Tai des Provinciis. Adiu a Gurize e Pordenon, e lis polemichis no si bonin

Tai des provinciis furlanis: un pas indenant te disburocratizazion, o coscj in plui cu la pierdite de aree vaste? A doi agns de sopression dai ents provinciâi decidût de Regjon, il percors si sta aromai sierant, viodût che cui 22 di Avrîl no esistarà plui nancje la ultime restade, ven a stai chê di Udin, che di fat al moment e esist dome in maniere formâl, viodût che ancje dutis lis sôs competencis a son passadis a altris ents. Ai 30 di Setembar e je stade la ultime dì pes Provinciis di Pordenon e di Gurize. I doi ents – il prin fat sù dal 1968, Gurize adiriture intal 1927 – a àn pleât e metût intun scansel i lôr confenons.
La discussion jenfri i ex aministradôrs e la aministrazion regjonâl e reste fuarte e o savarìn dome in futûr se cheste sielte e sedi stade buine o falade: chel che al è clâr, sot i voi di ducj, al è che – dopo il risultât dal referendum dal Dicembar 2016 – dome inte nestre Regjon lis provinciis a son stadis eliminadis. Il teme des sopression dai ents provinciâi al è tornât fûr intant de presentazion a palaç Belgrât a Udin dal libri Province decapitate e risorte dai costituzionaliscj Bertolissi e Bergonzini. Ta chê ocasion al è saltât fûr che il tai des provinciis nol à volût dî sparagns ma coscj in plui par 5 milions di euros ad an, viodût che i dipendents a son passâts in Regjon cun coscj contratuâi plui alts.
Udin: lis peraulis di Fontanini. «A son mil dipendents – al dîs Pietro Fontanini, ancjemò par cualchi mês ultin president de provincie di Udin -, passâts ae aministrazion regjonâl dulà che i contrats a costin di plui, dulà che e je une seconde paie suplementâr (la “quattordicesima”) che in provincie no jere, e po no si à rivât a fâju lâ tai Comuns dulà che tant personâl al sta lant in pension e a son dificoltâts di gjestion». Se i coscj a son un fatôr, il probleme dut câs al è chel che cun cheste decision si è lâts a eliminâ la cussì clamade “aree vaste”: «Pensìn dome ae culture – al dîs Fontanini – viodût che une volte la Provincie e vignive incuintri dulà che la Regjon no rivave: se cheste e pensave aes gruessis manifestazions, nô si dave une man ae coral di un paîs. La gjestion des struturis scolastichis: prime la Provincie e intervignive dapardut, cumò tu âs la Uti di Udin che e je responsabile des sôs scuelis come di chês di Tumieç o di Glemone. La motorizazion cun nô e funzionave, e po pensìn aes stradis: i dipendents dal setôr a son simpri a palaç Belgrât a ma a son finîts in FVG Strade che e je une societât privade di proprietât de Regjon, ma bisugnarà viodi se il tratament contratuâl al va ben ai interessâts. No stin po a fevelâ de decision di dâ dut in man aes Uti, viodût che cualchidun al à metût i servizis in condivision, altris ju àn tignûts: pensìn dome ae sielte dal Comun di Triest di tignîsi la polizie locâl invezit che metile te Uti triestine».
Pordenon: la opinion di Ciriani. Ancje a Pordenon il sindic Alessandro Ciriani, che prime al è stât l’ultin president de Provincie tal Friûl ocidentâl, le pense in maniere similâr: «Cemût si fasial a pensâ – al dîs – che 18 piçulis provinciis come lis Uti a puedin seguî lis cuistions che a integnin teritoris slargjâts? Mi capite di scugnî relazionâmi cuntune Uti e po cun comuns che no àn cjapât part o che invezit a son dentri di altris unions par viodi di une strade. No si pues aministrâ in cheste maniere». Par Ciriani, la organizazion de aree vaste e sarà un teme che bisugnarà tornâ a cjapâ in man: «Si à volût fâ – al spieghe – une riforme centraliste ma e je la necessitât di une gjestion che e consideri i grues intervents che a son strategjics. Al va ancje dit che di imprin al jere chest resonament cuant che si fevelave di un ent no a caratar eletîf, ma si è lâts par une altre strade».
La difese. Di bande sô, la Regjon cul assessôr Paolo Panontin, e continue a sostignî lis sieltis fatis: «O vin eliminât – al dîs – un nivel aministratîf parcè che ritignût un pês burocratic e cun coscj inutii. Dal sigûr, no a dam de democrazie. Si smenteìn che o sin une regjon piçule cun a pene un milion e 215 mil abitants e dividude in 216 Comuns, come che e conte une provincie come chê di Brescia». Tancj agns indaûr, dispès la opinion publiche e lamentave la esistence des provinciis, e cumò i furlans a àn dât l’esempli in dute Italie di vêlis taiadis. Ce che o podìn domandâsi nô, in spiete di capî se la lôr sopression e je stade positive o mancul, al è se pardabon i furlans a vevin di scugnî dâ l’esempli al rest dal paîs talian o se a podevin spietâ prime di cjatâsi, sul plan de organizazion aministrative regjonâl, cence i ents provinciâi, cuntun pâr di Uti partidis e altris no in maniere complete, e in diviers câs, come par chel che al inten la comunitât culinâr di Colorêt, cun sindics in barufe dopo jessi lâts dacuardi par passe 40 agns.
E je une domande necessarie par vie che, se i timps a domandin di sparagnâ e di gjavâ vie lis straçariis, la comunitât furlane vevie pardabon dimostrât di vê lis mans sbusadis plui di altris in Italie?
✒ Pieri Cargnelutti