«Ve chi, la Italie, no je nancje rivade che za si presente cuntune grande magnocule di bergelotz!». Laurinç al sbat sul taulon di len de cusine de plui innomenade locande di Sant Denêl une biele fasanute grasse benzà splumade, curade e monde, pronte par jessi passade inte fersorie dopo vêle farside di cjastinis, di nolis e di cicins: «No stait a dîmi nuie Taresie, che mi pâr di vê la fote che mi rosee il stomi». Taresie, la massarie de locande, e je daûr a cuei il brût di cjar, e dal pignaton si jeve sù vapôr profumat e saurît, di bon, di cjase. Fat di jê.
«Tu âs di rinditi Laurinç, la bandiere che e svintule parsore de lobie e je piturade di vert, di blanc e di ros! No je plui chê gjalinate nere sul linzûl zâl! Chê cun doi cjâfs, che mi faseve ancje impression». Laurinç al plante il massanc sul taulîr, si volte a cjalâ Taresie e – dopo vê riverît di malegracie ducj i sants dal paradîs e scomodade plui di cualchi madone, di Barbiane fin su la pice de mont dal Lussari, al barbote cuntun flât di vôs: «Capo prin, chei gnognos no si son rindûts cont che la bandiere no je chê taliane, ma chê ongjarese! Colôrs compagns, femine. Le à puartade a Sant Denêl Meni, il fi dal fari, tornant di Esztergom, là che al veve fat il so brâf servizi militâr pal sôl imperadôr che al merete di jessi clamât cul so non di cristian, Checo. Checo, come il pari di Laurinç. Che par un galantom al baste dome che un non, mighe doi: Vittorio Emanuele cui? Capo secont, la gjalinate nere, come che tu le clamis tu, e je une acuile, mi capistu? Une acuile. Pre Tite al conte simpri che e je parint di chê nestre, di acuile, che di aur, dal Patriarcje».
Si sente, Taresie, par butâ sù un çoc sul fûc, si suie il sudôr cul peçot che e ten involuçât sul grim e disconfuartade e sbroche fûr: «Cuâl Patriarcje? Milio Patriarcje, chel che al è a stâ intal borc di Poç? No savevi che al ves une acuile di aur. Al sarès miôr che le tignìs platade, dal moment che i soldâts talians a son famôs par meti inte sachete la robe di chei altris. A àn la manute lungje. A contin che i carabinîrs dal Re a vedin svuedade la cantine di Bortul, il becjâr. “Requisizione per approvvigionamento”, a disin». Inutil, al pense Laurinç. Cun Taresie e sarà simpri une vuere pierdude. Come cun chescj regnicui, che a pierdin dutis lis bataiis ma pûr a rivin adore di vinci lis vueris. Come che al è sucedût ancje cumò: se no fossin stâts i Prussians, che ur àn dade une buine man, a cheste ore no saressin daûr a mateâ par meti insiemi un gustâ di Re. Par lôr, i lôr gjenerâi, lis fanfaris e i sunadôrs. Cu la int vie pes campagnis che e mûr di fam e di miserie. E cun chei gnognos che ju àn tant spietâts a batiur lis mans in place. Nancje vincj agns indaûr – ce jerial, il ’48? – ti àn fat il fisc par dut il pais: i sorestants, si intint. Int cui becins te borse. Il speziâr, il nodâr, il miedi. Al jere dut pront pe rivoluzion! No ti vevino platadis lis bombis jenfri la librarie de Biblioteche Guarneriane? A risi, macacos come che a son, di brusâ sù dut il patrimoni. A vevin ancje butade jù la tor dal orloi, par fâi un arc di trionf ai talians. Che in chê volte, però, no son rivâts a gafâle. E vuê, cutuardis di Novembar, che il Re al è in visite a Udin, al rive in pompe magne chest Quintino Sella. Piemontês. Inzegnîr. Professôr. Cagon. Sepi diu ce. Ospit di rivuart: «Arriva il commissario regio, vedete di imbastire un pranzo memorabile, o sarà vostra imperitura vergogna», al veve comandât par iscrit chel gjenerâl che al veve plui medaiis su la gjachete che no coculis un cocolâr. Memorabil? Sigûr.
Pe casse dal Comun e restarà une buine memorie par agnorums. La liste Laurinç le veve picjade su la cape dal cjamin, par no dismenteâsi di nuie: persuts, salams, fuiacis, piecis di formadi, e po dopo fasans, cuaiis, piçocjis, colombins, fersoriis di ucieluts di sbroventâ cul vin neri; e vin di bevi, di chel speciâl, tant blanc che neri. A jerin doi dîs e dôs gnots che Laurinç al lavorave pal “commissario regio”. Lui che invezit al jere nassût citadin dal Imperi di Asburc, juste vincjecinc agns indaûr. Juste in timp par lâ a combati cuintri i talians a Solferino, ai 24 di Jugn dal 1859. Congjedât cun valôr par un colp che un bersalîr talian i veve trat intune gjambe. Par fortune che, tornât a cjase, al veve cjatade pronte a spietâlu la Locande di so pari. Locande. Cussì le clamavin ducj, di simpri. E lui le tignive tal cûr, cjalde come chê cusine, come chel fogolâr. «Sapete cosa vi dico miei cari Friulesi? Che in onore di questo pranzo superbo, che mi ha riconciliato con la freddezza mostratami da tanti di voi, propongo che da oggi questa locanda la si chiami Albergo Italia». E intant che il speziâr, il nodâr, il miedi si spelavin lis mans, pre Tite, tirant sù une tabacade, al veve sacramentât scomodant nuie mancul che Dante: «…di dolore ostello, non donna di province ma bordello». Âstu sintût Taresie? Pre Tite al cite Dante, i dîs Laurinç. E Taresie: «Ma Dante cuâl? Chel che al è a stâ in borc di Sac?».
_________________________________
1866 in Friûl: a rivin i talians
Ai 20 di Lui dal 1866, dongje de isule di Lisse, in Dalmazie, l’amirâl imperiâl Wilhelm von Tegetthof al strabat la marine taliane intune bataie navâl che e restarà memorabile, fasint scuele in dutis lis academiis dal mont. Jenfri i marinârs asburgjics a jerin ancje tancj furlans di Grau e di Acuilee. Ogni volte che un colp trat de nâf di Tegetthof al colpive une unitât taliane, i marinârs a berlavin in côr: «Viva San Marco!». Un svindic dut patriarcjâl cuintri une false mari che e voleve cjapâ il puest di chê vere. Ai 24 di Jugn a Custoza, l’esercit talian superiôr tal numar a di chel dai austriacs, al pierdeve. Miârs di soldâts talians a restarin muarts sul cjamp. E pûr, cul jutori de Prussie, che invezit e vinceve, la Italie e podè gafâ il Friûl. Il tratât di Cormons al varès dividude la tiere furlane cuntun confin crudêl che al passave sul Judri e jenfri Pontebe – deventade taliane – e Pontaffel restade austriache. E tacave cussì la stagjon dai fradis cuintri.
_____________________________________
1866 tal mont: modernitât e bombis
Il pitôr francês Gustave Courbet (1819-1877) al scandalizave i benpensants cul so cuadri cetant famôs La origjin dal Mont, là che une femine crote cu lis gjambis viertis e mostrave il passaç di indulà che dut al nas e si gjenere, la fonde de vite. E il 1866 al somee pardabon un moment di grant cambiament. E finìs la vuere di secession americane, decretant la afermazion di chê potence che e varès vude une grande influence, tal ben e tal mâl, inte storie universâl: l’an prime il president Abraham Lincoln al jere stât copât intun atentât di un fanatic sudist. Ai 16 di Lui, l’inzegnîr svedês Alfred Nobel al dimostrave la potence di un esplosîf micidiâl e, pintît, cui bêçs vuadagnâts al fondave il premi che al cjape il so non. Ai 27 di Lui, pe prime volte, a bon pro di un colegament che al coreve sot de grande aghe oceaniche, Europe e Americhe a poderin scambiâsi lis primis comunicazions transcontinentâls de storie, doprant l’alfabet di Morse. E Gregor Mendel (1822-1884), un sienziât di Brno, al publiche il prin articul là che si dimostre la gjenetiche e la sô trasmission ereditarie.
di Agnul Floramo
