Ghite, mestre di scuele elementâr a Rabil tal 1953. Vincj agns, a pene vinçût il concors, trasferide di Spilimberc.
I stivaluts di corean a cjalcjin la nêf, un pas daûr di chel altri. Glace e frêt. Il flât al devente sbuf di vapôr tal cidinôr di une albade blancje tant che dut il paisaç. Su di une altre nêf Bruno, il pari di Ghite, dîs agns prime al veve pierdût par simpri il so troi, in Russie. E nol jere plui tornât a cjase, come in tancj de sô classe, glotût inte gose nere di une vuere sassine, lassant a cjase une nuvice ancjemò masse zovine e chê frutute di dîs agns, cul non profumât e sempliç di une rosute di cjamp: Margherita, ae anagrafe fassiste. Ghite par ducj chei altris.
E jere ancje lade ben, che il cagon di uficiâl comunâl al cirive di conseâ so pari a clamâle Germana, dal moment che propite in chel an alì Hitler al vinceve lis elezions a Berlin. Che di sigûr, il Duce al varès fatis grandis robis cun chel grant statist che si jere simpri dimostrât entusiast de politiche di Mussolini. “E alore, o podaressis clamâle Italia!”, i disè a so pari, segnant ben letare par letare e cuasi saltant in pîts, cul braç lunc tirât ae mode romane. Che invezit, di bon contadin, il pari al veve insistût – e par fortune – pal non di une rose.
Cuissà mai cetant braurôs che al sarès stât il pai: brave a scuele, diligjente e plene di passion, studiose e scrupulose, cuasi obleade a paiâ cul titul di studi il sacrifici di dute la famee par fale studiâ a Udin. E cumò, a vincj agns a pene finîts, finalmentri mestre. Un mistîr preseât e rispietât. Prime assegnazion: Cave del Predil. Che se il guvier fassist al jere colât, la fassistizazion dai nons di paîs invezit e resisteve, dal moment che i abitants e jerin convints di vivi a Rabelj, o a Raibl, mighe a Cave! Ma Ghite e veve une vite devant dai voi, dute di disniçâ, cui bêçs dal stipendiut di sparagnâ franc par franc par mandâju a Spilimberc, là che une mari vedue ancjemò zovine e trê fradis plui picinins di jê a vevin sigûr dibisugne. Prin di dut, par rivâ a metile su la taule ogni dì, la sope cu la polente. Fortunade, la Ghite. Che tancj di lôr a vevin scugnût lâ ator pal mont a cirî il pan, cui in Svuizare, cui in France o piês ancjemò in Argjentine, di là di chê grande aghe che e inneave afiets e siums.
Il so destin invezit si spalancave su chel paisut fracât tant che une sclese sot dai crets di une mont ancjemò plui puare di chê plane che jê e veve a pene saludade. E za il viaç al jere stât une aventure. In tren sù fin a Tarvis. E po dopo vie, di buine ande cu la valîs in man, un toc a pît, e par gracie di Diu prime de grande salide zovantsi dal passaç di une camionete che e puartave sù cjarbon. E la puce di cjarbon le varès compagnade dulinvie, no dome pal timp dal viaç: che ogni cjase e veve la so stue par parâsi di un frêt che al cricave, e la muse de int e someave infrusignade.Tant che i minadôrs. Che il mistîr di ogni om di famee al jere chel di gjavâ fûr il plomp e il zinc dai budiei de mont: la Kraljevska, come che le clamave la int di chestis bandis, batiade Monte Re dai talians, simpri cu la lôr manie stupide di cambiâ il non ai cristians e aes monts!
Si sarès subit inacuarte, la Ghite, che il mistîr dal minadôr al prodûs plui vuarfins che no siôrs: inte classe multiple che i vevin assegnade, su cincuante fruts vincj a vevin pierdût cualchidun in miniere. E sul regjistri? I cognons a son Fleis, Kravanja, Kaus, Jelen, Pivk. In cjase a fevelin par sloven e a capissin benon il furlan e il todesc. Ma il talian al somearès pluitost une lenghe di un altri paîs. Forest. “Brava questa mia cara giovane. Lei avrà il compito di insegnare la cultura della nostra bella Italia nei più lontani confini che ne presidiano la lingua e la civiltà”. Cussì, i veve dit il diretôr didatic, cuntune cadence siciliane, cuant che i veve consegnade la letare di assunzion. E cumò, devant di chel trop di mularie dai cjavei di panole e cui voi clârs tant che la glace, je si sintive un pôc fûr dal timp.
E il grant entusiasim di cuant che e jere partide si mudave in rabie. Rabie-Raibl, e pensave. Inte borse, chê grande, che i vevin regalade tant che premi pal gnûf lavôr, biele e lustre, dute di piel, e veve metût i libris di Collodi, di De Amicis, lis poesiis di Pascoli e di Carducci. Su la catidre une fuiace di pan, cuet di une mari, un zeut cun dentri une scuete fumade, preparade di cualchi none intune casere. “Cemût le clamaiso cheste pagnoche, chi in paîs?” e domandà Ghite ae frutute bionde in pîts devant di jê. “Hleb, majestra”. E cemût diseiso bundì, chi di voaltris? “Dobro jutro, majestra”. Ghite, cjalant in muse frut par frut, ducj i 50 cun chê muse rosse e durions su lis mans che le cjalavin spaurîts, e tacà la lezion: “Dobro jutro!”. La culture si tache a studiâle de lenghe, e la lenghe e je chê che si fevele in cjase. No saveve se e faseve ben o mâl, ma viodiju ducj e 50 a riduçâ al fo par Ghite le paie plui ben vuadagnade di chê prime zornade di scuele.
………………………………………….
<Il 1953 in Friûl; la nassite dal F-VJ> Tal 1947, la Costituzion dal stât Talian e veve decretade la istituzion de Regjon Autonome Friûl – Vignesie Julie, une mostruositât gjeopolitiche che no veve nissune fonde storiche o culturâl. Tal stes timp, a peiorâ la situazion, un tratât internazionâl al creave il “Teritori Libar di Triest”, dividût in dôs zonis: la A, sot dal control dai Aleâts, la B controlade de Jugoslavie Titine. Nancje discori che dutis chestis complicazions a varessin puartât a une situazion di stiçament, une polvariere che e varès podût saltâ par aiar di un moment a di chel altri. Vie pal Istât dal 1953, l’esercit talian al inschirie lis sôs trupis propit su chel confin. Mai come in chê volte il pericul di une vuere si fâs grandonon. Lis manifestazions e i svindics dai mês che a vegnin, in particolâr il Novembar di sanc dal 1953, a puartaran, ai 5 di Otubar dal 1954, a preparâ il famôs Memorandum di Londre. Triest e jentre in maniere definitive in Italie, cun dut ce che al derivarà pal Friûl: ven a stâi, une fuarte sperecuazion sociâl che ancje in dì di vuê e fas sintî lis sôs magagnis.
…………………………………………….
<Il 1953 tal Mont: trê grancj protagoniscj> La vuere de Coree e finìs, cu la fatidiche definizion dal 38o paralêl tant che confin di vuardie. Ai 5 di Març dal 1953, inte sô dacia di Kuntsevo, dongje di Mosche, al murive Josif Stalin, e al deventave segretari dal Partît Nikita Chruščëv. Par dut il mont si vierzeve un taramot politic e istituzionâl fuartonon, che al varès cambiât in maniere radicâl i rapuarts di fuarce jenfri lis grandis potencis de Tiere: le varessin clamade “distension”. Angelo Roncalli al cjape sù il pastorâl dal Patriarcje di Vignesie (chel che al sarès stât une volte di Sant Ermacore) e al inaugure un gnûf mût di interpretâ la Glesie, no plui tant che istituzion ma pluitost tant che oportunitât di dialic jenfri ducj i umans; J.F. Kennendy al devente senatôr in Massachusetts, screant ancje lui une gnove fonde di interpretâ la mission politiche: insome, i trê grancj protagoniscj de seconde metât dal Nûfcent in chel an alì a tacavin a dimostrâ che un mont gnûf e diferent al jere no dome ipotizabil ma ancje pussibil di realizâ.
✒ Agnul Floramo
