Une Cuintristorie che e je Storie. Presentât il libri di Angelo Floramo su la Prime Vuere Mondiâl il Friûl

Intune sale dal Consei de Provincie di Udin plenone, al è stât presentât vinars ai 3 di Novembar il libri di Angelo Floramo Cuintristorie de prime vuere mondiâl 1914-1918, di pôc publicât dal nestri mensîl La Patrie dal Friûl. Ae presince dal president de Provincie di Udin Pietro Fontanini, dal president de Assemblee de Comunitât Linguistiche Furlane Diego Navarria, dal diretôr de Patrie dal Friûl Dree Venier, dal president de omonime Clape di Culture Dree Valcic e dal autôr Angelo Floramo, l’incuintri al è stât une rare ocasion par scoltâ la storie de Prime Grande Vuere in Friûl cun vôs sincirie. Une liende ben divierse di cemût che le conte la retoriche nazionaliste taliane.
Jessude fûr a pontadis, mês par mês, dilunc il 2014, la “Cuintristorie” e à cjatât la forme di libri tal mês di Otubar, par une publicazion tant domandade soredut pal mût di tratâ la materie, risultât di cetantis ricercjis – fûr dal ordenari -, condusudis di un inteletuâl e storic di grande onestât tant che Angelo Floramo.
A moderâ la presentazion a Udin, al è stât il diretôr Dree Venier, che al à ricuardât che “lis cuintristoriis” a son di cjase tal nestri mensîl furlan. Prime di dutis, la Cuintristorie dal Friûl di Pre Josef Marchet, e dongje di lui la opare di un grant anarchic furlan tant ch Felix Marchi, e al so flanc si zontin Pre Checo Placerean e Pre Toni Beline.
Il libri di Floramo al scancare la vision de retoriche nazionaliste taliane, contant in undis cjapitui, curts e di leture cetant plasevule, cemût che «e je lade tra popui che par secui a son stâts in pâs, cjatâts nemîs par colpe dal nazionalisim». Chest si lu lei in tune des dôs introduzions che a vierzin il libri, gjavadis di articui jessûts su la Patrie dal Friûl tal 2011.
Leturis anticipadis di un prefazion sclete di Dree Valcic, che al dîs tra l’altri che chest libri al rapresente «une tape di un percors scomençât intal 2015 cuant che si vin acuarts che ben pocjis a saressin stadis lis vôs che si saressin alçadis cuintri de maree di disinformazion, di sotanance vergognose a pet di une version mistificade di chê ete». Valcic al siere ancje il libri cuntune postfazion – dongje di un scrit di Pre Toni -, dal titul clâr: Daspò di cent agns no àn domandât ancjemò perdon.
A fasin fintremai impression lis peraulis dal preseât Angelo Floramo, fin dal principi. Di cuant che la Italie, decidût di ce bande stâ, e segne il confin tirant la linie di Cormons. Cussì parincj, amîs, furlans, di une bande si cjatin a vê di stâ cul re talian, di chê altre cul Imperadôr austroongjarês. E par evitâ che e si copassin tra di lôr, ju àn mandâts a scombati sul front Galizian, cuintri i Rus. A cjase i vecjos, i fruts, lis feminis, a patî la fam, la miserie, la vergogne, violencis di ogni sorte, orôrs cetant grâfs. Lis feminis, i stupits di vuere, la mularie, i anzians, oms deventâts di bot soldâts, il popul furlan tal insiemi, a son i protagoniscj dismenteâts di cheste cuintristorie che ur torne – e nus mostre – la lôr vere muse, partint e restant tal bas.
A impressionin i numars, come tal tierç cjapitul: “Sîs mil ombris”. Une tragjedie pari a «vincjecinc taramots dal 1976». E sîs mil di lôr, di monture austriache parcè che nassûts a Aquilee o a Grau, «scancelâts dai memoriâi de Storie». Un libri di lei, parcè che al fâs pensâ. Al fâs vignî voie di aprofondî, di cirî altris fonts e di confrontâlis. Par viodi ben un altri toc fondamentâl di nô furlans. Une Cuintristorie che e je storie.
✒ Alessio Screm