La Europe e clame, ma al somee dificil che i Stâts a scoltin e a rispuindin pardabon. In cont di autoguvier, dirits linguistics, pluralisim culturâl e tutele des minorancis, tai prins mês dal an gnûf, a nivel statâl, tra media, fuarcis politichis e istituzions, la situazion e somee segnade a fuart de bande dal nazionalisim plui fanatic, che ancje cuant che si presente cu la muse di chel che lu clamin “patriotisim costituzionâl” al è simpri imbombât di intolerance. Che a sedin i migrants che a rivin di lontan o ben che a sedin lis comunitâts che di tant timp si cjatin in part dai lôr teritoris e che a àn une lôr specificitât identitarie e a vuelin palesâle e rivendicâle in maniere positive, la pôre de diversitât e je simpri chê.
Il Parlament european al cjape posizion
Cheste situazion e je stade denunziade de bande dal Parlament european, che ai 7 di Fevrâr stâts al à fate buine une mozion par une risoluzion su la protezion e la no discriminazion des minorancis intai Stâts membris de Union Europeane. Il document al marche il fat che fin cumò lis istituzions de Union Europeane a àn fat masse pôc su chest front. Par chel, al domande ae UE di jessi ative a pro de difese e de promozion dai dirits des minorancis, cul disvilup di politichis che a previodin la partecipazion di chestis comunitâts, cu la metude adun di imprescj che a permetin di controlâ pardabon la situazion.
Inte mozion si invidin ducj i Stâts membris a promovi la diversitât linguistiche e a garantî i dirits des minorancis ancje cu la ratifiche e la metude in vore des convenzions specifichis fatis buinis di passe vincj agns inte suaze dal Consei de Europe. Cun di plui, si domande ae Comission Europeane di infuartî la sô azion pe promozion dal ûs e dal insegnament des lenghis minorizadis.
Macron al dîs cuatri voltis “no”
Cumò la bale e passe a chei altris orghins de UE e ai Guviers e ai Parlaments dai Stâts, là che però no si viôt masse atenzion par chestis cuistions, cemût che a mostrin la plui part des gnovis che a son saltadis fûr vie pes ultimis setemanis. Al è emblematic il câs dal Stât francês, là che timp indaûr, prime inte campagne eletorâl pes presidenziâls e po in chê pes politichis, Emmanuel Macron al veve mostrât une muse europeiste e al veve fat declarazions a pro des lenghis minorizadis de “République”.
Juste ai 7 di Fevrâr il president francês al è stât in Corsiche, e aes domandis fatis indenant de maiorance nazionalitarie che e guvierne la Comunitât teritoriâl de isule ur à rispuindût in maniere negative. In particolâr, cundut di vê declarât di jessi a pro dal bilinguisim, al à refudât cun decision la propueste di ricognossi il cors tant che lenghe couficiâl. L’ategjament al è stât compagn in cont dal cussì clamât “statût di resident”, pensât par combati la speculazion edilizie, de incressite formâl e sostanziâl de autonomie de Corsiche e de amnistie pai presonîrs politics, che no je stade nancje nomenade intant dal discors uficiâl fat a Bastia.
Stât spagnûl, sentencis e menacis
E se il model european e mondiâl dal Stât nazionâl si compuarte cussì, no puedin fâ diferent chei altris che i van daûr. Salacor, tal câs dal Stât spagnûl, i arlêfs a fasin miôr – ven a dî piês – dal mestri. Juste cualchi dì prime des celebrazions de Zornade internazionâl de lenghe mari il Tribunâl costituzionâl di Madrid al à dât fûr une sentence che i fâs cuintri ae couficialitât, dongje di catalan e spagnûl, dal ocitan, lenghe proprie de Val d’Aran, te Comunitât autonome de Catalogne. Sù par jù in chei stes dîs, il Guvier spagnûl al à menaçât di intervignî sul sisteme scolastic catalan, par gjavâ vie il metodi di imersion linguistiche che ur permet a ducj di imparâ e doprâ ben catalan e spagnûl. Cence dismenteâ lis tantis violazions dai dirits linguistics denunziadis in Galizie de “A Mesa pola Normalización Lingüistica” o il câs di un arbitri che tal Paîs Basc, intune partide di balon, al à fintremai menaçât di doprâ il cartelin ros cuintri dai zuiadôrs che a varessin fevelât par euskara.
di Marco Stolfo
