Cuâl isal il stât de pupilance e de promozion de lenghe furlane tai mieçs di informazion, te publiche aministrazion, te scuele? E cemût e su cualis fondis vadie indevant la programazion linguistiche? Cun di plui, ce isal di previodi pai prossims agns par tignî cont di ce che al è stât fat, fâ di plui e di miôr o di diferent?
Tantis domandis che a cjataran une rispueste o almancul un confront il 1 e 2 di Dicembar a Udin in ocasion de Conference regjonâl di verifiche e atuazion pe lenghe furlane, une iniziative che e je coordenade de presidence dal Consei regjonâl. Si trate di un moment di verifiche e di gnove progjetazion che al è proviodût de leç 29 dal 2007 «Normis pe tutele, pe valorizazion e pe promozion de lenghe furlane» e che al à di davuelzisi almancul une volte in ogni legjislature, e sîs mês prime che e finissi.
A coordenâ i grups di lavôr che a son stâts inviâts par rivâ ae Conference cuntune fotografie avonde inzornade e puntuâl di ce che al è in cors, al è stât indicât dal Ufici di presidence dal Consei regjonâl il conseîr Claudio Violino. «Cheste volte la Conference e rive intun moment une vore interessant – al sotlinee – stant il dibatiment che al è ator de autonomie, cun ce che al è sucedût in Catalogne e i referendums che si son davuelts in Venit e in Lombardie. Pal Friûl, cheste e je une ocasion impuartantone par rinfuarcî il concet che la nestre autonomie e specialitât e poie ancje sul fat che chenti o vin trê lenghis ricognossudis. Une specialitât che di altris bandis a fasaressin firme par vêle, come par esempli in Venit di vê ricognossût il lôr patuà tant che lenghe».
In chescj mês al è stât metût in pîts un grup di lavôr un grum articolât, in cubie cul assessorât regjonâl ae Istruzion e ae Culture, cu la Assemblee de comunitât linguistiche furlane, la Universitât, l’Ufici scolastic regjonâl e la Arlef – Agjenzie Regjonâl pe lenghe furlane, che e je il braç operatîf di dute la Conference. La doi dîs di dibatiment si davuelzarà alì dal auditorium Antonio Comelli a Udin e po, ai 2 di Dicembar, in cjistiel a Udin. «A chescj moments publics a son invidâts ducj i citadins – al sotlinee Violino -, dongje dai operadôrs dai diferents setôrs dulà che si dopre la lenghe furlane in contescj publics».
In struc, il program al previôt la presentazion dal stât de lenghe tai cuatri ambits individuâts (scuele, media, publiche aministrazion e planificazion linguistiche) e la riflession puartade dai grups di vore di ogni ambit; un dibatiment gjenerâl; une vore di racuelte dai contignûts saltâts fûr tal dibatiment e po lis conclusion. A vierzi la Conference, a saran esemplis di buinis pratichis in cont dal doprâ lis lenghis mancul pandudis in altris bandis de Europe. Tal specific, il 1 di Dicembar, tacant des 9 e dopo il salût dai presidents dal Consei regjonâl, de Regjon, de Arlef e dal Clif, a intervignaran Sixto Molina dal Consei de Europe; Gregorio Fente dal Guvier de Galizie (al fevele de lenghe te scuele), il galês Elin Haf Gruffydd Jons de Aberystwyth University, che al fevelarà de lenghe tai media. Ai 2 Dicembar tal salon dal Parlament dal cjistiel di Udin la Conference e scomençarà aes 10.
I grups di esperts a son in vore dal mês di Setembar e a son coordenâts di Patrizia Pavatti (scuele), Erika Adami (media), Marco Stolfo (publiche aministrazion, che e cjape dentri uficis, tribunâl, ospedâi, comuns, Unions e v.i.) e Donato Toffoli pe politiche linguistiche. Par inmaneâ e sostignî la Conference, il Consei regjonâl al à disponût un finanziament di 40 mil euros. ❚
✒ Antonella Lanfrit
