Il Comun al jentre te Uti de Cjargne
Si lavore a di un protocol di intese jenfri Regjons, pal rientri definitîf di Sapade al Friûl. Dopo che a Novembar la Cjamare e à fat bon l’ultin vie libare pe acuisizion di Sapade al Friûl, tal paîs montan i siei aministradôrs a van dilunc a dâsi di fâ par sierâ l’iter e par fâlu deventâ realtât. Tes ultimis setemanis, il sindic di Sapade Manuel Piller Hoffer al à cjapât part a di une sentade dal diretîf de Anci regjonâl vuidât di Mario Pezzetta, e al à vût ancje ocasion di cjatâsi cul president de Uti cjargnele (li che e jentrarà Sapade) Francesco Brollo: «O volevin capî – al à spiegât – cemût che e funzione cumò la gjestion aministrative dopo la eliminazion des Provinciis. In gjenerâl, disìn che par nô cumò a son doi blocs di confronts che o stin inviant: di une bande cui ents locâi par chel che al inten i servizis e la integrazion cul teritori. Di chê altre bande, cui uficis periferics dal Stât in merit a scuelis, fuarcis dal ordin, agjenziis des jentradis e vie indenant. Ta chel câs, mi soi za cjatât sedi cul Prefet di Udin che cun chel di Belum».
Pal sindic sapadin, l’impegn cumò al è chel di rivâ a dâur lis indicazions plui coretis ai siei citadins, e su chest cantin ancje la Aziende Sanitarie 3 e sta lavorant par inserî Sapade tal distret sanitari cjargnel: «Dentri di Fevrâr – al dîs Piller Hoffer – o rivarìn a vê un protocol firmât des Regjons Venit e Friûl-Vignesie Julie dulà che si definiran ducj i passaçs. In cierts câs, si trate dome di un travâs di dâts, se o pensìn par esempli al cambi des cjamaris di cumierç». Piller Hoffer nol è spaurît dal ricors inviât di resint di cualchi rapresentant de Provincie di Belum ancje parcè che aromai il guvier al à sierât l’iter pal passaç. Par chel che invezit al inten lis spietis dai sapadins, al spieghe: «Nô o vivìn massime di turisim, sedi te stagjon invernâl che ta chê estive: o sperìn di cjatâ in Friûl la atenzion juste par une zone montane come la nestre».
Tal incuintri che al è stât ae fin di Zenâr jenfri i rapresentants di Comun di Sapade e Regjon Friûl-Vignesie Julie si è metude la atenzion sui servizis che a integnin sanitât, traspuart public locâl e scuele. Cu la presidente de Regjon Debora Serracchiani si à fevelât ancje sul dissen di leç leât ae jentrade di Sapade che al è po finît ae atenzion dal Consei regjonâl. In merit ae scuele, la Regjon si è impegnade a clamâ dongje in curt un incuintri jenfri ducj i sogjets interessâts, di maniere di definî i aspiets leâts aes iscrizions e ae unificazion intun istitût comprensîf dal Friûl-Vignesie Julie, par evitâ disasis a students e fameis. In teme di viabilitât, si à previodût che pal moment la competence e resti in man a Veneto strade, che, une volte fatis dutis lis ricognizions dal câs, le passarà a Fvg strade. Sul front sanitari, invezit, za cul prin di Fevrâr i sapadins a podaran gjoldi dal servizi furlan cun chê di garantî ancje il traspuart pes emergjencis midiant l’elicotar, viodût che Sapade e pues za contâ suntune plaçute di rivade pai mieçs. Infin, par chel che al inten lis cuistions legâls, intant dal incuintri si à ribatude che la competence su la aree sapadine e reste al tribunâl di Belum, viodût che il trasferiment di une Regjon a di chê altre no modifiche lis circoscrizions judiziariis.
di Piero Cargnelutti