Situazion malsigure pe scuele furlane che in chest periodi si prepare a tacâ un gnûf an scolastic. Cun di fat, se cualchi buine gnove e rive dai numars che a interessin lis gnovis assunzions di insegnants, il futûr nol è tant clâr par chel che al inten dirigjents e personâl Ata. Pensìn dome al numar di diretôrs e diretoris che a àn di aministrâ la realtât scolastiche che di chê i dâts gjavâts fûr dal Ministeri pe Istruzion a fevelin di bessôi: su sessantesîs autonomiis scolastichis presintis tal teritori de ex provincie di Udin, a son in dì di vuê dome cuarantetrê titolârs. Ta chest cuadri, la situazion cualchi volte e rive al paradòs: par fâ cualchi esempli, se a Lignan al è un diretôr che al guvierne dôs scuelis, a Trasaghis al è un che al scuen viodi di cuindis ples scolastics. A Codroip, invezit, al è un istitût comprensîf che al conte 1.900 students sparniçâts fra undis sedis. O pûr pensìn a Tarcint, dulà che in chestis setemanis la dirigjente e je passade al Zanon, lassant cence vuide une realtât scolastiche che e met adun tredis scuelis: fra chestis, no dome i ples dal cjâf lûc ma ancje lis scuelis di paîs di mont tant che Lusevare, Nimis o Taipane, dulà che a son ancje situazions culturâls, linguistichis e sociâls cu lis lôr particolaritâts. In chescj agns, al è sucedût plui voltis che in mancjance di gnovis nominis si à sielzude la pratiche de rezince, e chest al à compuartât di afidâ a di un sôl dirigjent la responsabilitât su realtâts scolastichis une vore gruessis, diversificadis e ancje complessis, viodudis lis carateristichis dal teritori furlan jenfri mont, culine e plane. Si capìs che nol è facil lavorâ ben in chestis cundizions. Se po si va a viodi la situazion dal personâl, nancje in chel câs si è tant ben metûts: doi agns indaûr cui che al è lât in pension nol è stât sostituît, cuntune pierdite a nivel talian di ben doi mil personis. Vuê, in regjon, cun 3.865 personis che a componin il personâl aministratîf, tecnic e ausiliari dal setôr scolastic, dome vincjedôs a àn mancul di trentesîs agns. Cjapìn il câs di Comelians, dulà che al è un comprensîf sudividût in dîs scuelis che al pues contâ su undis bidei: la dì che un di chescj si inmale, a tachin a jessi problemis par chel che al inten vigjilance, acet, eficience tai servizis, sigurece e pulizie.
Infin, il cuarp docent: dal Consei dai ministris a àn fat savê che in Regjon a saran fatis 1.066 gnovis assunzions. Un buine notizie dal sigûr, viodût che si larà a implenâ vueits presints di timp, ma i stes sindicâts a visin che inmò no si è sierât il concors pe scuele de infanzie. E po, lis domandis di suplents tai prossims 3 agns a son tantis. Mario Pittoni, responsabil de scuele pe Lega Nord al fâs savê di vê frontât l’argoment cu la ministre Valeria Fedeli: «Al è l’impegn de ministre – al dîs – a intervignî par sveltî l’iter dal concors pai dirigjents, di maniere di cuvierzi za pal an scolastic 2018/19 lis busis che in diviersis provinciis a van sore il 50%. Di fat, nol baste che il bant al sedi publicât in curt: la leç 208/2015 e previôt un cors-concors seletîf di formazion, duncje chei che a podaran jessi cjolts a vore a varan ancje di frecuentâ un cors di formazion, dopo vê fat preselezion e provis scritis e orâls. In chest moment, se lis robis a laran cussì, si varà di spietâ fintremai al an scolastic 2019/20 par podê meti a vore la int assunte te scuele furlane».
✒ Piero Cargnelutti
…………………………………………………………………..
La denatalitât e pues jessi la cause dal sierâ des scuelis in mont
Inte mont furlane, invezit, il risi al è chel che tantis scuelis primariis a vedin di sierâ par vie de natalitât scjarse. Il probleme al ven presentât de Cisl dal Friûl de Alte, che e à realizât un studi di pueste. Tal document si osserve che ai 31 di Dicembar dal 2016 in Regjon a risultavin 45 mil 739 frutins jenfri i 0 e i 4 agns: in percentuâl, a rapresentin il 3,7% dal milion e 200 mil de popolazion regjonâl. Lis zonis di mont a son chês che a pain il cont plui alt in cheste suaze: tal detai, al è dome Manià che si salve cun 141 nassûts l’an passât, un numar che al rapresente un cuozient di natalitât dal 10,3 confrontât cuntune popolazion di riferiment di 13 mil 698 abitants. Pal rest, la situazion e je une vore grivie: pensìn a Comelians, dulà che il cuozient di natalitât si ferme al 4,2 o Dimpeç cun 49 nassûts che a rapresentin un cuozient dal 5,6 (tal 2014 al rivave al 7,1); o pûr a Tarvis, li che a front di 7 mil 451 abitants, tal 2016 a son nassûts dome in trentesîs, siet in mancul dal an prime e disesiet di mancul ancjemò se si confronte cul 2014. Tal Friûl ocidentâl, cjalìn il câs di Montreâl: setantesîs nassûts tal 2013, l’an passât dome cuarantesiet. Cuasi trente in mancul. Ma il probleme al tache a interessâ ancje zonis che a son mancul montanis. Pensìn ae zone pedemontane dal Glemonàs: l’an passât a son nassûts novantecuatri frutins, un numar che al à puartât il cuozient di natalitât al 6,6 a pet dal 8 dal 2012. Insome, bisugne pensâi parsore se si vûl salvâ la scuele furlane dal futûr.
✒ P. Ca.
