Madrid al à ancje domandât al tribunâl costituzionâl di visâ il president Carles Puigdemont e il guvier catalan che se a laran indenant cul percors sovranist a varan di frontâ un procès penâl. Ma a Barcelone no àn pôre: il referendum si davuelzarà distès, cun o cence di un acuardi cu lis autoritâts statâls.
Tra la fin di Març e il prin di Avrîl si à davuelte a Katowice, in Slesie, la diesime cuinte assemblee gjenerâl de Aleance Libare Europeane (EFA-ALE), il partît politic european che al met adun sù par jù cincuante organizazions autonomistis o indipendentistis dal continent. In chê ocasion e je stade fate buine ancje la domande di adesion, pal moment cul status di osservadôr, dal moviment Patrie Furlane.
Ai 23 di Avrîl al è stât il prin turni des elezions presidenziâl tal Stât francês. Daûr dai vôts cjapâts, la balotazion dai 7 di Mai e viodarà la estremiste di drete Marine Le Pen e il centrist Emmanuel Macron, che i scandais statistics lu dan par vincidôr e che vie pe campagne eletorâl al veve palesât la sô intenzion di rivâ a ratificâ la Cjarte europeane des lenghis regjonâls o minoritariis. Viodarìn ce che al nas.
✒ Marco Stolfo
