«La riprese e je, ma ancjemò debile e il dam che il decret Monti dal 2011 al à fat cu la introduzion de tasse di stazionament – ancje se cumò e je stade gjavade – al è stât grant, massime par vie che al à rinfuarcît une forme di criminalizazion tai confronts di chei che a àn lis barcjis, che a continuin a vê pôre e a stâ lontans di barcjis di proprietât».
In struc, Gennaro Coretti, al conte cussì il stât di salût de nautiche de Regjon, intune stagjon, dut câs, dulà che si è assistût a buinis gnovis che a son rivadis propit des “Marinis”, i lûcs dulà che si poie la barcje e, simpri di plui, ancje si fasin lis vacancis. Lui, paron di une marine a Grau, al è un dai cinc aministradôrs di FvgMarinas, un par ogni zone che e compon la rêt: Triest, Monfalcon, Grau, S. Zorç e Lignan. I aministradôrs a son, pal ordin, Roberto Sponza, Andrea Cugola, Gennaro Coretti, Fortunato Moratto e Giorgio Ardito.
Cun di fat, tal Jugn dal 2016 in regjon e je nassude FvgMarinas, la rêt che e cjape dentri 19 des 23 marinis ativis tai 130 chilometris di splaze de regjon, di Lignan fintremai a Mugle, par 7mil puescj par barcjis dai 6 ai 100 metris. Une coalizion che intal zîr di pôcs mês e à vût la fuarce di presentâsi a dôs des plui grandis fieris europeanis dal setôr, a Düsseldorf e in Austrie, doi dai principâi marcjâts pe nautiche regjonâl.
«O sin la plui grande realtât taliane di cheste fate», al zonte cun sodisfazion Coretti. «Di cheste esperience di metisi adun no si torne indaûr, par vie che o vin capît e sperimentât che ognidun di nô al è diferent di chel altri, tant di podê dî che o sin coleghis ma no concorints». Duncje, a pôc plui di un an de nassite di FvgMarinas, al è confermât che «si stin movint insiemi e in plene sintonie».
Cussì al è bielzà rivât cualchi afâr in graciis de dôs fieris fatis sul imprin dal 2017 e a son bielzà in cont programs di esplorazion par il 2018. La presince dai forescj tes marinis regjonâls «in dì di vuê e in gjenerâl e je ator dal 40-50%», al spieghe Coretti, cui todescs e i austriacs in prime file. La idee, però, e je di rivâ a cjapâ dentri simpri di plui ancje il marcjât dal Est, che al da segnâi un grum interessants e, soredut, peâts a barcjis di une cierte dimension. «O stin pensant di jessi presints il prossim an in Ongjarie – al anticipe Coretti -, stant che a Budapest a an un salon nautic». In chescj agns, si à viodût di fat che il turisim nautic ongjarês, che storichementri al pontave su la Cravuazie, cumò si sta movint di li e al à cjapât in considerazion ancje il Friûl-Vignesie Julie.
Tra i ponts di acuardi tra lis 19 marinis al è il fat che no àn nissune voie di jessi dome un parc di barcjis. «O cirìn di tignî achì cheste tipologjie di turiscj, fasintji cognossi che il Friûl-Vignesie Julie al à plui zonis e che daûr il mâr e la splaze no je une buse nere, ma cetant di viodi e di cerçâ». Cul jutori di PromoTurismo Fvg, cussì lis marinis si presentin tant che la prime muse de regjon, par po fâ cognossi lis bielecis storichis che di Siest e rive a Gardiscje passant par Palme e Aquilee, e daûr ancjemò al è il Collio e dute la pedemontane cul vin e la mangjative di cualitât che si cjate dome chenti. E se si vûl jessi int di mâr e di mont, po ben, in Friûl si à ancje chel.
I navigadôrs al somee che a presein, parcè che «o cirìn di dâ i servizi al miôr pes barcjis e pai lôr clients, cussì che o sin puescj dulà che si pues propit vignî in vacancis». Wi-fi, Spa pal benstâ, pissinis, stanziis pal rilassament, albiercs e apartaments dentri de marine o subit dongje, e naturalmentri i cantîrs pes barcjis, ven a stâi lis oficinis par chei che a van par mâr, no mancjin. «Si capìs – al dîs ancjemò Coretti – che ognidun si diferenzie par alc: al è cui che al à il paradîs pe cure dal cuarp e cui che al à cantîrs di gale. Insiemi si fâs che rêt che e je buine di presentâsi cun capacitât intun marcjât un grum esigjent».
In cont de riprese, «i segnâi plui interessants si ju à su lis barcjis grandis», al considere l’espert. Invezit, la riprese su lis piçulis barcjis si stente ancjemò a viodile. «Int che e podarès ancje pensâ a une barcje di piçulis dimensions o mezanis e continue a dî che a nol è ancjemò il moment».
Bandieris Blu di cualitât pes splazis e puescj di barcjis furlanis
In Friûl-Vignesie Julie, a garantî la cualitât a chei che a sielzin di rivâ achì cu la barcje a son rivâts chest an ancje i tant innomenâts ricognossiments de Bandiere Blu Fee, che in regjon a àn premiât in plui che lis splazis ancje un grum di puescj pes barcjis: il Marina Hannibal di Monfalcon, Dry Marina Aprilia Marittima 2000 e Marina Punta Gabbiani a Aprilia Marittima, Marina Sant’Andrea a S. Zorç di Noiâr, Darsena Porto Vecchio, Marina Uno, Marina Punta Verde e Marina Punta Faro a Lignan. E propit a Lignan e tal so comprensori e je la plui alte concentrazion di Bandieris blu dal mont: 7 bandieris aes marinis e une ae splaze.
✒ Antonella Lanfrit
