«La Europe dai popui e à un avignî, chê dai Stâts no». Lu à dit Aureli Argemí a “La Patrie dal Friûl” te videointerviste, curade de diretore Erika Adami e publicade su la pagjine Facebook dal nestri mensîl. Si è fevelât de situazion in Catalogne daspò des elezions dai 21 di Dicembar e la nomine, pai indipendentiscj, dal republican di Erc Roger Torrent ae presidence dal Parlament; dal dirit ae autodeterminazion dai popui; di Friûl e di Europe; di rispiet des identitâts.
Argemí, catalan, al è il fondadôr e il president emerit dal Ciemen, il Centri internazionâl Escarré pes minorancis etnichis e pes Nazions cence Stât di Barcelone, promotôr de Declarazion universâl dai dirits linguistics, de Conference des Nazions cence Stât in Europe e de Rêt mondiâl dai dirits coletîfs dai popui tal Parlament european.
S.C.