Il prin di Otubar in Catalogne si à votât. 2.260.000 di lôr a àn rivât a cjapâ part a chel referendum che a Madrid a disevin che nol veve di jessi fat e che fintremai cualchidun al à declarât che nol è stât. Lis menacis dal Guvier di Madrid e lis azions legâls – arescj e denunciis variis – metudis in vore de magjistrature spagnole cuintri di aministradôrs locâi (passe 700 sindics) e funzionaris de Comunitât autonome no àn fermât ni la organizazion de votazion e nancje la int che e veve chê di votâ. No je àn fate nancje la Guardia Civil e la Policia Nacional, presintis in forme massive e violente.
Lis fuarcis dal ordin spagnolis a àn rivât a sierâ dome une part dai coleçs eletorâi e tai lôr intervents ur àn dât jù a tancj di lôr. Però dongje di chei che par chel a son stâts «libars di scugnî no votâ», par vie des pachis cjapadis o ben ancje pe pôre di cjapâlis, altris di lôr, macolâts o sinistrâts, no àn molât, a son restâts in code denant dai seçs e ae fin a àn esprimût la lôr volontât te schede eletorâl.
Il numar di chei che a àn rivât a votâ al è stât plui alt di chel dai votants dai 9 di Novembar dal 2014, cuant che une consultazion sù par jù compagne – ancje chê considerade fûr leç, ma fate cence i condizionaments di cheste volte – e veve viodût la partecipazion di 2.236.806 di lôr. In tiermins percentuâi i votants dal prin di Otubar a son stâts il 42,57% di chei che a vevin dirit di fâlu (i citadins spagnûi dai 18 agns insù, residents in Catalogne). Ae domande «Volêso che la Catalogne e sedi un stât indipendent sot forme di republiche?» a àn rispuindût «sì» l’83,9% di lôr e «no» il 7,8%, intant che lis schedis blancjis o nulis a son stadis il 2,9%.
Si stime che cu la sierade «manu militare» dai coleçs eletorâi vie pe buinore di domenie a sedin stadis ritiradis sù par jù altris 700mil schedis za votadis. Par chel si podarès considerâ che a àn votât in dut passe il 50% dai 5.300.000 di lôr che a jerin stâts clamâts a fâlu. Cussì il referendum dal prin di Otubar al è stât fat e a chest pont l’unic a pensâ e a dî che nol è sucedût nuie al è il premier spagnûl Mariano Rajoy.
Dut il mont al à viodût la int de Catalogne in place. Prime dal vôt, par domandâ di esprimisi e par protestâ cuintri dal ategjament dal Guvier di Madrid, des formis preventivis di repression judiziarie e de propagande dai media spagnoliscj. Il prin di Otubar, par votâ e – magari cussì no – ancje par cjapâlis dai pulizais, che no à vût pietât par nissun (844 i ferîts «uficiâi» e dams aes struturis scolastichis là che a jerin lis urnis par centenârs di miârs di euros). Tai dîs seguitîfs cun altris manifestazions massivis, un pôc dapardut.
E dut il mont al à viodût la violence esagjerade des fuarcis dal ordin e la resistence passive, pacifiche e ghandiane dai catalans.
Ancje se in cundizions particolârs, i catalans a àn votât. Chest al è un fat. E al è un fat compagn che la strategjie di Rajoy e je stade falimentâr: Madrid nol à rivât a evitâ il referendum e cu la so ande al à fat cressi il numar di chei che a volevin esprimi il dirit a decidi e, tra chescj, di chei che a jerin e che a son a pro de indipendence.
I lavorents dai puarts di Barcelone e Tarragone, i students des universitâts, i comitâts di cuartîr, lis associazions des fameis dai fruts che a van a scuele, i pompîrs, autentics erois popolârs che a àn difindût la int de violence dai «guardiacivils» plui induialâts, e fintremai ai Mossos de Esquadra, i pulizais «regjonâi» che a àn scugnût gloti l’ordin di Madrid ma àn sierât i seçs eletorâi cence pestadicis… Al è dut un popul in moviment, che al à voie di cambiâ alc.
Salacor ancjemò prime de voie di indipendence, chel che lu clamin «el proces» al à mostrât une volontât di partecipazion civiche e tantis formis di protagonisim, di solidarietât e di colaborazion. Al è chel stes spirt che si veve palesât za timp indaûr sei tes manifestazions a pro dal bon acet dai rifugjâts che tes reazions cuintri dai atentâts dal Isis dai 17 di Avost. Al è alc di impuartant e preseôs che in masse di lôr no àn capît (o magari lu àn capît masse ben…): tancj comentatôrs e osservadôrs, i sorestans europeans e ancje il re Felipe VI, che al à fat un discors in chel istès flap e arogant, cun peraulis che a àn butât benzine sul fûc.
Tal moment che o lin in stampe, no savìn cemût che e larà a finîle. Par sigûr nol sarà nuie compagn di prime. Sperìn ben.
✒ Marco Stolfo
