La strade viers dal referendum in Catalogne e i obietîfs di politiche linguistiche dal Gales. A son chescj i argoments che o vin selezionât dentri de nestre agjende europeane, là che al cjate spazi ancje alc altri, a tacâ dal lâ dilunc des iniziativis pe racuelte des firmis a pro dal Minority SafePack, dopo de sentence de Cort di Justizie de Union Europeane (CJUE) dai 3 di Fevrâr stâts che i veve fat cuintri ae indiference de Comission Europeane (CE).
La atenzion e scugne jessi pontade ancjemò su la Catalogne e sul braç di fier tra Barcelone e Madrid. De cuistion, ae fin di Jugn, si veve interessât ancje il New York Times (NYT), cuntun editoriâl che al jere in chel istès une vore contrari sei ae indipendence catalane che ae posizion di sieridure dal guvier spagnûl. In particolâr l’Editorial Board dal innomenât sfuei american al sugjerive a Rajoy di permeti che si fasi il referendum e soredut di fâ in maniere, ancje cul rinfuarciment de autonomie de Catalogne, massime sul plan finanziari e fiscâl, che la int e voti in maiorance cuintri, cemût che e jere lade a finîle in Scozie tal 2014.
L’esecutîf spagnûf pal moment al mostre a clâr di no vê nissune intenzion di lâ daûr nancje dai conseis dal NYT. Lu à sclarît la vicepresidente dal guvier di Madrid, Soraya Sáenz de Santamaría, che ai prins di Lui e à dit che «pal Stât a son avonde 24 oris par fermâ la leç referendarie». Par intant e va dilunc la vuere judiziarie, cul Tribunâl Costituzionâl che al à decidût di declarâ incostituzionâls dutis lis vôs di belanç de Catalogne dedicadis a cuvierzi lis spesis par elezions o consultazions popolârs, par un totâl di passe 6 milions di euros. L’intindiment al chel di pidimentâ la organizazion dal vôt dal prin di Otubar e di fâur pôre ai politics catalans che a son impegnâts a pro dal dirit di decidi e soredut a pro de autodeterminazion.
Denant dal cressi des pressions par blocâ la iniziative referendarie, il guvier catalan al à rispuindût in dôs manieris. Di une bande, cu la atribuzion de deleghe pai procès eletorâi al vicepresident Oriol Junqueras e cu la sostituzion di chei siei membris che si vevin mostrâts plui in dificoltât su chest front, ven a dî la puartevôs dal esecutîf Neus Munté, la responsabile pe educazion Meritxell Ruiz e il conseîr pal interni Jordi Jané, che i lôr puescj ju àn cjapâts Jordi Turull, Clara Ponsatí e Joaquim Forn. Di chê altre, cuntune ofensive politiche e mediatiche, che e à vût tant che protagonist ancjemò une volte il president Carles Puigdemont e che i siei contignûts a son sclarîts intal gnûf sît internet https://garanties.cat/, dedicât juste ae garanziis dal dirit di vôt e ae presentazion dai percors che a divegnin dai risultâts dal referendum.
Sù par jù ta chês stessis zornadis che il guvier catalan al tornave a bati su la cuistion de indipendence, chel dal Gales al à dât fûr un document programatic in cont dai siei obietîfs di politiche linguistiche. L’intindiment strategjic al è chel di rivâ a vê, dentri dal 2050, a un milion di personis che a sedin in stât di doprâ il galês in maniere svelte e normâl. Par chel l’esecutîf vuidât dal laburist Carwin Jones al à metût adun un plan, che al à di jonzi i prins risultâts za dentri dal 2021.
Lis azions proviodudis a àn chê di rinfuarcî l’insegnament dal galês e par galês tes scuelis, cuntune atenzion specifiche sei par chês de infanzie che pes superiôrs e pe universitât, di incressi il numar dai funzionaris publics in stât di fâ il lôr mistîr doprant il galês, di svilupâ une economie che in gjenerâl, te produzion di bens e servizis e te lôr promozion e ufierte, e cjapi fuarce des specificitâts linguistichis e culturâls dal teritori, e di potenziâ lis tecnologjiis digjitâls par galês.
In Europe si fâs cussì.
di Marco Stolfo
