Bortul al jevà sù dal paion mieç incjocât dai siums jessûts de panze de gnot e de bielece de nuvice che e durmive dongje di lui: il cuarp di Lise, involuçât dut intor di une anime frescje di nancje vincj agns, al profumave di muscli e di fen, garp e salvadi come l’aiar fresc di chê strambe Primevere, dute ploie e soreli, lûs e nûi. I displaseve lassâle di bessole, propit cumò che al veve gustât tant il pan che la molene de sô zovinece, respirât dentri dal bosc neri dai siei cjavei, spandude plui voltis la sô semence jenfri chel grim blanc di femine frute, clip e nulint, gjenerôs di promessis tant che la cumiere di tiere nere dal bearç.
Lis bestiis inte stale a parevin businâ di malinconie, reclamant la sô man. E la albade vie pe taviele – cuasi par dispiet – i someave plui sflandorose di simpri. Al sucêt simpri cussì, cuant che al tocje partî, che dut ce che al reste daûr de schene al pâr plui biel, e un miscliç di rabie e di marum ti rosee la anime come un dint di surîs inte piece dal formadi. Ma la “clamade” dal cjapitani e jere stade clare, e no lassave nissun spazi di decision: picjade in place, sot de tor, sul pâl de justizie e in ogni crosere di strade. Il bric le veve berlade ben e no mâl plui voltis, in place, par ducj chei che come lui no vevin mai imparât a lei la scriture dai dotôrs. Ducj i “masclis di fazion” che a podevin puartâ lis armis, ven a stâi la curtissate e la piche, a vevin di presentâsi dentri di doi dîs a Udin, devant de Cjase Savorgnane, par jessi intropâts inte soldataie di fantarie. Insome, cjar buine pe plui grivie di dutis lis becjariis. La cjampane e jere state batude, daûr de ordenance, il tamburin al jere za che al zirave par ducj i trois de vile, e daûr di lui si strissinave vie une trupe scuintiade di contadins, cui zovin, cui vecjo, obleâts di Vignesie a bandonâ dut, cjamps, lavôr, famee, par regalâ il sanc ae bandiere dal Leon.
A Bortul i someavin tantis pioris che cence protestâ a lavin daûr dal om cul massanc: usadis di gjenerazions a jessi sgosadis sul altâr dai parons. E lui, cheste volte al jere une di lôr. La seconde volte. Che la prime, dîs agns indaûr, lu vevin clamât jenfri la cortine di Vencon par combati cuintri i Turcs. Al jere ancjemò un zovenut, in chê volte, e di prin pêl. Cence nuie di pierdi, fûr che la vite, si capìs. Ma cumò, la cuintripartide e jere grande. A scomençâ di Lise. Che la zornade di un sotan e jere e e restave dure. Fam e fadie. Ma chei voi di gjate marangule lu vevin incjocât, stranît. Tant che fintremai lavorâ tai cjamps di chei altris no i pesave cussì tant. E il cit di mignestre, la boce dal vin i bastavin a tirâ sere, savint che il jet nol jere vueit e che in file, inte stale, la fantate plui biele e jere la sô.
Dome une robe nol rivave propit a glotile: scugnî servî sot di chê love di Vignesie, che inte Patrie aromai al voleve dî jessi ai ordins de bandiere Savorgnane: siorons arogants e bulos, tant lôr che i lôr sgherats, che cuant che a rivavin sglonfs di prepotence a puartavin vie dut ce che a cjatavin pe strade. Laris cun tant di licence par robâ. E se tu protestavis, ti cjareçavin la schene cul baston. Simpri che ti les ben. Se ti lave mâl invezit, ti picjavin pal cuel come une sopresse sul ramaç plui alt dal prin arbul vie pe strade. “Bortul, ancje tu in vuere?”. A fevelâ al jere stât Mainart, il fari, che sul prin cricâ dal dì al jere bielzà a vore dentri de sô buteghe, a bati fier par fâ pontis di balestre e lamis di spade: “Fortunât tu, che tu puedis restâ a cjase! Mistîr util, il to, in câs di vuere. Che anzit, la comande e devente ancjemò plui penze, no mo?”. Nol jere just, par Bortul, che a fossin simpri chei a risi di rimeti la piel. Bon, in chê volte dai Turcs si difindeve la proprie int. Ma cumò? Si fevelave di lâ a scombati lontan, in tiere lombarde, cuintri soldâts che no ti vevin fat nuie, cuintri il Pape, adiriture, e i todescs imperiâi. Chei stes che a vevin fondade la vile, plui di cinccent agns indaûr, imparintâts cui furlans a Gardiscje, e tal Cjanâl di Pontebe. E par difindi cui? Une potence che di agnorum e roseave boscs e e pretindeve sanc di galiots su la marine, budiei di sbultricâ in tiereferme.
Ma cheste volte no je varessin petade a Bortul, sotan di Vilecjaze. Al jere stuf di pleâ i zenoi, di gjavâsi la barete. Se al fos rivât a scjampâ fin tal boscut di Pasian dai Sclâfs, cjaminant di gnot, evitant lis rondis, in trê o cuatri dîs al sarès rivât fin tal Bosc di San Marc, in Cjargne. E di là sù, al varès fat crame di cuintribant. Sâl e sgnape! Miôr bandît e traditôr di Vignesie che cadavar butât in cualchi agâr in tiere foreste. Che la biele Lise lu varès spietât cence suspiet o pôre. Come il lôf, al sarès tornat su la prime nêf a reclamâ in muse al mont la sô vite e la sô libertât di sielzile.
_______________________________
1509 IN FRIÛL: VIGNESIE PARONE
Vignesie aromai e impere su la Patrie dal Friûl di une novantine di agns (1420), mantignint dome tal non lis struturis aministrativis ma svuedantlis di dute la lôr impuartance, a scomençâ dal Parlament. Il teritori furlan al ven trasformât tant che une colonie di molzi e di sfrutâ, tacant de bondance di len. Il grant patrimoni forestâl de Cjargne al devente une risierve impuartantone di materiâi (il Bosc di San Marc) di puartà ju fin tal arsenâl citadin pe costruzion des nâfs, massime di chês di vuere, dal moment che il conflit cui Turcs al devente simpri plui crudêl e fuart. Ma la Patrie e je ancje une risierve impuartante di oms, di cjar vive buine di sacrificâ in vuere: i presonîrs a deventin “galiots”, e aes comunitâts si comande une percentuâl simpri plui grande di disperâts par fâju remâ inte flote di Sant Marc. Pe fantarie invezit a nassin lis cernidis: i contadins, armâts ae buine, a vegnin intropâts in câs di vuere e mandâts a murî là che al covente, come inte bataie de Ghirladadda, combatude ai 14 di Mai dal 1509.
____________________________
1509 IN EUROPE: LIS VUERIS DAL PAPE
Il 1509 al rapresente un an fondamentâl intai rapuarts politics internazionâi: il Pape Gjulio II della Rovere, incjocât di potence e di presunzion, volint tornâ a puartâ il non de glesie di Rome ae sô plui grande potence, al clame a lavorâ in citât i plui grancj artiscj e architets, tant che Michelangelo, dome par nomenâ il plui famôs: chest però i fas spindi un frac di bêçs, e lu sburte a movi vuere cuintri i siei aversaris. La plui cjapade di mire e je Vignesie, che si sta slargjant intun teritori che al fâs gole ancje al vescul di Rome: cussì, di scuindon il Pape al met insiemi une leghe, chê di Cambrai, che e cjape dentri l’Imperadôr Massimilian I di Asburc, il re di France Luîs XII, il re di Napoli e di Sicilie Ferdinant II di Aragone, il duche di Ferare Alfons d’Este, Carli II di Savoie, Francesc II di Mantue e il re di Ongjarie Ladislau II. Cun ducj chescj nemîs impuartantons, Vignesie no podeve che pierdi la grande bataie che si combat dongje dal flum Adda, ai 14 di Mai dal 1509, là che tancj contadins furlans, cjapâts tes cernidis militârs, a forin massacrâts par une Patrie che no jere la lôr. Come che simpri, inte storie, nus à tocjat di fâ, magari cussì no.
✒ Agnul Floramo
