President, nus contial da la assemblee nazionâl che si è davuelte domenie ai 27 di Avrîl a Udin?
Tal ultin congrès nazionâl de Fidas, che si jere tignût a Bari, o vevi proponût, come component dal consei, la candidature di Udin par ospitâ, dai 25 ai 27 di Avrîl di chest an, il 47n congrès nazionâl, in ocasion dal cincuantenari de fondazion de Associazion Furlane Donadôrs di Sanc. La propueste e je stade acetade a la unanimitât e duncje Udin e je deventade par trê dîs la capitâl dal don dal sanc. A son rivadis 66 associazions di dute Italie e inte domenie o vin vude la sfilade cun ben 22 mil partecipants. Par fâus capî cemût che si è svilupât il corteu: lis regjons a àn sfilât par sezions regjonâls, il Venit par provinciis, il Friûl par associazions e la AFDS par zonis. Di fat, la provincie di Udin e je dividude in 17 distrets, segn di trop radicade che e je la culture dal don di sanc te nestre tiere.
Cun di plui e je stade ancje la ocasion par fâ sfilâ ancje lis nestris sessions militârs, o ben chês de polizie, dai vigjii dal fûc e de forestâl.
Chest al è un moment impuartant par manifestâ e rindi simpri plui publiche la donazion parcè che a son daûr a nassi leçs europeanis cun normativis pertinentis a la donazion.
Duncje la AFDS e je une des primis, se no la prime, associazion in Italie par durade e numar di donadôrs?
Sì, dopo 50 agns di ativitât la AFDS e conte 50.000 iscrits, la plui numerose di Italie. Ogni an si zontin 2000-2500 gnûfs donadôrs, ancje se intal stes timp a ‘nt pierdìn 1000-1500 par limit di etât.
Il probleme che si è presentât ultimementri al è che, inte provincie di Udin, lis personis che a àn plui di 66 agns (etât massime par donâ) a son plui di 110.000 mentri zovins fint ai 17 agns a son 75.000: clâr che chest nol permet un just ricambi gjenerazionâl.
Parcè i furlans sono donadôrs cussì grancj?
O savìn che il Friûl al à tant patît: vuere, emigrazion, abandon, miserie e fam. Come risultât di chest al è deventât une vore sensibil a la soference e al capìs ben ce che al vûl dî donâ par judâ chei altris. Cun di plui e je ancje vere che o sin un popul cuntune mentalitât sierade ma che cuant che si vierç viers il prossim al sa dâ ancje il cûr.
La nestre e je deventade une vere e proprie culture dal don tant che le cjatin plui fuarte tai paîs che no in citât.
In Italie cemût sino metûts a nivel di donazion?
Ancje se ta chescj ultins agns i dâts chi in Friûl a son confuartants, al è just dâ une cjalade ai risultâts a nivel nazionâl: purtrop in Italie a son ancjemò tantis zonis dulà che il don dal sanc nol è suficient par cuvierzi la dibisugne. Tantis regjons a son a un nivel une vore sclagn, e se o confrontìn i dâts che nus rivin de Europe il cuadri al è ancjemò plui vilient: stâts come la Irlande, la Svezie, la Austrie o la Belgjiche a àn produzions une vore plui altis. La Italie e je a mieze classifiche europeane e se nol fos pal Friûl e il grant sfuarç dai nestris donadôrs o saressin ancjemò plui indaûr. Par vê cualchi dât: in Italie la percentuâl di donazions di plasme par numar di abitants e je dal 10,34%; in Friûl o sin passe il 20%, in Campanie no di plui dal 2%.
O vuei descrivius ancje cheste realtât: in Friûl o vin dîs malâts che a dibisugnin di ben 2500 donadôrs par podê tratâju intun sôl mês. La alternative? Vivi tacâts di un respiradôr.
Ce aie di fâ une persone che e vûl donâ?
Al è sempliç: si à di vê tra i 18 e i 66 agns e pesâ plui di 50 Kg, si va tal centri di trasfusion plui dongje e li si fasin lis analisis preliminârs par viodi se un al è adat a donâ. Po dopo si pues iscrivisi a une sezion de AFDS. Chest al permet di reperî lis personis in câs di richiestis di grups di sanc particolâr.
_______________________________________________________
La AFDS par furlan
A un an de muart di pre Toni Beline la AFDS e à publicât un libri cun lis sôs riflessions, pinsîrs che lui al scriveve su la riviste il “Dono”. Come che nus dîs te prefazion Renzo Peressoni “Te nestre associazion o sin usâts a dî che, tra i valôrs che plui a dan un sburt a un desideri tant grant di donâ sanc, al sedi il jessi leâts in maniere profonde a la nestre tiere, a la sô vere tradizion, a chel che i dâ origjinalitât culturâl. Pre Antoni Beline di cheste furlanetât al jere il naturâl puarte bandiere parcè che e je i à savût dâ il miôr di se come om, come scritôr e come studiôs e naturalmentri come predi stant che l’amôr pe nestre tiere al à components sacrâi une vore fuarts.”
Il libri al è stât presentât in ocasion dal congrès nazionâl e par difondi in dute Italie i principis e i valôrs di pre Toni al è stât voltât ancje par talian di pre Romano Michelot che al à curât la selezion dai articui. La semence plantade di pre Antoni no je muarte di bant: ancje se cumò lui nol pues plui puartâ indevant la rubriche, la riviste il Dono e continue a presentâ la pagjine par furlan, che cumò si clame apont “Friûl”.
